ଆଣ୍ଟିଗୁଆ: ସାର ଭିଭିଆନ ରିଚାର୍ଡସ ଷ୍ଟାଡିୟମରେ ୱେଷ୍ଟଇଣ୍ଡିଜ ଏବଂ ବାଂଲାଦେଶ ମଧ୍ୟରେ ପ୍ରଥମ ଟେଷ୍ଟ ମ୍ୟାଚ ଶେଷ ହୋଇଛି । ଏହି ମ୍ୟାଚରେ ବାଂଲାଦେଶକୁ ୭ ୱିକେଟରେ ପରାସ୍ତ କରିଛି ୱେଷ୍ଟଇଣ୍ଡିଜ । ଦ୍ୱିତୀୟ ଇନିଂସରେ ଜିତିବା ପାଇଁ ଆବଶ୍ୟକ ଥିବା ୮୪ରନକୁ ମାତ୍ର ୩ଟି ୱିକେଟ ହରାଇ ୮୮ ରନ କରି ୱେଷ୍ଟଇଣ୍ଡିଜ ପ୍ରଥମ ଟେଷ୍ଟ ମ୍ୟାଚ ଜିତିବାରେ ସଫଳ ହୋଇଛି । ଏଥିପୂର୍ବରୁ ୱେଷ୍ଟଇଣ୍ଡିଜର ଆମନ୍ତ୍ରଣ କ୍ରମେ ବାଂଲାଦେଶ ବ୍ୟାଟିଂ କରି ପ୍ରଥମ ଇନିଂସରେ ସମସ୍ତ ୱିକେଟ ହରାଇ ମାତ୍ର ୧୦୩ ରନ୍ କରିଥିଲା । ଏହାର ଜବାବରେ ୱେଷ୍ଟଇଣ୍ଡିଜ ୨୬୫ ରନ୍ କରି ୧୬୨ ରନ୍ରେ ଅଗ୍ରଣୀ ହୋଇଥିଲା । ପରେ ଦ୍ୱିତୀୟ ଇନିଂସରେ ବାଂଲାଦେଶ ୨୪୫ ରନ୍ କରିବାରେ ସକ୍ଷମ ହୋଇଥିଲା ।
ଫଳରେ ଦ୍ୱିତୀୟ ଇନିଂସରେ ୱେଷ୍ଟଇଣ୍ଡିଜକୁ ଜିତିବା ପାଇଁ ୮୪ ରନ୍ ଆବଶ୍ୟକ ଥିଲା । ଦ୍ୱିତୀୟ ଇନିଂସରେ ୱେଷ୍ଟଇଣ୍ଡିଜ ପକ୍ଷରୁ ଜନ କ୍ୟାମ୍ପବେଲ ଅପରାଜିତ ୫୮ ଏବଂ ଜେମିନି ବ୍ଲାକଉଡଙ୍କ ଅପରାଜିତ ୨୬ ରନ୍ ବଳରେ ମାତ୍ର ୩ଟି ୱିକେଟ ହରାଇ ୮୮ ରନ୍ କରିଥିଲା । ଫଳରେ ୱେଷ୍ଟଇଣ୍ଡିଜ ୭ ୱିକେଟରେ ବିଜୟ ଲାଭ କରିଛି । ଏହି ମ୍ୟାଚରେ ପ୍ରଥମ ଇନିଂସରେ ୨ଟି ଏବଂ ଦ୍ୱିତୀୟ ଇନିଂସରେ ୫ଟି ୱିକେଟ ନେଇ ୱେଷ୍ଟଇଣ୍ଡିଜର କେମର ରୋଚ ପ୍ଲେୟାର ଅଫ ଦ ମ୍ୟାଚ ପାଇ ପୁରସ୍କୃତ ହୋଇଥିଲେ ।
