ଟି-୨୦ ବିଶ୍ୱକପରେ ଭାଷ୍ୟକାର ଭୂମିକାରେ ନଜର ଆସିବେ ଦିନେଶ କାର୍ତ୍ତିକ

ମୁମ୍ବାଇ: ଆଇପିଏଲରୁ ଅବସର ନେଲେ ଦିନେଶ କାର୍ତ୍ତିକ । ଏବେ ଟି-୨୦ ବିଶ୍ୱକପରେ ମିଳିଲା ତାଙ୍କୁ ଗୁରୁ ଦାୟିତ୍ୱ । ଆସନ୍ତା ଜୁନ୍ ମାସରୁ ଆରମ୍ଭ ହେଉଥିବା ଟି-୨୦ ବିଶ୍ୱକପରେ ଭାଷ୍ୟକାର ଭୂମିକାରେ ନଜର ଆସିବେ ଦିନେଶ କାର୍ତ୍ତିକ । ତେବେ ଅନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି) ଆଗାମୀ ଟି-୨୦ ବିଶ୍ୱକପ୍ ପାଇଁ ଭାଷ୍ୟକାରମାନଙ୍କର ଏକ ତାଲିକା ପ୍ରକାଶ କରିଛି । ଯେଉଁଥିରେ ସାମିଲ ଅଛନ୍ତି ଦିନେଶ କାର୍ତ୍ତିକ ।
ସୂଚନା ଅନୁଯାୟୀ,୪୦ ସଦସ୍ୟ ବିଶିଷ୍ଟ ଏହି ଭାଷ୍ୟକାରଙ୍କ ପ୍ୟାନେଲରେ ଦିନେଶ କାର୍ତ୍ତିକଙ୍କୁ ସ୍ଥାନ ମିଳିଛି । କାର୍ତ୍ତିକ ଚଳିତ ବର୍ଷ ଆଇପିଏଲରେ ରୟାଲ ଚାଲେଞ୍ଜର୍ସ ବେଙ୍ଗାଲୁରୁ ଦଳକୁ ପ୍ରତିନିଧିତ୍ୱ କରୁଥିଲେ । ତେବେ ଆସନ୍ତା ବର୍ଷ ସେ ଆଇପିଏଲ ଖେଳିବେ ନାହିଁ । ରାଜସ୍ଥାନ ରୟାଲ ବିପକ୍ଷ ଏଲିମିନେଟର ମ୍ୟାଚରେ ସେ ଆଇପିଏଲରୁ ବିଦାୟ ନେଇଛନ୍ତି । ବିଶ୍ୱକପର ଏହି ଭାଷ୍ୟକାର ତାଲିକାରେ ତାଙ୍କ ସହ ଭାରତରୁ ହର୍ଷ ଭୋଗଲେ, ରବି ଶାସ୍ତ୍ରୀ ଏବଂ ସୁନୀଲ ଗାଭାସ୍କରଙ୍କୁ ସ୍ଥାନ ମିଳିଥିବା କୁହାଯାଉଛି ।