ଦିଲ୍ଲୀର ଲାଲକିଲ୍ଲା ନିକଟରେ ଗତକାଲି ହୋଇଥିବା କାର ବିସ୍ଫୋରଣ ସାରା ଦେଶବାସୀଙ୍କୁ ସ୍ତବ୍ଧ କରିଦେଇଛି । ଏହି ବିସ୍ଫୋରଣ ପରେ ସାରା ଦେଶରେ ଥିବା ବିଭିନ୍ନ ମନ୍ଦିର ତଥା ଗୁରୁତ୍ୱପୂର୍ଣ୍ଣ ସ୍ଥାନମାନଙ୍କରେ ସୁରକ୍ଷା ବ୍ୟବସ୍ଥାକୁ କଡାକଡି କରି ଦିଆଯାଇଛି । ତେବେ ବିସ୍ଫୋରଣ ପରେ କୋଲକାତାରେ ଖେଳାଯିବାକୁ ଥିବା ଭାରତ-ସାଉଥ ଆଫ୍ରିକା ଟେଷ୍ଟ ମ୍ୟାଚକୁ ନେଇ ଚିନ୍ତା ବଢିଛି । ତେଣୁ ଭାରତ ସାଉଥ ଆଫ୍ରିକା ମଧ୍ୟରେ ଖେଳାଯିବାକୁ ଥିବା କୋଲକାତା ଟେଷ୍ଟକୁ ନେଇ ମଧ୍ୟ ସୁରକ୍ଷା ବ୍ୟବସ୍ଥା କଡାକଡି କରି ଦିଆଯାଇଛି । ନଭେମ୍ବର ୧୪ରେ ଇଡେନ ଗାଡେନ୍ସରେ ଖେଳାଯିବ ପ୍ରଥମ ଟେଷ୍ଟ ମ୍ୟାଚ୍ । କୋଲକତା ପୋଲିସ ଆୟୁକ୍ତ ମନୋଜ ବର୍ମା କହିଛନ୍ତି, ବର୍ତ୍ତମାନ ବିଶେଷ ଏବଂ ଅତିରିକ୍ତ ଉପାୟ କରାଯାଉଛି । ଆମେ ହାଇଆଲର୍ଟରେ ରହିଛୁ । ଦିଲ୍ଲୀରେ ହୋଇଥିବା ବିସ୍ଫୋରଣକୁ ଧ୍ୟାନରେ ରଖି ସମସ୍ତ ପ୍ରକାରର ସୁରକ୍ଷା ବ୍ୟବସ୍ଥା କରାଯାଇଛି ।
ଏସଟିଏଫ ମଧ୍ୟ ନିୟୋଜିତ କରାଯାଇଛି । କୋଲକତା ପୋଲିସ ଇଡେନ ଗାର୍ଡେନ୍ସ ଏବଂ ଆଖପାଖ ଅଚଂଳରେ ସୁରକ୍ଷା ବ୍ୟବସ୍ଥା ସମୀକ୍ଷା କରିଛନ୍ତି । ସିରିଜ ଆରମ୍ଭ ହେବାର ପ୍ରଥମ ମ୍ୟାଚରୁ ପ୍ରସ୍ତୁତିକୁ ଅନ୍ତିମ ରୂପ ହେବାକୁ ପଶ୍ଚିମବଙ୍ଗ କ୍ରିକେଟ ସଂଘ ଅଧିକାରୀ ଏବଂ ପୋଲିସ ଆୟୁକ୍ତ ମଧ୍ୟରେ ଏକ ବୈଠକ ହେବ । କୋଲକତା ପୋଲିସ ସଂପୂର୍ଣ୍ଣ ସହରରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି । କ୍ରିକେଟ ଷ୍ଟାଡିୟମ ଏବଂ ଆଖପାଖ ଅଞ୍ଚଳର ସୁରକ୍ଷା ବଢାଇଦିଆଯାଇଛି । ପଶ୍ଚିମବଙ୍ଗ ବିଧାନସଭା, ରାଜଭବନ, କୋଲକତା ଉଚ୍ଚ ନ୍ୟାୟାଳୟ ଏବଂ ଆକାଶବାଣୀ ନିକଟରେ ସୁରକ୍ଷା ବଢାଇଦିଆଯାଇଛି । ମ୍ୟାଚ ଦେଖିବାକୁ ଆସିବାକୁ ଥିବା ସମସ୍ତ ବ୍ୟକ୍ତି ମେଟାଲ ସ୍କାନରରେ ଅତିକମରେ ୨ ଥର ଯାଞ୍ଚ କରାଯିବ । ଷ୍ଟାଡିୟମ ବାହାରେ ଏବଂ ଭିତରେ ସଦା ପୋଷାକରେ ପୋଲିସକର୍ମୀ ନିୟୋଜିତ ରହିବେ । ସନ୍ଦିଗ୍ଧ ବସ୍ତୁ କିମ୍ବା ବ୍ୟାଗ ସହିତ ପ୍ରବେଶ ମନା । ଏହାସହିତ ଭାରତୀୟ ଏବଂ ସାଉଥ ଆଫ୍ରିକା ଖେଳାଳି ଟିମ୍ ଯେଉଁ ହୋଟେଲରେ ରହିବେ, ସେଠିକାର ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି । ସୁରକ୍ଷାକୁ ନଜର ରଖି ଟିମ ଇଣ୍ଡିଆର ମୁଖ୍ୟ କୋଚ୍ ଗୌତମ ଗମ୍ଭୀରଙ୍କ କାଳୀଘାଟ ମନ୍ଦିରକୁ ଯିବା କାର୍ୟ୍ୟକ୍ରମ ସ୍ଥଗିତ କରାଯାଇଛି ।
