ମୁମ୍ବାଇ : ବିବାହ ବନ୍ଧନରେ ବାନ୍ଧି ହେଲେ ଭାରତୀୟ କ୍ରିକେଟ ତାରକା କେ.ଏଲ. ରାହୁଲ । ବଲିଉଡ ଅଭିନେତା ସୁନିଲ ସେଟ୍ଟୀଙ୍କ ଝିଅ ଆଥିୟା ସେଟ୍ଟୀଙ୍କୁ ବିବାହ କଲେ କେ.ଏଲ୍. ରାହୁଲ । ଦୁହିଁଙ୍କର ବିବାହ ସୋମବାର ଲଠାରେ ସମ୍ପନ୍ନ ହୋଇଛି । ମୁମ୍ବାଇର ଖଣ୍ଡାଲାରେ ଥିବା ଆଥିୟାଙ୍କ ପିତା ତଥା ବଲିଉଡ୍ ତାରକା ସୁନୀଲ ସେଟ୍ଟିଙ୍କ ଭବ୍ୟ ବଙ୍ଗଳା ‘ସେଟ୍ଟି ହୋମ୍’ରେ ଏହି ବିବାହ ଉତ୍ସବ ଅନୁଷ୍ଠିତ ହୋଇଥିଲା । ଏହି ବିବାହରେ ଲୋକ ସଂଖ୍ୟା ଖୁବ୍ କମ ଥିବା ବେଳେ ଅତିଥିଙ୍କୁ ମୋବାଇଲ୍ ଫୋନ୍ ଜରିଆରେ ଫଟୋ ଉଠାଇବା ବାରଣ କରା ଯାଇଥିଲା। ପରେ ଆଥିୟା ତାଙ୍କ ଇନ୍ଷ୍ଟାଗ୍ରାମ୍ ପୃଷ୍ଠାରେ ବରକନ୍ୟା ବେଶରେ ରାହୁଲ ଓ ତାଙ୍କ ଫଟୋ ଛାଡ଼ିଥିଲେ।
ବିବାହ ଉତ୍ସବରେ ଯୋଗ ଦେଇଥିବା ପ୍ରମୁଖ ବ୍ୟକ୍ତିଙ୍କ ମଧ୍ୟରେ ଥିଲେ ଅଭିନୟ ଦୁନିଆର କ୍ରିଷ୍ଣା ସ୍ରଫ୍, ଡାଏନା ପେଣ୍ଟି, ଅନୁଷ୍କା ରାଜନ୍, ଆଦିତ୍ୟ ସିଲ୍। କ୍ରିକେଟରଙ୍କ ମଧ୍ୟରେ ଥିବା ଈଶାନ୍ତ ଶର୍ମା ଓ ତାଙ୍କ ପତ୍ନୀ ପ୍ରତିମା, ବରୁଣ ଆରୋନ୍ ପ୍ରଭୃତି। ଭାରତୀୟ କ୍ରିକେଟର ନ୍ୟୁଜିଲାଣ୍ଡ ବିପକ୍ଷରେ ଦିନିକିଆ ଶୃଙ୍ଖଳା ଖେଳୁଥିବାରୁ ସେମାନେ ଏହି ଉତ୍ସବରେ ଯୋଗ ଦେଇନଥିଲେ। ୨୦୧୯ରୁ ରାହୁଲ ଓ ଆଥିୟାଙ୍କ ମଧ୍ୟରେ ପ୍ରେମ ସମ୍ପର୍କ ଥିଲା। ଉଭୟ ପରିବାର କର୍ଣ୍ଣାଟକର ମୂଳବାସିନ୍ଦା। ବିବାହ ପାଇଁ ରାହୁଲ ଚଳିତ ନ୍ୟୁଜିଲାଣ୍ଡ ଶୃଙ୍ଖଳାରୁ ଛୁଟି ନେଇଥିଲେ। ଶନିବାର ଓ ରବିବାର ଦୁଇଦିନ ଧରି ସେଟ୍ଟି ହୋମ୍ରେ ବିବାହ ପୂର୍ବର ଉତ୍ସବ; ଯେପରି ମେହ୍ନ୍ଦି, ସଂଗୀତ ଆଦି ଆୟୋଜନ ହୋଇଥିଲା।
