ବ୍ରେଣ୍ଡନ ମ୍ୟାକକୁଲମଙ୍କ ଇସ୍ତଫା ପରେ ଇଂଲଣ୍ଡ ଟେଷ୍ଟ ଦଳର ନୂଆ ପ୍ରଶିକ୍ଷକ କିଏ ହେବେ? ଏହି ପ୍ରଶ୍ନକୁ ନେଇ କ୍ରିକେଟ ଜଗତରେ ଚର୍ଚ୍ଚା ଜୋର ଧରିଛି। ସୋସିଆଲ ମିଡିଆରେ ପୂର୍ବତନ ଭାରତୀୟ ଅଫ୍ ସ୍ପିନର ରବିଚନ୍ଦ୍ରନ ଅଶ୍ୱିନ, ପୂର୍ବତନ ମୁଖ୍ୟ ପ୍ରଶିକ୍ଷକ ରବି ଶାସ୍ତ୍ରୀ ଏବଂ ପୂର୍ବତନ ଭାରତୀୟ କୋଚ୍ ରାହୁଲ ଦ୍ରାବିଡଙ୍କ ନାମକୁ ନେଇ ନାନା ଚର୍ଚ୍ଚା ହେଉଛି। ତେବେ ପ୍ରକୃତରେ ଏହି ତିନି ଭାରତୀୟ ଦିଗ୍ଗଜ ଇଂଲଣ୍ଡର ଟେଷ୍ଟ କୋଚ୍ ପଦ ପାଇଁ ଦାବିଦାର କି? ଆସନ୍ତୁ ଜାଣିବା।
ସବୁଠୁ ପ୍ରଥମେ ରବିଚନ୍ଦ୍ରନ ଅଶ୍ୱିନଙ୍କ କଥା। ସୋସିଆଲ ମିଡିଆର କିଛି ପୋଷ୍ଟରେ ଦାବି କରାଯାଇଛି ଯେ ECB ତାଙ୍କ ସହ ଆଲୋଚନା କରିଛି ଏବଂ ଆମେରିକାରେ ଏହାକୁ ନେଇ ବୈଠକ ମଧ୍ୟ ହୋଇଛି। କିନ୍ତୁ ଏହି ଦାବିକୁ କୌଣସି ପ୍ରମୁଖ ଗଣମାଧ୍ୟମ କିମ୍ବା ECB ପକ୍ଷରୁ ପୁଷ୍ଟି କରାଯାଇନାହିଁ। ଏପରିକି ଇଂଲଣ୍ଡର ପ୍ରମୁଖ ଖବରକାଗଜ The Telegraph ମଧ୍ୟ ତାହାର ସମ୍ଭାବ୍ୟ ଦାବିଦାର ତାଲିକାରେ ଅଶ୍ୱିନଙ୍କ ନାମ ରଖିନାହିଁ। ତେଣୁ ଏବେ ସୁଦ୍ଧା ଅଶ୍ୱିନଙ୍କୁ ନେଇ ଚର୍ଚ୍ଚା କେବଳ ସୋସିଆଲ ମିଡିଆ ଦାବି ମଧ୍ୟରେ ସୀମିତ।
ଏବେ ଆସିବା ରବି ଶାସ୍ତ୍ରୀଙ୍କ କଥାକୁ। ଭାରତୀୟ ଦଳର ସଫଳ ମୁଖ୍ୟ ପ୍ରଶିକ୍ଷକ ଥିବା ଶାସ୍ତ୍ରୀଙ୍କ ନାମ ମଧ୍ୟ ସୋସିଆଲ ମିଡିଆରେ ବେଶ୍ ଭାଇରାଲ ହେଉଛି। ହେଲେ ତାଙ୍କୁ ଇଂଲଣ୍ଡର ଟେଷ୍ଟ କୋଚ୍ ପଦ ପାଇଁ ବିଚାର କରାଯାଉଥିବା ନେଇ କୌଣସି ବିଶ୍ୱସନୀୟ ରିପୋର୍ଟ କିମ୍ବା ECBର ଆନୁଷ୍ଠାନିକ ସୂଚନା ସାମ୍ନାକୁ ଆସିନାହିଁ। ତେଣୁ ଶାସ୍ତ୍ରୀଙ୍କ ନାମକୁ ନେଇ ହେଉଥିବା ଚର୍ଚ୍ଚାର ମଧ୍ୟ କୌଣସି ଦୃଢ଼ ଆଧାର ନାହିଁ।
ଅନ୍ୟପକ୍ଷରେ ରାହୁଲ ଦ୍ରାବିଡଙ୍କ ନାମ ନିଶ୍ଚିତ ଭାବେ ଚର୍ଚ୍ଚାରେ ରହିଛି। The Telegraphର ଏକ ରିପୋର୍ଟରେ ତାଙ୍କୁ ସମ୍ଭାବ୍ୟ ଦାବିଦାର ଭାବେ ଉଲ୍ଲେଖ କରାଯାଇଛି। ତେବେ ସେହି ରିପୋର୍ଟରେ ଏହା ମଧ୍ୟ କୁହାଯାଇଛି ଯେ ଦ୍ରାବିଡ ବର୍ତ୍ତମାନ ପୂର୍ଣ୍ଣକାଳୀନ କୋଚିଂ ଦାୟିତ୍ୱ ନେବାକୁ ଇଚ୍ଛୁକ ନୁହନ୍ତି। ଅର୍ଥାତ୍ ତାଙ୍କ ନାମ ଚର୍ଚ୍ଚାରେ ଥିଲେ ମଧ୍ୟ ସେ ଏହି ପଦ ଗ୍ରହଣ କରିବେ କି ନାହିଁ, ତାହା ଏବେ ସୁଦ୍ଧା ସ୍ପଷ୍ଟ ନୁହେଁ।
ତେବେ ସାରକଥା ହେଉଛି, ଅଶ୍ୱିନ ଓ ରବି ଶାସ୍ତ୍ରୀଙ୍କୁ ନେଇ ଯେଉଁ ସବୁ ଖବର ଭାଇରାଲ ହେଉଛି, ସେଗୁଡ଼ିକର କୌଣସି ଆନୁଷ୍ଠାନିକ ପୁଷ୍ଟି ନାହିଁ। ରାହୁଲ ଦ୍ରାବିଡଙ୍କ ନାମ କିଛି ବିଶ୍ୱସନୀୟ ରିପୋର୍ଟରେ ଥିଲେ ମଧ୍ୟ ସେ କୋଚିଂ ଦାୟିତ୍ୱ ନେବାକୁ ଆଗ୍ରହୀ କି ନାହିଁ, ତାହା ଅସ୍ପଷ୍ଟ। ECB ପକ୍ଷରୁ ନୂଆ ଟେଷ୍ଟ କୋଚ୍ଙ୍କ ନାମ ଘୋଷଣା ହେବା ପରେ ହିଁ ସମସ୍ତ ସସ୍ପେନ୍ସର ପର୍ଦ୍ଦା ଉଠିବ।
