ନୂଆଦିଲ୍ଲୀ: ଭାରତ ଓ ପାକିସ୍ତାନ ମଧ୍ୟରେ କ୍ରିକେଟ ସମ୍ପର୍କ ପୁଣିଥରେ ଉତ୍ତେଜନାପୂର୍ଣ୍ଣ ସ୍ଥିତିକୁ ପହଞ୍ଚିଛି। ପୂର୍ବରୁ ହିଁ ଦୁଇ ଦେଶ ମଧ୍ୟରେ ଦ୍ୱିପାକ୍ଷିକ କ୍ରିକେଟ ସମ୍ପୂର୍ଣ୍ଣ ବନ୍ଦ ରହିଥିବା ବେଳେ, କେବଳ ICC ଓ ACC ଟୁର୍ଣ୍ଣାମେଣ୍ଟରେ ମାତ୍ର ଦୁଇ ଦଳ ମୁହାଁମୁହିଁ ହେଉଥିଲେ। କିନ୍ତୁ ଏବେ ସେହି ସୀମିତ ସମ୍ପର୍କ ମଧ୍ୟ ସଙ୍କଟରେ ପଡ଼ିଛି। ଟି-୨୦ ବିଶ୍ୱକପ୍ ୨୦୨୬ରେ ଭାରତ ବିପକ୍ଷରେ ଖେଳିବାକୁ ପାକିସ୍ତାନ ସରକାର ସ୍ପଷ୍ଟଭାବେ ଅସ୍ୱୀକାର କରିବା ପରେ ପରିସ୍ଥିତି ଆହୁରି ବିଗଡ଼ିଛି। ଆଇସିସି ପୁରୁଷ ଟି-୨୦ ବିଶ୍ୱକପ୍ରେ ଭାରତ ଓ ପାକିସ୍ତାନକୁ ଏକେ ଗ୍ରୁପ୍ରେ ରଖାଯାଇଥିଲା ଏବଂ ଫେବୃଆରୀ ୧୫ରେ ଦୁଇ ଦଳ ମଧ୍ୟରେ ମୁହାଁମୁହିଁ ହେବାର କାର୍ଯ୍ୟକ୍ରମ ଥିଲା। ମାତ୍ର ପାକିସ୍ତାନ ଭାରତ ବିପକ୍ଷ ମ୍ୟାଚ ଖେଳିବାକୁ ଅଗ୍ରାହ୍ୟ କରିଦେଇଛି।
ଏହି ପଦକ୍ଷେପ ପରେ ପ୍ରଶ୍ନ ଉଠିଛି ଯେ, ପାକିସ୍ତାନ କେବଳ ଏହି ବିଶ୍ୱକପ୍ରେ ମାତ୍ର ଭାରତକୁ ବହିଷ୍କାର କରିବ, ନା ଆଗାମୀ ଟୁର୍ଣ୍ଣାମେଣ୍ଟଗୁଡ଼ିକରେ ମଧ୍ୟ ଏହି ଆଭିମୁଖ୍ୟ ଜାରି ରଖିବ। ଯଦି ପାକିସ୍ତାନ ନିଜ ନିଷ୍ପତ୍ତିରେ ଅଡ଼ିଗ ରହେ, ତେବେ ଚଳିତ ବର୍ଷ ଭାରତ–ପାକିସ୍ତାନ ମଧ୍ୟରେ ଖେଳାଯିବାକୁ ଥିବା କମେ କମେ ୩ଟି ମ୍ୟାଚ ବାତିଲ ହେବାର ସମ୍ଭାବନା ରହିଛି। ଅଣ୍ଡର-୧୯ ବିଶ୍ୱକପ୍କୁ ଛାଡ଼ିଦେଲେ, ଦୁଇ ଦେଶ ମଧ୍ୟରେ ଏ ବର୍ଷ ତିନୋଟି ମୁଖ୍ୟ ମ୍ୟାଚ ଖେଳାଯିବାର ଥିଲା।
ଟି-୨୦ ବିଶ୍ୱକପ୍ ୨୦୨୬ ପରେ ବ୍ୟାଙ୍କକ୍ରେ ହେବାକୁ ଥିବା Women’s Asia Cup Rising Stars 2026ରେ ଭାରତ ଓ ପାକିସ୍ତାନ ମହିଳା ଦଳ ମୁହାଁମୁହିଁ ହେବାର କାର୍ଯ୍ୟକ୍ରମ ରହିଛି। ଏହା ସହ ଜୁନ୍ ୧୪ରୁ ଇଂଲଣ୍ଡ ଓ ୱେଲ୍ସରେ ଆୟୋଜିତ ହେବାକୁ ଥିବା ମହିଳା ଟି-୨୦ ବିଶ୍ୱକପ୍ରେ ମଧ୍ୟ ଦୁଇ ଦେଶ ମଧ୍ୟରେ ମ୍ୟାଚ ଖେଳାଯିବାକୁ ଥିଲା। ବର୍ତ୍ତମାନ ସୃଷ୍ଟି ହୋଇଥିବା ବିବାଦକୁ ନେଇ ଆସନ୍ତା ୧–୨ ଦିନ ମଧ୍ୟରେ ICC ପକ୍ଷରୁ ଚୂଡ଼ାନ୍ତ ନିଷ୍ପତ୍ତି ନିଆଯାଇପାରେ। ସମଗ୍ର କ୍ରିକେଟ ଜଗତର ନଜର ଏବେ ICCର ନିଷ୍ପତ୍ତି ଉପରେ ରହିଛି।
