ଶ୍ରୀଲଙ୍କାର ଗରମ ଅପରାହ୍ନରେ ଭାରତ A ଏବଂ ଶ୍ରୀଲଙ୍କା A ମଧ୍ୟରେ ତ୍ରି-ରାଷ୍ଟ୍ରୀୟ ସିରିଜ୍ ଫାଇନାଲ୍ ଖେଳାଯାଉଥିଲା। ଏହି ମ୍ୟାଚ୍ରେ ବୈଭବ ସୂର୍ଯ୍ୟବଂଶୀ କେବଳ ଗୋଟିଏ ମ୍ୟାଚ୍ର ଚାପ ନୁହେଁ, ସମଗ୍ର ସିରିଜ୍ର ଅଭିଜ୍ଞତା ନେଇ ମଇଦାନକୁ ଆସିଥିଲେ। ପ୍ରଥମ ଚାରିଟି ମ୍ୟାଚ୍ରେ ସେ ୧୪, ୪୪, ୨୧ ଏବଂ ୩୮ ରନ୍ କରି ମୋଟ ୧୧୭ ରନ୍ ସଂଗ୍ରହ କରିଥିଲେ। ଷ୍ଟ୍ରାଇକ୍ ରେଟ୍ ୧୫୦ଉପରେ ଥିଲା, କିନ୍ତୁ ବଡ଼ ଇନିଂସ୍ ଆସିନଥିଲା।
ମାତ୍ର ୧୫ବର୍ଷ ବୟସରେ ଆଶା ଓ ଚାପ ଦୁହିଁକୁ ସମ୍ଭାଳିବା ତାଙ୍କ ପାଇଁ ସବୁଠାରୁ ବଡ଼ ଚ୍ୟାଲେଞ୍ଜ ଥିଲା। ଫାଇନାଲ୍ ପୂର୍ବରୁ ଭାରତ A କୋଚ୍ ହୃଷୀକେଶ କାନିଟକର ତାଙ୍କୁ କେବଳ ଗୋଟିଏ ସରଳ ସନ୍ଦେଶ ଦେଲେ—“ନିଜର ସ୍ୱାଭାବିକ ଖେଳ ଖେଳ, ଅଧିକ ଚିନ୍ତା କରନି।” ଏହି ଗୋଟିଏ ଲାଇନ୍ ତାଙ୍କ ଖେଳର ଦିଗ ବଦଳାଇଦେଲା।
ଫାଇନାଲ୍ରେ ବୈଭବ ସମ୍ପୂର୍ଣ୍ଣ ଭିନ୍ନ ଆକ୍ରମଣାତ୍ମକ ମୁଡ୍ରେ ଦେଖାଦେଲେ। ସେ ମାତ୍ର ୨୯ ବଲ୍ରେ ୯୪ ରନ୍ କରି ଶ୍ରୀଲଙ୍କା ବୋଲିଂକୁ ଧ୍ୱଂସ କରିଦେଲେ। ତାଙ୍କ ଇନିଂସ୍ରେ ୧୦ ଚୌକା ଏବଂ ୮ ଛକା ଥିଲା, ଷ୍ଟ୍ରାଇକ୍ ରେଟ୍ ୩୨୪ ଠାରୁ ଅଧିକ ଥିଲା। ଏହି ପ୍ରଦର୍ଶନରେ ମ୍ୟାଚ୍ ପ୍ରାୟ ଏକପାଖିଆ ହୋଇଯାଇଥିଲା।
ସେ ଶତକରୁ କେବଳ ୬ ରନ୍ ଦୂରେ ରହିଗଲେ, କିନ୍ତୁ ତାଙ୍କ ଇନିଂସ୍ ଇତିହାସ ରଚିଦେଲା। ମାତ୍ର ୧୧ ବଲ୍ରେ ଅର୍ଦ୍ଧଶତକ ପୂରଣ କରି ସେ ଲିଷ୍ଟ A କ୍ରିକେଟ୍ର ସବୁଠାରୁ ଦ୍ରୁତତମ ଅର୍ଦ୍ଧଶତକର ରେକର୍ଡ ସ୍ଥାପନ କଲେ। ମ୍ୟାଚ୍ ପରେ ସେ ମାନିଥିଲେ ଯେ ଆରମ୍ଭରେ ସେ ଅଧିକ ଭାବି ନିଜ ସ୍ୱାଭାବିକ ଖେଳରୁ ଦୂରେଇଯାଇଥିଲେ। କିନ୍ତୁ କୋଚଙ୍କ ସରଳ ପରାମର୍ଶ ତାଙ୍କୁ ପୁଣି ମୁକ୍ତ କରିଦେଲା। ଶେଷରେ ବୈଭବ ସୂର୍ଯ୍ୟବଂଶୀଙ୍କ ଏହି ଇନିଂସ୍ ପ୍ରମାଣ କଲା ଯେ ଚାପ ଯେତେ ଥାଉ, ସ୍ୱାଭାବିକ ଖେଳ ଓ ଆତ୍ମବିଶ୍ୱାସ ଥିଲେ ମଇଦାନରେ ବଡ଼ ଇତିହାସ ଲେଖାଯାଇପାରେ।
