ଆୟରଲ୍ୟାଣ୍ଡ ବିପକ୍ଷରେ ନିରାଶାଜନକ ପରାଜୟ ପରେ ଇଂଲଣ୍ଡ ବିପକ୍ଷ ଟି-୨୦ ସିରିଜରେ ବିଜୟ ସହ ପୁନରାଗମନ କରିବାକୁ ଲକ୍ଷ୍ୟ ରଖିଛି ଟିମ୍ ଇଣ୍ଡିଆ। ଶ୍ରେୟସ ଆୟରଙ୍କ ଅଧିନାୟକତ୍ୱରେ ଭାରତୀୟ ଦଳ ଚେଷ୍ଟର-ଲେ-ଷ୍ଟ୍ରିଟରେ ବୁଧବାର ହେବାକୁ ଥିବା ପ୍ରଥମ ଟି-୨୦ ମ୍ୟାଚ୍ରୁ ବିଜୟ ଅଭିଯାନ ଆରମ୍ଭ କରିବାକୁ ଚାହୁଁଥିଲେ ମଧ୍ୟ ପାଗ ସମସ୍ତ ଯୋଜନାକୁ ଭଣ୍ଡୁର କରିପାରେ। ଆୟରଲ୍ୟାଣ୍ଡ ଗସ୍ତରେ ବର୍ଷା ଯେପରି ଭାରତୀୟ ଦଳ ପାଇଁ ସମସ୍ୟା ସୃଷ୍ଟି କରିଥିଲା, ସେହିଭଳି ଇଂଲଣ୍ଡ ବିପକ୍ଷରେ ମଧ୍ୟ ବର୍ଷା ମ୍ୟାଚ୍ର ରୋମାଞ୍ଚରେ ବାଧା ସୃଷ୍ଟି କରିପାରେ।
ପାଣିପାଗ ବିଭାଗର ପୂର୍ବାନୁମାନ ଅନୁସାରେ ଚେଷ୍ଟର-ଲେ-ଷ୍ଟ୍ରିଟରେ ଦିନସାରା ଆକାଶ ମେଘାଚ୍ଛନ୍ନ ରହିବ ଏବଂ ପ୍ରାୟ ୩୫ ପ୍ରତିଶତ ବର୍ଷାର ସମ୍ଭାବନା ରହିଛି। ସର୍ବାଧିକ ତାପମାତ୍ରା ୨୧ ଡିଗ୍ରୀ ସେଲସିୟସ୍ ରହିବାର ଆକଳନ କରାଯାଇଛି। ସ୍ଥାନୀୟ ସମୟ ଅପରାହ୍ନରୁ ସନ୍ଧ୍ୟା ପର୍ଯ୍ୟନ୍ତ ମଝିରେ ମଝିରେ ବର୍ଷା ହେବାର ସମ୍ଭାବନା ଥିବାରୁ ମ୍ୟାଚ୍ରେ ବାଧା ସୃଷ୍ଟି ହୋଇପାରେ। ଭାରତୀୟ ସମୟ ରାତି ୧୦ଟାରେ ମ୍ୟାଚ୍ ଆରମ୍ଭ ହେବାକୁ ଥିବାରୁ ବର୍ଷା ଯୋଗୁଁ ମ୍ୟାଚ୍ ବିଳମ୍ବ ହେବା କିମ୍ବା ଓଭର ସଂଖ୍ୟା କମିବାର ସମ୍ଭାବନା ମଧ୍ୟ ରହିଛି।
ଆୟରଲ୍ୟାଣ୍ଡ ବିପକ୍ଷ ସିରିଜ୍ରେ ହାରିବା ପରେ ଟିମ୍ ଇଣ୍ଡିଆ ଉପରେ ବିଜୟ ହାସଲ କରିବାର ଚାପ ରହିଛି। ତେଣୁ ପ୍ରଥମ ମ୍ୟାଚ୍ରେ ଭଲ ପ୍ରଦର୍ଶନ କରି ସିରିଜ୍ରେ ଅଗ୍ରଣୀ ହେବାକୁ ଭାରତ ଚାହୁଁଛି। ଅନ୍ୟପଟେ ଘରୋଇ ପରିବେଶର ଫାଇଦା ଉଠାଇ ହ୍ୟାରି ବ୍ରୁକଙ୍କ ନେତୃତ୍ୱାଧୀନ ଇଂଲଣ୍ଡ ଦଳ ମଧ୍ୟ ବିଜୟ ସହ ସିରିଜ୍ ଆରମ୍ଭ କରିବାକୁ ପ୍ରସ୍ତୁତ ରହିଛି।
ଏହାସହ ୧୫ ବର୍ଷୀୟ ବୈଭବ ସୂର୍ଯ୍ୟବଂଶୀଙ୍କ ସମ୍ଭାବ୍ୟ ଅନ୍ତର୍ଜାତୀୟ ଡେବ୍ୟୁକୁ ନେଇ ମଧ୍ୟ କ୍ରିକେଟ୍ ପ୍ରେମୀଙ୍କ ଉତ୍ସାହ ବଢ଼ିଛି। ତେବେ ସମସ୍ତଙ୍କ ନଜର ଏବେ ପାଗ ଉପରେ। ବର୍ଷା ଯଦି ଦୟା କରେ, ତେବେ ଭାରତ-ଇଂଲଣ୍ଡ ମଧ୍ୟରେ ଏକ ରୋମାଞ୍ଚକର ମୁକାବିଲା ଦେଖିବାକୁ ମିଳିବ।
