ରଣଜୀ ଟ୍ରଫିରେ ଇତିହାସ ରଚୁଛନ୍ତି ମିଜୋରାମ୍ର ବ୍ୟାଟର ଚିନ୍ମୟ ସୁତାର। ଗୋଟିଏ ପରେ ଗୋଟିଏ ବିସ୍ଫୋରକ ଇନିଂସ ଖେଳି କ୍ରିକେଟ୍ ଜଗତରେ ନିଜ ନାଁକୁ ଚର୍ଚ୍ଚାରେ ରଖିଛନ୍ତି ୨୯ ବର୍ଷୀୟ ଏହି ବ୍ୟାଟ୍ସମେନ । ମାତ୍ର ୪ଟି ପ୍ରଥମ ଶ୍ରେଣୀ ଇନିଂସରେ ୬୫୯ ରନ୍ ସଂଗ୍ରହ କରି ସେ ଭାଙ୍ଗିଛନ୍ତି ଅଷ୍ଟ୍ରେଲିଆର କିମ୍ବଦନ୍ତୀ ବ୍ୟାଟ୍ସମେନ ୱିଲ୍ ପୋନ୍ସଫୋର୍ଡଙ୍କ ୧୦୦ ବର୍ଷରୁ ଅଧିକ ପୁରୁଣା ରେକର୍ଡ । ପୋନ୍ସଫୋର୍ଡ ପ୍ରଥମ ୪ଟି ଇନିଂସରେ ୬୧୬ ରନ୍ କରିଥିବା ବେଳେ ଚିନ୍ମୟ ୬୫୯ ରନ୍ ସହ ନୂଆ ବିଶ୍ୱ କୀର୍ତ୍ତିମାନ ସ୍ଥାପନ କରିଛନ୍ତି।
ନିକଟରେ ନାଗାଲାଣ୍ଡ ବିପକ୍ଷରେ ଚିନ୍ମୟ ଖେଳିଥିଲେ ଅପରାଜିତ ୪୦୦ ରନ୍ର ଐତିହାସିକ ଇନିଂସ । ୫୧୭ଟି ବଲ୍ର ସମ୍ମୁଖୀନ ହୋଇ ୪୬ଟି ଚୌକା ଓ ୭ଟି ଛକା ବଳରେ ସେ ଏହି ବିଶାଳ ସ୍କୋର କରିଥିଲେ । ରଣଜୀ ଟ୍ରଫି ଇତିହାସରେ ଭାଉସାହେବ ନିମ୍ବାଳକରଙ୍କ ପରେ ଚତୁଃଶତକ ହାସଲ କରିବାରେ ସେ ଦ୍ୱିତୀୟ ଭାରତୀୟ । ଏଥିସହ ବିଶ୍ୱର ଦଶମ ବ୍ୟାଟ୍ସମେନ ଭାବେ ଏହି ଗୌରବ ଅର୍ଜନ କରିଛନ୍ତି ।
ତେବେ ଏହିଠାରେ ଅଟକି ନାହାନ୍ତି ଚିନ୍ମୟ । ମେଘାଳୟ ବିପକ୍ଷରେ ଆଉ ଏକ ଦମଦାର ଶତକ ହାସଲ କରି ୧୨୫ ରନ୍ର ଇନିଂସ ଖେଳିଛନ୍ତି । ଚଳିତ ସିଜନ୍ର ପ୍ରଥମ ମ୍ୟାଚ୍ରେ ୩୫ ଓ ୯୯ ରନ୍ କରିଥିବା ଚିନ୍ମୟ ପରବର୍ତ୍ତୀ ଦୁଇଟି ମ୍ୟାଚ୍ରେ ୪୦୦ ଓ ୧୨୫ ରନ୍ କରି ନିଜ ବ୍ୟାଟିଂ ଦକ୍ଷତାର ପରିଚୟ ଦେଇଛନ୍ତି । ପୂର୍ବରୁ ମୁମ୍ବାଇ ପକ୍ଷରୁ ଘରୋଇ କ୍ରିକେଟ୍ ଖେଳୁଥିବା ଚିନ୍ମୟଙ୍କୁ ନିୟମିତ ସୁଯୋଗ ମିଳୁନଥିଲା । ତେଣୁ ୨୦୨୬-୨୭ ସିଜନ୍ରେ ସେ ମିଜୋରାମ୍ରେ ଯୋଗ ଦେଇଥିଲେ । ଆଉ ନୂଆ ଦଳରେ ସୁଯୋଗ ପାଇବା ପରେ ନିଜ ବ୍ୟାଟ୍ରେ ରଚିଛନ୍ତି ନୂଆ ଇତିହାସ । ଚିନ୍ମୟଙ୍କ ଏହି ଅସାଧାରଣ ଫର୍ମ ଏବେ ଘରୋଇ କ୍ରିକେଟ୍ ଜଗତରେ ଚର୍ଚ୍ଚାର ବିଷୟ ପାଲଟିଛି ।
