ବିଶ୍ୱ ଟେଷ୍ଟ ଚାମ୍ପିୟନସିପରେ ଅଷ୍ଟ୍ରେଲିଆ ଠାରୁ ୨୦୯ ରନ୍ରେ ହାରିବା ପରେ ଅନେକ ସମାଲୋଚନାର ଶିକାର ହୋଇଛି ଟିମ୍ ଇଣ୍ଡିଆ । ଟିମ୍ ଇଣ୍ଡିଆ ହାରିବା ପରେ କାହିଁକି ରବିଚନ୍ଦ୍ରନ୍ ଅଶ୍ୱିନଙ୍କୁ ଫାଇନାଲ ଏକାଦଶରେ ସ୍ଥାନ ମିଳିଲା ନାହିଁ ତାହାକୁ ନେଇ ଅନେକ ଚର୍ଚ୍ଚା ଚାଲିଛି। ଅଶ୍ବିନଙ୍କୁ କାହିଁକି ଡବ୍ଲ୍ୟୁଟିସିରେ ସ୍ଥାନ ମିଳିଲା ନାହିଁ ତାହାକୁ ନେଇ ପ୍ରଶ୍ନ କରିଥିଲେ ସଚିନ ତେନ୍ଦୁଲକର । ଏବେ ନିଜେ ଅଶ୍ୱିନ ଏହି ପ୍ରସଙ୍ଗରେ ମୁହଁ ଖୋଲିଛନ୍ତି।
ବିଶ୍ବ ଟେଷ୍ଟ ଚାମ୍ପିଅନସିପରେ ରବିଚନ୍ଦ୍ରନ ଅଶ୍ବିନଙ୍କୁ ସ୍ଥାନ ନ ମିଳିବା ପରେ ଅନେକ ଚର୍ଚ୍ଚା ଚାଲିଥିଲା । ଏହା ପରେ ଟେଷ୍ଟ ବୋଲିଂ ର୍ୟାଙ୍କିଙ୍ଗ ୧ ନଂ ସ୍ଥାନ ହାସଲ କରିଛନ୍ତି ଅଶ୍ବିନ। ଟେଷ୍ଟ ର୍ୟାଙ୍କିଙ୍ଗରେ ତାଙ୍କ ସ୍କୋର ୮୬୦ ରହିଥିବା ବେଳେ ଦ୍ବିତୀୟ ସ୍ଥାନରେ ଜେମସ ଆଣ୍ଡରସନ ୮୫୦ ସ୍କୋର, ତୃତୀୟ ସ୍ଥାନରେ ପ୍ୟାଟ କେମିନ୍ସ ୮୨୯ ସ୍କୋର ରହିଛି ।
ଅଶ୍ବିନ କହିଛନ୍ତି, ବାଂଲାଦେଶ ଟୁରରେ ଆଣ୍ଠୁଜନିତ ସମସ୍ୟା ଯୋଗୁଁ ଅନେକ କଷ୍ଟ ଭୋଗିବାକୁ ପଡିଥିଲା । ତେଣୁ ସେଠାରୁ ଫେରିବା ପରେ ମୋ ପତ୍ନୀଙ୍କୁ କହିଥିଲି, ଅଷ୍ଟ୍ରେଲିଆ ସିରିଜ ମୋର ଶେଷ ସିରିଜ୍ ହୋଇପାରେ । ତେଣୁ ଟି-୨୦ ବିଶ୍ବକପରେ ମୁଁ ଭଲ ପ୍ରଦର୍ଶନ କରିନଥିଲି । ଆଉ ମୋ ପ୍ରଦର୍ଶନକୁ ନେଇ ମଧ୍ୟ ମୁଁ ଖୁସି ନଥିଲି । ବାଂଲାଦେଶ ବିପକ୍ଷ ଦ୍ବିତୀୟ ଟେଷ୍ଟରେ ଯନ୍ତ୍ରଣା ଅଧିକ ବଢିଯାଇଥିଲା ।
ସୂଚନାଯୋଗ୍ୟ, ୨୦୨୧ ମସିହାରେ ଇଂଲଣ୍ଡରେ ଖେଳାଯାଇଥିବା ଡବ୍ଲ୍ୟୁଟିସ ଫାଇନାଲରେ ନ୍ୟୁଜିଲାଣ୍ଡ ବିପକ୍ଷରେ କେବଳ ଅଶ୍ୱିନ ଏକମାତ୍ର ପ୍ରଭାବଶାଳୀ ବୋଲର ବୋଲି ପ୍ରମାଣିତ ହୋଇଥିଲେ। ଏଥିସହ ସେ ଚାରିଟି ୱିକେଟ୍ ନେଇଥିଲେ । ସେ ଆହୁରି ମଧ୍ୟ କହିଛନ୍ତି, ନିଶ୍ଚିତ ଭାବେ ଡବ୍ଲ୍ୟୁଟିସ ଫାଇନାଲ୍ ମ୍ୟାଚରେ ଖେଳିବାକୁ ଚାହୁଁଥିଲି । କାରଣ ଦଳକୁ ଏଠାକୁ ଆଣିବାରେ ମଧ୍ୟ ମୁଁ ସହଯୋଗ କରିଛି। ମୁଁ ମଧ୍ୟ ଶେଷ ଫାଇନାଲରେ ଚାରିଟି ୱିକେଟ୍ ନେଇଥିଲି। ମ୍ୟାଚ୍ ଆରମ୍ଭ ହେବାର ୪୮ ଘଣ୍ଟା ପୂର୍ବରୁ, ମୁଁ ଜାଣିଥିଲି ଯେ ମୁଁ ଖେଳିବାର ସୁଯୋଗ ପାଇବି ନାହିଁ।
