ନୂଆଦିଲ୍ଲୀ: ଟିମ୍ ଇଣ୍ଡିଆର ବାମହାତୀ ଷ୍ଟାର ଓପନର ଶିଖର ଧାୱନ୍ ଗତ ଗୋଟିଏ ବର୍ଷ ହେଲା ଦଳଠୁ ଦୂରରେ ରହିଛନ୍ତି । ଗତବର୍ଷ ବାଂଲାଦେଶ ବିପକ୍ଷରେ ନିଜର ଶେଷ ମ୍ୟାଚ୍ ଖେଳିଥିବାବେଳେ, ଆଇପିଏଲରେ ବି ତାଙ୍କ ଦଳ ପଞ୍ଜାବ କିଙ୍ଗସ୍ ସେମିତି କିଛି ଚମତ୍କାର କରିପାରିନଥିଲା । ତେବେ ଶିଖର ଧାୱନଙ୍କୁ ନେଇ ଏବେ ଆସିଛି ବଡ ଖବର । ଖୁବଶୀଘ୍ର ସେ ଟିମ୍ ଇଣ୍ଡିଆକୁ ରିଟର୍ଣ୍ଣ କରିବା ସହିତ ବଡ ଟୁର୍ଣ୍ଣାମେଣ୍ଟରେ ଦଳର ମଙ୍ଗ ଧରିପାରନ୍ତି ବୋଲି ସୂଚନା ମିଳୁଛି ।
ଚଳିତ ବର୍ଷ ଚୀନରେ ଏସିଆନ୍ ଗେମ୍ସର ଆୟୋଜନ ହେବାକୁ ଯାଉଅଛି । ଅକ୍ଟୋବର ୫ ତାରିଖରୁ ନଭେମ୍ବର ୧୯ ତାରିଖ ପର୍ୟ୍ୟନ୍ତ ଖେଳାଯିବାକୁ ଥିବା ଏହି ବଡ ଖେଳ ଇଭେଣ୍ଟରେ ଟିମ୍ ଇଣ୍ଡିଆର ଉଭୟ ପୁରୁଷ ଓ ମହିଳା କ୍ରିକେଟ୍ ଟିମ୍ ସାମିଲ ହେବେ । ବିସିସିଆଇ ଏହି ଟୁର୍ଣ୍ଣାମେଣ୍ଟ ପାଇଁ ଶିଖର ଧାୱନଙ୍କୁ କ୍ୟାପଟେନ୍ କରିବା ସହିତ ଏନସିଏ ଚିଫ୍ ଭିଭିଏସ୍ ଲକ୍ଷ୍ମଣଙ୍କୁ କୋଚିଂ ଦାୟିତ୍ୱ ଦେଇପାରେ । ଜୁଲାଇ ୭ ତାରିଖରେ ବିସିସିଆଇ ଏନେଇ ଚୂଡାନ୍ତ ନିଷ୍ପତ୍ତି ଗ୍ରହଣ କରିପାରେ ବୋଲି ଜଣାପଡିଛି । ତେବେ ଖାଲି ଶିଖର ଧାୱନ ନୁହଁନ୍ତି ଋତୁରାଜ ଗାଏକ୍ୱାଡ ଏବଂ ଜଶସ୍ୱୀ ଜୟସୱାଲଙ୍କ ଭଳି ଖେଳାଳି ମଧ୍ୟ ଏହି ବଡ ସ୍ପୋର୍ଟସ୍ ଇଭେଣ୍ଟରେ ସାମିଲ ହେଇପାରନ୍ତି ବୋଲି କୁହାଯାଉଛି ।
ଏସିଆନ୍ ଗେମ୍ସରେ ତୃତୀୟ ଥର ପାଇଁ କ୍ରିକେଟକୁ ସାମିଲ କରାଯାଇଛି । ତେବେ ପୂର୍ବରୁ ବିସିସିଆଇ କିନ୍ତୁ ଏହି ସ୍ପୋର୍ଟସ ଇଭେଣ୍ଟକୁ ନିଜର କ୍ରିକେଟ୍ ଟିମ୍ ପଠାଇ ନଥିଲା । ୨୦୧୦ରେ ବାଂଲାଦେଶ ଏବଂ ପାକିସ୍ତାନ ଯଥାକ୍ରମେ ପୁରୁଷ ଏବଂ ମହିଳା ବର୍ଗରେ ସ୍ୱର୍ଣ୍ଣପଦକ ଜିତିଥିଲେ । ସେହିପରି ୨୦୧୪ରେ ଖେଳାଯାଇଥିବା ଏସିଆନ୍ ଗେମ୍ସରେ ଶ୍ରୀଲଙ୍କା ଏବଂ ପାକିସ୍ତାନ ଯଥାକ୍ରମେ ପୁରୁଷ ଏବଂ ମହିଳା ବର୍ଗରେ ସ୍ୱର୍ଣ୍ଣପଦକ ଜିତିଥିଲେ ।
