ନୂଆଦିଲ୍ଲୀ: ଭାରତୀୟ ବ୍ୟାଡମିଣ୍ଟନ ତାରକା ଲକ୍ଷ୍ୟ ସେନ୍ଙ୍କ ଅଲ ଇଂଲଣ୍ଡ ସୁପର ୧୦୦ ବ୍ୟାଡମିଣ୍ଟନ ଟାଇଟଲ ହାସଲର ସ୍ୱପ୍ନ ମଉଳି ଯାଇଛି । ଲକ୍ଷ୍ୟ ସେନ ରବିବାର ଅନୁଷ୍ଠିତ ପୁରୁଷ ସିଙ୍ଗଲ୍ସ ଫାଇନାଲ୍ ରେ ଟପ୍ ସିଡ୍ ଡେନ୍ମାର୍କର ଭିକ୍ଟର ଆକ୍ସେଲସେନଙ୍କ ଠାରୁ ହାରି ଯାଇଥିଲେ । ତେବେ ଏକ ସପ୍ତାହ ପୂର୍ବରୁ ଅନୁଷ୍ଠିତ ହୋଇଥିବା ଜର୍ମାନ ଓପନରେ ଲକ୍ଷ୍ୟ ,ଭିକ୍ଟରଙ୍କୁ ହରାଇଥିଲେ । ହେଲେ ବର୍ମିଂହାମ୍ରେ ସେ ଭିକ୍ଟରଙ୍କୁ ଟକ୍କର ଦେଇପାରି ନଥିଲେ । ଏହି ମ୍ୟାଚରେ ଭିକ୍ଟର ସହଜରେ ଜିତି ଯାଇଥିଲେ ଏବଂ ଚାମ୍ପିୟନ ଆଖ୍ୟା ଅର୍ଜନ କରିପାରିଥିଲେ ।
ଲକ୍ଷ୍ୟ ସେମିଫାଇନାଲରେ ମାଲେସିଆର ଲିଜି ଜିଆଙ୍କୁ ହରାଇବା ପରେ ଭାରତୀୟ ଶିବିରରେ ଆନନ୍ଦ ଖେଳି ଯାଇଥିଲା । ସେ ଲିଜି ଜିଆଙ୍କୁ ୨୧-୧୩,୧୨-୨୧,୨୧-୧୯ ଗେମ୍ରେ ହରାଇଥିଲେ । ଲି ହେଉଛନ୍ତି ଡିଫେଣ୍ଡିଂ ଚାମ୍ପିଅନ୍ । ଭାରତର ପଞ୍ଚମ ଖେଳାଳି ଭାବରେ ଲକ୍ଷ୍ୟ ଅଲ୍ ଇଂଲଣ୍ଡ ବ୍ୟାଡମମିଣ୍ଟନ ଫାଇନାଲରେ ପ୍ରବେଶ କରିଥିଲେ । ସେ ଭିକ୍ଟରଙ୍କୁ ହରାଇ ତୃତୀୟ ଭାରତୀୟ ଭାବେ ଟାଇଟଲ ଜିତିବା ଆଶା ରଖିଥିଲେ ।
ଲକ୍ଷ୍ୟଙ୍କ ପୂର୍ବରୁ ୧୯୪୭ରେ ପ୍ରକାଶନାଥ ପ୍ରଥମ ଭାରତୀୟ ଭାବେ ଅଲ୍ ଇଂଲଣ୍ଡ ବ୍ୟାଡମିଣ୍ଟନ୍ ଫାଇନାଲରେ ପ୍ରବେଶ କରିଥିଲେ । ପ୍ରକାଶ ପାଦୁକୋନ ୧୯୮୦ରେ ପ୍ରଥମ ଭାରତୀୟ ଭାବେ ଅଲ୍ ଇଂଲଣ୍ଡ ଚାମ୍ପିୟନ୍ ଆଖ୍ୟା ଅର୍ଜନ କରିଥିଲେ । ୨୦୦୧ରେ ପୁଲେଲା ଗୋପିଚାନ୍ଦ ଚାମ୍ପିୟନ୍ ହୋଇଥିଲେ । ସେହିପରି ମହିଳା ବ୍ୟାଡମିଣ୍ଟନରେ ସାଇନା ନେହଓଲ ୨୦୧୫ରେ ଅଲ୍ ଇଂଲଣ୍ଡ ଚାମ୍ପିୟନ୍ ଫାଇନାଲରେ ପ୍ରବେଶ କରିଥିଲେ ହେଲେ ଟାଇଟଲ ଜିତିପାରି ନ ଥିଲେ । ତେବେ ଲକ୍ଷ୍ୟ ଦୀର୍ଘ ୨୧ବର୍ଷର ପ୍ରତୀକ୍ଷା ପୂରଣ କରିବେ ବୋଲି ଆଶା କରାଯାଉଥିଲା । ଆକ୍ସେଲସେନ ଭିକ୍ଟର ଗତ ଜର୍ମାନ ଓପନରେ ହୋଇଥିବା ପରାଜୟର ପ୍ରତିଶୋଧ ଲକ୍ଷ ନେଇ ମଇଦାନକୁ ଓହ୍ଲାଇଥିଲେ । ଗେମ୍ ଆରମ୍ଭରୁ ଶେଷ ପଯ୍ୟନ୍ତ ଆକ୍ସେଲସେନଙ୍କ ପକ୍ଷରେ ମ୍ୟାଚ ଥିଲା ।
