କୁସ୍ତିଯୋଦ୍ଧାଙ୍କ ମହମବତି ଶୋଭାଯାତ୍ରା

ନୂଆଦିଲ୍ଲୀ: ଯୌନ ନିର୍ଯ୍ୟାତନା ମାମଲାକୁ ନେଇ କୁସ୍ତିଯୋଦ୍ଧାମାନେ ଚଲାଇଥିବା ଆନ୍ଦୋଳନକୁ ମାସେ ପୂରିଲାଣି । ପ୍ରବଳ ଖରା ସତ୍ତ୍ବେ କୁସ୍ତିଯୋଦ୍ଧାମାନଙ୍କ ଆନ୍ଦୋଳନ ଜାରି ରହିଛି । ଭାରତୀୟ କୁସ୍ତି ମହାସଂଘ ସଭାପତି ବ୍ରିଜଭୂଷଣ ଶରଣ ସିଂଙ୍କ ଇସ୍ତଫା ଓ ଗିରଫ ଦାବି କୁ ନେଇ ଆନ୍ଦୋଳନରତ କୁସ୍ତିଯୋଦ୍ଧାମାନେ ହଜାର ହଜାର ସମର୍ଥକଙ୍କ ଗହଣରେ ନୂଆଦିଲ୍ଲୀସ୍ଥିତ ଇଣ୍ଡିଆ ଗେଟ୍ ଆଗରେ ମହମବତି ଶୋଭାଯାତ୍ରା କରିଛନ୍ତି। ଏହି ଯାତ୍ରାରେ ହରିୟାଣା ଓ ପଞ୍ଜାବର ଅନେକ କୃଷକ ସାମିଲ ଥିଲେ। ଆନ୍ଦୋଳନକାରୀମାନେ ହାତରେ ଜାତୀୟ ପତାକା ଓ ମହମବତି ଧରି ଯାତ୍ରା କରିଥିଲା ବେଳେ ଭିଡ଼ ନିୟନ୍ତ୍ରଣ ପାଇଁ ବ୍ୟାପକ ପୁଲିସ୍ ଫୋର୍ସ ମୁତୟନ ହୋଇଥିଲେ। ତେବେ ଦିଲ୍ଲୀ ପୁଲିସ ଏ ମାମଲାର ତଦନ୍ତ କରୁଥିବା ବେଳେ ଶାସକ ଦଳ ନିରବତା ଅବଲମ୍ବନ କରୁଛି। କୁସ୍ତିଯୋଦ୍ଧାଙ୍କ ଏହି ଆନ୍ଦୋଳନ ୨୦୧୮ ମସିହାରେ ହୋଇଥିବା ‘ମି ଠୁ’ ଅଭିଯାନର ପୁନରାବୃତ୍ତି କରିବା ଭଳି ମନେହେଉଛି।