(ଓଡିଶା ସ୍ପୋର୍ଟ): ଆଇସିସି କ୍ରିକେଟ ଟିମର ନୂଆ ନିୟମ । ଧିମା ଓଭର ରେଟ ପାଇଁ ଏବେ କେବଳ ଅଧିନାୟକ ଦାୟୀ ହେବେ ନାହିଁ, ଦାୟୀ ରହିବେ ପୁରା ପ୍ଲେଇଂ ଇଲେଭେନ୍। ଏଭଳି କିଛି ଅପରାଧ ପାଇଁ ପୁରା ପ୍ଲେଇଂ ଇଲେଭେନର ଅଙ୍କ କାଟିବା ଏବଂ ଦଣ୍ଡ ଦେବା ପାଇଁ ନିଷ୍ପତ୍ତି ନେଇଛି । ଆଗାମୀ ବିଶ୍ୱ ଟେଷ୍ଟ ଚାମ୍ପିୟନସିପରୁ ଏହାର ଆରମ୍ଭ ହୋଇଯିବ । ଆଇସିସି କ୍ରିକେଟ ସମିତିର ପ୍ରସ୍ତାବକୁ ତାର ବୋର୍ଡ ମଞ୍ଜୁରୀ ଦେଇସାରିଛି ।
ବିଶ୍ୱ ଟେଷ୍ଟ ଚାମ୍ପିୟନସିପ୍ ୨୦୧୯ ରୁ ୨୦୨୧ ପର୍ୟ୍ୟନ୍ତ ଚାଲିବ । ଆସନ୍ତା ଅଗଷ୍ଟ ୧ ତାରିଖରୁ ହେବାକୁ ଥିବା ଆସେସ୍ ସିରିଜରୁ ଆରମ୍ଭ ହେବ । ଆଇସିସି ଏହା ଜାରି କରିଛି, ବିଶ୍ୱ ଟେଷ୍ଟ ଚାମ୍ପିୟନସିପ୍ ମ୍ୟାଚରେ ଯଦି କୌଣସି ଦଳ ନିର୍ଦ୍ଧାରିତ ସମୟରେ ଓଭର ପୁରା କରିପାରିବେ ନାହିଁ ତେବେ ପ୍ରତ୍ୟେକ ଓଭର ବଦଳରେ ତାର ଦୁଇ ପ୍ରତିଯୋଗିତା ଅଙ୍କ କଟାଯିବ ।
ଏଥିରେ କୁହାଯାଇଛି ଯେ, ଅଧିନାୟକଙ୍କୁ ଏବେ ନିଲମ୍ୱନ ହେବାକୁ ପଡିବ ନାହିଁ । ସମସ୍ତ ଖେଳାଳି ଏଥିପାଇଁ ସମାନ ଭାବେ ଦାୟୀ ରହିବେ ଏବଂ ସମାନ ଦଣ୍ଡ ମିଳିବ । ପୂର୍ବ ନିୟନ ଅନୁଯାୟୀ ଗୋଟିଏ ବର୍ଷରେ ଦୁଇଥର ଧିମା ଓଭର ରେଟ ଅପରାଧ ହେଲେ ଅଧିନାୟକଙ୍କୁ ନିଳମ୍ୱିତ କରିଦିଆଯାଇଥାଏ ।
