New Delhi: ଟ୍ୱେଣ୍ଟି-୨୦ ବିଶ୍ୱକପ୍ ଜିତିବା ପରେ ଭାରତୀୟ ଦଳକୁ ବଡ଼ ପୁରସ୍କାର ଦେବାକୁ ଯାଉଛି ବିସିସିଆଇ। ବୋର୍ଡ ପକ୍ଷରୁ ବିଶ୍ୱକପ୍ ବିଜୟୀ ଭାରତୀୟ ଦଳ ପାଇଁ ମୋଟ ୧୩୧ କୋଟି ଟଙ୍କାର ଆର୍ଥିକ ପୁରସ୍କାର ଘୋଷଣା କରାଯାଇଛି। ଏହି ପୁରସ୍କାର ରାଶିକୁ ଭାରତୀୟ ଦଳର ଖେଳାଳି, ପ୍ରଶିକ୍ଷଣ ଦଳ ଏବଂ ସହାୟକ କର୍ମଚାରୀମାନଙ୍କ ମଧ୍ୟରେ ବଣ୍ଟନ କରାଯିବ। ବିସିସିଆଇ ପକ୍ଷରୁ ଏପର୍ଯ୍ୟନ୍ତ ଘୋଷିତ ସବୁଠାରୁ ବଡ଼ ଆର୍ଥିକ ପୁରସ୍କାର ମଧ୍ୟରୁ ଏହା ଗୋଟିଏ ବୋଲି କୁହାଯାଉଛି। ଏହା ପୂର୍ବରୁ ୨୦୨୪ ଟ୍ୱେଣ୍ଟି-୨୦ ବିଶ୍ୱକପ୍ ବିଜୟୀ ଭାରତୀୟ ଦଳକୁ ବିସିସିଆଇ ୧୨୫ କୋଟି ଟଙ୍କାର ପୁରସ୍କାର ପ୍ରଦାନ କରିଥିଲା। ସେହିପରି ଗତ ବର୍ଷ ଦିନିକିଆ ବିଶ୍ୱକପ୍ ଜିତିଥିବା ଭାରତୀୟ ବରିଷ୍ଠ ମହିଳା କ୍ରିକେଟ୍ ଦଳକୁ ବୋର୍ଡ ପକ୍ଷରୁ ୫୧ କୋଟି ଟଙ୍କା ଦିଆଯାଇଥିଲା। ଚାମ୍ପିୟନ୍ସ ଟ୍ରଫି ଜିତିଥିବା ଭାରତୀୟ ବରିଷ୍ଠ ପୁରୁଷ ଦଳକୁ ମଧ୍ୟ ବିସିସିଆଇ ୫୮ କୋଟି ଟଙ୍କା ପୁରସ୍କାର ଘୋଷଣା କରିଥିଲା।
ଆସନ୍ତା ୧୫ ତାରିଖରେ ନୂଆଦିଲ୍ଲୀରେ ଆୟୋଜିତ ହେବାକୁ ଥିବା ବିସିସିଆଇ ବାର୍ଷିକ ପୁରସ୍କାର ସମାରୋହରେ ବିଶ୍ୱକପ୍ ବିଜୟୀ ଭାରତୀୟ ଦଳକୁ ଔପଚାରିକ ଭାବେ ସମ୍ମାନିତ କରାଯିବ। ଏହା ସହିତ ଗତ ଏକ ବର୍ଷ ମଧ୍ୟରେ ଆଇସିସି ଟ୍ରଫି ଜିତିଥିବା ଭାରତୀୟ ବରିଷ୍ଠ ମହିଳା ଦଳ, ୧୯ ବର୍ଷରୁ କମ ପୁରୁଷ ଓ ମହିଳା ଦଳକୁ ମଧ୍ୟ ସମ୍ମାନିତ କରାଯିବ। ବିସିସିଆଇ ସଚିବ ଦେବଜିତ ସାଇକିଆ କହିଛନ୍ତି ଯେ ଏହି ପୁରସ୍କାର ସମାରୋହରେ ବିଭିନ୍ନ ଫର୍ମାଟ୍ ଓ ବୟସ ଶ୍ରେଣୀରେ ଆଇସିସି ଟ୍ରଫି ଜିତିଥିବା ଭାରତୀୟ ଦଳର ସମସ୍ତ ସଦସ୍ୟ, ପ୍ରଶିକ୍ଷକ ଏବଂ ସହାୟକ କର୍ମଚାରୀମାନଙ୍କୁ ସମ୍ମାନିତ କରାଯିବ।
ଗତ ଏକ ବର୍ଷ ମଧ୍ୟରେ ଭାରତ ବିଭିନ୍ନ ଫର୍ମାଟ୍ ଓ ବୟସ ଶ୍ରେଣୀରେ ମୋଟ ପାଞ୍ଚଟି ଆଇସିସି ଟ୍ରଫି ଜିତିଛି। ନିକଟରେ ଭାରତୀୟ ବରିଷ୍ଠ ପୁରୁଷ ଦଳ ଟ୍ୱେଣ୍ଟି-୨୦ ବିଶ୍ୱକପ୍ ଜିତିଥିବାବେଳେ, ଗତ ଜାନୁଆରି-ଫେବ୍ରୁଆରିରେ ଜିମ୍ବାୱେରେ ଆୟୋଜିତ ୧୯ ବର୍ଷରୁ କମ ପୁରୁଷ ବିଶ୍ୱକପ୍ ମଧ୍ୟ ଭାରତ ଜିତିଥିଲା। ସେହିପରି ଗତ ବର୍ଷ ଭାରତୀୟ ବରିଷ୍ଠ ମହିଳା ଦଳ ଦିନିକିଆ ବିଶ୍ୱକପ୍ ଜିତିଥିବାବେଳେ, ୧୯ ବର୍ଷରୁ କମ ମହିଳା ଦଳ ଟ୍ୱେଣ୍ଟି-୨୦ ବିଶ୍ୱକପ୍ ଜିତିଥିଲା। ଏହା ସହିତ ଭାରତୀୟ ବରିଷ୍ଠ ପୁରୁଷ ଦଳ ଚାମ୍ପିୟନ୍ସ ଟ୍ରଫି ମଧ୍ୟ ଜିତିଥିଲା। ଏହି ସଫଳତା ଭାରତୀୟ କ୍ରିକେଟ୍ର ସଶକ୍ତ ପ୍ରଦର୍ଶନକୁ ପ୍ରତିଫଳିତ କରୁଛି ଏବଂ ବିଭିନ୍ନ ଶ୍ରେଣୀରେ ଭାରତୀୟ ଦଳର ଦମଦାର ଦାବିକୁ ସ୍ପଷ୍ଟ କରୁଛି।
