ପ୍ୟାରିସ୍ ପାରାଲିମ୍ପିକ୍ସରେ ଚମକିଲା ଭାରତ। ଦ୍ଵିତୀୟ ଦିନରେ ଦୁଇ ଦୁଇଟି ପଦକ ନିଜ ନାଁରେ କରିଛି ଭାରତ। ପ୍ୟାରିସ୍ ପାରାଅଲିମ୍ପିକ୍ସ ୨୦୨୪ରେ ଭାରତୀୟ ସୁଟର ଅଭନି ଲେଖରା କରିଛନ୍ତି କମାଲ । ଅଭନି ମହିଳାଙ୍କ ୧୦ ମିଟର ଏୟାର ରାଇଫଲ (SH 1) ପ୍ରତିଯୋଗିତାରେ ସ୍ୱର୍ଣ୍ଣ ପଦକ ଜିତିଛନ୍ତି । ଅଭନି ପାରାଅଲିମ୍ପିକ୍ସ ରେକର୍ଡ ସହ ସ୍ୱର୍ଣ୍ଣ ପଦକ ନିଜ ନାଁରେ କରିଛନ୍ତି । ଏହି ପ୍ରତିଯୋଗିତାରେ ଭାରତର ମୋନା ଅଗ୍ରୱାଲ କାଂସ୍ୟ ପଦକ ଜିତିଛନ୍ତି । ଏହି ଦୁଇ ପଦକ ସହ ଚଳିତ ପାରାଅଲିମ୍ପିକ୍ସରେ ଭାରତର ଖାତା ଖୋଲିଛି । ଭାରତ ପାଖରେ ଗୋଟିଏ ସ୍ୱର୍ଣ୍ଣ ଏବଂ ଗୋଟିଏ ବ୍ରୋଞ୍ଜ ପଦକ ରହିଛି ।
୨୨ ବର୍ଷୀୟ ଅଭନି ଫାଇନାଲରେ ୨୪୯.୭ ଅଙ୍କ ହାସଲ କରିଥିଲେ, ଯାହା ପାରାଅଲିମ୍ପିକ୍ସର ରେକର୍ଡ । ବ୍ରୋଞ୍ଜ ବିଜେତା ମୋନା ୨୨୮.୭ ଅଙ୍କ ସ୍କୋର କରିଥିଲେ । ଅଭନି ଟୋକିଓ ପାରାଅଲିମ୍ପିକ୍ସ (୨୦୨୦)ରେ ମଧ୍ୟ ସମାନ ପ୍ରତିଯୋଗିତାରେ ସ୍ୱର୍ଣ୍ଣ ଜିତିଥିଲେ । ଏବେ ସେ ନିଜ ଟାଇଟଲ୍ ବଜାୟ ରଖିବାରେ ସଫଳ ହୋଇଛନ୍ତି ।
