ଏମ୍ଓଏସ୍ଏଫ୍ ଆଇଟା-ଓଟିଏ ଟେନିସରେ କବୀର ହଂସଙ୍କୁ ଦ୍ବିମୁକୁଟ

ଭୁବନେଶ୍ୱର:ଆଇଟା ଓ ଓଟିଏ ଆନୁକୂଲ୍ୟରେ ଭୁବନେଶ୍ୱରରେ ଥିବା ଗୁରୁକୂଳ ଟେନିସ ଏକାଡେମୀରେ ୧୦ ତାରିଖରୁ ଆରମ୍ଭ ହୋଇଥିବା ଏମ୍ଓଏସ୍ଏଫ୍ ଆଇଟା-ଓଟିଏ ପୁରୁଷ ୧ ଲକ୍ଷ ଚାମ୍ପିଅନ୍ସିପ୍ ଶୁକ୍ରବାର ଉଦ୍ୟାପିତ ହୋଇଯାଇଛି। ତେବେ ଏଥିରେ କିଟ୍ ଛାତ୍ର କବୀର ହଂସ ଦ୍ବିମୁକୁଟ ହାସଲ କରିଛନ୍ତି। ସେ ଉଭୟ ପୁରୁଷ ଏକକ ଓ ଯୁଗଳ ବର୍ଗରେ ଟ୍ରଫି କରାୟତ କରିଛନ୍ତି। ତେବେ ଶୁକ୍ରବାର ଏହି ପ୍ରତିଯୋଗୀତାର ଅନ୍ତିମ ଦିନ ହୋଇଥିବା ବେଳେ ପୁରୁଷ ଏକକ ଫାଇନାଲରେ ମଧ୍ୟପ୍ରଦେଶର ୟାଶ୍ ଯାଦବଙ୍କୁ ୬-୧ ଓ ୬-୧ ସିଧାସଳଖ ସେଟ୍ରେ ପରାସ୍ତ କରି ବିଜେତା ହୋଇଥିଲେ କବୀର । ଏହି ବିଜୟ ବଳରେ କବୀର ମଧ୍ୟ ଏକକ ବର୍ଗରେ ସର୍ବଭାରତୀୟ ର୍ୟାଙ୍କିଙ୍ଗ୍ରେ ୧୬ତମ ସ୍ଥାନକୁ ଉନ୍ନୀତ ହୋଇଛନ୍ତି। ସେହିପରି ପୁରୁଷ ଯୁଗଳ ଫାଇନାଲ୍ରେ କବୀର ଓ ତାଙ୍କ ସାଥୀ ଅଭିବୀର ସେଖାୱତ୍ ୬-୦, ୪-୬ ଓ ୧୦-୬ ସେଟ୍ରେ ଓଡ଼ିଶା ଯୋଡ଼ି ସତୀର୍ଥ ପଟ୍ଟନାୟକ ଓ ଆଦିତ୍ୟ ଶତପଥୀଙ୍କୁ ହରାଇ ଟ୍ରଫି ନିଜ ନାମରେ କରିଛନ୍ତି। କବୀରଙ୍କ ଏହି ସଫଳତା ପାଇଁ କିଟ୍ ଓ କିସ୍ର ପ୍ରତିଷ୍ଠାତା ଅଚ୍ୟୁତ ସାମନ୍ତ ଅଭିନନ୍ଦନ ଜଣାଇଛନ୍ତି। ଅନ୍ୟପକ୍ଷରେ ନିଜର ଟେନିସ୍ ଯାତ୍ରାରେ ସମସ୍ତ ସମର୍ଥନ ଓ ସହଯୋଗ ଯୋଗାଇ ଦେଇଥିବାରୁ ଅତ୍ୟୁତ ସାମନ୍ତଙ୍କୁ ଧନ୍ୟବାଦ ଜଣାଇଥିଲେ କବୀର ।