ନାନୋଇଙ୍କୁ ରୌପ୍ୟ, ରୋଜି, ଅର୍ଶୀଙ୍କୁ କାଂସ୍ୟ

ଭୁବନେଶ୍ୱର: ଗୋଆରେ ଚାଲିଥିବା ୩୭ତମ ଜାତୀୟ କ୍ରୀଡ଼ାରେ ମଙ୍ଗଳବାର ଓଡ଼ିଶାକୁ ଗୋଟିଏ ରୌପ୍ୟ ଓ ଦୁଇଟି କାଂସ୍ୟ ମିଳିଛି। ଫଳରେ ଏହି ପ୍ରତିଯୋଗିତାରେ ଓଡ଼ିଶାର ପଦକ ସଂଖ୍ୟା ୪୮ରେ (୯ ସ୍ବର୍ଣ୍ଣ, ୧୪ ରୌପ୍ୟ, ୨୫ କାଂସ୍ୟ) ପହଞ୍ଚିଛି। ଏହି ୩ଟି ଯାକ ପଦକ କାନୋଇଂରୁ ଆସିଛି। କାନୋଇଂ ସ୍ପ୍ରିଣ୍ଟ୍ସ୍ କେ-୧ ୨୦୦ ମିଟର ପୁରୁଷରେ ମାନୋଇ ମୈତେଇ ରୌପ୍ୟ ଜିତିଥିଲା ବେଳେ ଏହି ବର୍ଗ ମହିଳାରେ ପି ରୋଜି ଦେବୀ ଏବଂ ସି୧ କାନୋଇ ସ୍ଲାଲୋମରେ ସ୍ଲାମ ଅର୍ଶୀ ଦେବୀ କାଂସ୍ୟ ପାଇଛନ୍ତି।
ଅନ୍ୟପକ୍ଷରେ ଓଡ଼ିଶା ପୁରୁଷ ଓ ମହିଳା ଖୋ ଖୋ ଦଳ ଫାଇନାଲ୍ରେ ପହଞ୍ଚି ଦୁଇଟି ପଦକ ନିଶ୍ଚିତ କରିଛନ୍ତି। ସେମିଫାଇନାଲ୍ରେ ପୁରୁଷ ଦଳ ୪୪-୪୨ରେ ଆନ୍ଧ୍ରପ୍ରଦେଶକୁ ଏବଂ ମହିଳା ଦଳ ୬୪-୩୦ରେ କେରଳକୁ ପରାସ୍ତ କରିଛନ୍ତି। ଫାଇନାଲ୍ରେ ଉଭୟ ଦଳ ମହାରାଷ୍ଟ୍ରକୁ ଭେଟୁଛନ୍ତି। ସେମିଫାଇନାଲ୍ରେ ମହାରାଷ୍ଟ୍ରର ପୁରୁଷ ଦଳ ୬୪-୨୪ରେ କେରଳକୁ ଏବଂ ମହିଳା ଦଳ ୫୪-୩୦ରେ କର୍ଣ୍ଣାଟକକୁ ହରାଇଥିଲା। ଆଗାମୀ ଜାତୀୟ କ୍ରୀଡ଼ାର ୩୮ତମ ସଂସ୍କରଣ ଆସନ୍ତା ବର୍ଷ ଅକ୍ଟୋବର-ନଭେମ୍ବରରେ ଉତ୍ତରାଖଣ୍ଡରେ ଆୟୋଜିତ ହେବ। ଚଳିତ ସଂସ୍କରଣର ଉଦ୍ୟାପନୀ ଦିବସ (୯ ତାରିଖ)ରେ ଜାତୀୟ କ୍ରୀଡ଼ା ପତାକା ଉତ୍ତରାଖଣ୍ଡକୁ ହସ୍ତାନ୍ତର କରାଯିବ।