(ଓଡିଶା ସ୍ପୋର୍ଟ): ପୁରୁଷଙ୍କ ଭଳି ଭାରତୀୟ ମହିଳା ଦଳ ମଧ୍ୟ ଘରୋଇ ନ୍ୟୁଜିଲ୍ୟାଣ୍ଡ ମହିଳା ଦଳଠାରୁ ପ୍ରଥମ ଟି-୨୦ ମ୍ୟାଚରେ ପରାସ୍ତ ହୋଇଛି। ନ୍ୟୁଜିଲ୍ୟାଣ୍ଡ ମହିଳା ଦଳ ଦେଇଥିବା ୧୬୦ ରନ୍ ଟାର୍ଗେଟର ପିଛା କରୁଥିବା ହରମନପ୍ରୀତ କୌରଙ୍କ ଭାରତୀୟ ମହିଳା ଦଳ ମାତ୍ର ୧୩୬ ରନ୍ରେ ଅଲଆଉଟ ହୋଇଯାଇଛି। ଫଳରେ ନ୍ୟୁଜିଲ୍ୟାଣ୍ଡ ମହିଳା ପ୍ରଥମ ଟି-୨୦କୁ ୨୩ ରନରେ ଜିତି ନେଇଛି। ଏହି ବିଜୟ ସହ ଘରୋଇ ଟିମ ୩ଟିକିଆ ସିରିଜ୍ରେ ୧-୦ରେ ଆଗୁଆ ମଧ୍ୟ ହୋଇଯାଇଛି।
ୱେଲିଙ୍ଗଟନ୍ର ରିଜନାଲ ଷ୍ଟାଡିୟମରେ ଟସ୍ ଜିତି ପ୍ରଥମେ ଟିମ୍ ଇଣ୍ଡିଆର ଅଧିନାୟକ ହରମନପ୍ରୀତ ଘରୋଇ ନ୍ୟୁଜିଲ୍ୟାଣ୍ଡକୁ ବ୍ୟାଟିଂ କରିବାକୁ ନିମନ୍ତ୍ରଣ କରିଥିଲେ। ନ୍ୟୁଜିଲ୍ୟାଣ୍ଡ ଓପନର ସୋଫେଇ ଡିଭାଇନ୍ଙ୍କ ୬୨ ଓ ଅଧିନାୟକ ଆମି ସାଥେରୱେଟଙ୍କ ୩୩ ରନ୍କୁ ଆଧାର କରି ନିର୍ଦ୍ଧାରିତ ୨୦ ଓଭର୍ରେ ୪ ୱିକେଟ୍ ହରାଇ ୧୫୯ ରନ କରିଥିଲା।
୧୬୦ ରନର ଟାର୍ଗେଟକୁ ପିଛା କରୁଥିବା ଟିମ ଇଣ୍ଡିଆ ଶେଷରେ ପୂରା ଟିମ୍ ୧୯.୧ ଓଭର୍ରେ ୧୩୬ ରନ୍ରେ ଅଲଆଉଟ ହୋଇଯାଇଥିଲା। ଏହି ମ୍ୟାଚରେ ଅଭିଜ୍ଞ ମିତାଲି ରାଜ ଖେଳୁ ନଥିଲେ।
