ଭୁବନେଶ୍ୱର: ଭାରତ କ୍ରୀଡା ଇତିହାସରେ ଇତହାସ ରଚିଛନ୍ତି ଓଡିଆ ପୁଅ ପ୍ରମୋଦ ଭଗତ । ଟୋକିଓ ପାରାଲିମ୍ପିକ୍ସରେ ବ୍ୟାଡମିଣ୍ଟନ ପ୍ରତିଯୋଗିତାରେ ସ୍ୱର୍ଣ୍ଣ ପଦକ ହାସଲ କରି ଭାରତ ପାଇଁ ଗର୍ବ ଏବଂ ଗୌରବର ଏକ ମିଶାଲ ତିଆରି କରିଛନ୍ତି । ତେଣୁ ଏଥିପାଇଁ ଆଜି ସେ ଓଡିଶା ଫେରିବା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କୁ ଖୁବ ପ୍ରଶଂସା କରିଛନ୍ତି । ଭୁବନେଶ୍ୱରର କଳିଙ୍ଗ ହକି ଷ୍ଟାଡିୟମରେ ପ୍ରମୋଦଙ୍କୁ ୬ କୋଟି ଟଙ୍କାର ପୁରଷ୍କାର ରାଶି ଅର୍ପଣ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏଥିସହିତ ତାଙ୍କୁ ଗୃପ ‘ଏ’ ସ୍ତରର ଏକ ସରକାରୀ ଚାକିରି ପାଇଁ ମଧ୍ୟ ପ୍ରମୋଦଙ୍କୁ ପ୍ରସ୍ତାବ ଦିଆଯାଇଛି ।
ପ୍ରମୋଦଙ୍କୁ ପ୍ରଶଂସା କରି ମୁଖ୍ୟମନ୍ତ୍ରୀ କହିଛନ୍ତି ଯେ, “ତୁମର ଏହି ଅପୂର୍ବ ସଫଳତା ପାଇଁ ତୁମକୁ ସମ୍ମାନିତ କରି ମୁଁ ଅତ୍ୟନ୍ତ ଖୁସି ଅନୁଭବ କରୁଛି । ତୁମ ବିଜୟ ସେହି କ୍ଷଣ ସମଗ୍ର ଦେଶ ପାଇଁ ଏକ ଗର୍ବର ମୁହୂର୍ତ୍ତ ଥିଲା ଏବଂ ସବୁଦିନ ପାଇଁ ରହିବ ମଧ୍ୟ । ଖେଳ ମଣିଷ ଜୀବନକୁ କିପରି ସଶକ୍ତ ଏବଂ ଉନ୍ନତ କରିପାରିବ, ତୁମେ ତାହାର ଏକ ଜ୍ୱଳନ୍ତ ଉଦାହରଣ । କ୍ରୀଡା ଜଗତରେ ଆଗାମୀ ଖେଳାଳୀ ଏବଂ ବିଶେଷ କରି ପାରା ଖେଳାଳୀମାନଙ୍କୁ ଆଗକୁ ବଢିବା ପାଇଁ ତୁମେ ଏକ ପ୍ରେରଣା ହୋଇ ରହିବ” ।
ଏହାପରେ ଅଲିମ୍ପିକ ଯାତ୍ରାରେ ନିରନ୍ତର ସମର୍ଥନ ଏବଂ ପ୍ରେରଣା ପାଇଁ ପ୍ରମୋଦ ଭଗତ ମଧ୍ୟ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜ୍ଞାପନ କରିଛନ୍ତି । ଏହି ସଭାରେ ଫାଇଭ ଟି ସଚିବ ଭିକେ ପାଣ୍ଡିଆନ, କ୍ରୀଡାମନ୍ତ୍ରୀ ତୁଷାରକାନ୍ତି ବେହେରା, ହକି ପ୍ରମୋସନ କାଉଁସିଲର ଅଧ୍ୟକ୍ଷ ଦିଲ୍ଲୀପ ତିର୍କୀ ପ୍ରମୁଖ ଯୋଗ ଦେଇଥିଲେ ।
ପ୍ରମୋଦଙ୍କୁ ନବୀନଙ୍କ ପ୍ରଶଂସା
