(ଓଡିଶା ସ୍ପୋର୍ଟ): ଅଲ୍ ଇଣ୍ଡିଆ ଫୁଟବଲ ଫେଡେରେଶନ ପକ୍ଷରୁ ସୁପର କପ୍ ଫୁଟବଲ ଟୁର୍ଣ୍ଣାମେଣ୍ଟ ର ଦ୍ୱିତୀୟ ସଂସ୍କରଣ କଳିଙ୍ଗ ଷ୍ଟାଡିୟମରେ ଅନୁଷ୍ଠିତ ହେବ । ଟୁର୍ଣ୍ଣାମେଣ୍ଟ ପାଇଁ ପ୍ରସ୍ତୁତି ପର୍ବ ଶେଷ ପର୍ଯ୍ୟାୟରେ ପହଞ୍ଚିଛି ।। ମାର୍ଚ୍ଚ ୧୫ରୁ ଏପ୍ରିଲ ୧୩ ପର୍ୟ୍ୟନ୍ତ ଅନୁଷ୍ଠିତ ହେବ ଫୁଟବଲର ଏହି ମହାପର୍ବ। ପ୍ରତିଯୋଗିତାରେ ମୋଟ ୧୬ଟି ଦଳ ଅଂଶଗ୍ରହଣ କରିବେ। ରବିବାର ପ୍ରକାଶିତ କାର୍ୟ୍ୟସୂଚୀ ଅନୁସାରେ ମାର୍ଚ୍ଚ ୧୫ ଓ ୧୬ ତାରିଖ ଦୁଇଦିନଧରି ଯୋଗ୍ୟତା ପର୍ୟ୍ୟାୟ ମ୍ୟାଚ ଖେଳାଯିବ। ମାର୍ଚ୍ଚ ୨୯ରୁ ଆରମ୍ଭ ହେବ ପ୍ରି-କ୍ୱାର୍ଟର ଫାଇନାଲ। କ୍ୱାର୍ଟର ଫାଇନାଲ ଏପ୍ରିଲ ୪ରୁ ୭, ସେମିଫାଇନାଲ ୯ ଓ ୧୦ ଏବଂ ଫାଇନାଲ ଏପ୍ରିଲ ୧୩ରେ ଅନୁଷ୍ଠିତ ହେବ।
ଆଇ-ଲିଗ୍ ଏବଂ ଇଣ୍ଡିଆନ ସୁପର ଲିଗ୍(ଆଇଏସଏଲ)ର ଶ୍ରେଷ୍ଠ ୬ଟି ଲେଖାଏ ଦଳ ସିଧା ପ୍ରି-କ୍ୱାର୍ଟର ଫାଇନାଲ ପାଇଁ ଯୋଗ୍ୟତା ଅର୍ଜନ କରିବେ। ୨ଟି ଲିଗ୍ର ନିମ୍ନ ର଼୍ୟାଙ୍କ୍ପ୍ରାପ୍ତ ୪ଟି ଲେଖାଏ ଦଳ ଯୋଗ୍ୟତା ପର୍ୟ୍ୟାୟ ଖେଳିବେ। ସେଥିରୁ ୪ଟି ଦଳ ପୂର୍ବ ୧୨ ଦଳ ସହ ଯୋଗଦେବେ। ସେହି ଅନୁସାରେ ଆଇ-ଲିଗ୍ରୁ ଚାମ୍ପିୟନ ଚେନ୍ନାଇ ସିଟି, ଇଷ୍ଟ ବେଙ୍ଗଲ, ରିୟଲ କଶ୍ମୀର, ଚର୍ଚ୍ଚିଲ ବ୍ରଦର୍ସ ଓ ମୋହନ ବାଗାନ ଏବଂ ଆଇଏସଏଲରୁ ବେଙ୍ଗାଲୁରୁ ଏଫସି, ଗୋଆ ଏଫସି, ନର୍ଥ ଇଷ୍ଟ ୟୁନାଇଟେଡ, ମୁମ୍ବାଇ ସିଟି, ଜାମସେଦପୁର ଏଫସି ଓ ଆଟଲେଟିକୋ ଡି କୋଲକାତା(ଏଟିକେ) ସିଧା ମୁଖ୍ୟ ଟୁର୍ନାମେଣ୍ଟକୁ ଯୋଗ୍ୟତା ପାଇଛନ୍ତି। ଆଇ-ଲିଗ୍ରୁ ଆଇଜଲ ଏଫସି, ଇଣ୍ଡିଆନ ଆରୋଜ୍, ଗୋକୁଳମ୍ କେରଳ ଓ ମିନର୍ଭା ପଞ୍ଜାବ ଏବଂ ଆଇଏସଏଲରୁ ପୁଣେ ସିଟି, ଦିଲ୍ଲୀ ଡାଇନାମସ, କେରଳ ବ୍ଲାଷ୍ଟର୍ସ ଓ ଚେନ୍ନାଇନ୍ ଏଫସି ଯୋଗ୍ୟତା ପର୍ୟ୍ୟାୟ ଖେଳିବେ।
