ବାହାନଗା ଟ୍ରେନ୍ ଦୁର୍ଘଟଣାରେ ୨୭୫ ଲୋଙ୍କର ମୃତ୍ୟୁ ହୋଇଥିବା ବେଳେ ୧୧୦୦ରୁ ଅଧିକ ଆହତ ହୋଇଛନ୍ତି । ଏହି ଦୁର୍ଘଟଣାରେ ମୃତ୍ୟୁବରଣ କରିଥିବା ଲୋକଙ୍କୁ ପରିବାର ଲୋକେ ହସପିଟାଲରେ ପହଞ୍ଚି ମୃତଦେହକୁ ଗ୍ରହଣ କରୁଛନ୍ତି । ତେବେ ଏହି ଦୁର୍ଘଟଣାରେ ଆହତ ହୋଇଥିବା ପୀଡ଼ିତଙ୍କ ଚିକିତ୍ସା ପାଇଁ କ୍ରିକେଟର୍ ୟୁଜବେନ୍ଦ୍ର ଚହଲ ୧ ଲକ୍ଷ ଟଙ୍କା ଦାନ କରିଛନ୍ତି ।
ଚହଲ ଟ୍ରେନ ଦୁର୍ଘଟଣାର ଚ୍ୟାରିଟି କାର୍ୟ୍ୟ ପାଇଁ ସ୍କାଉଟ ଗେମିଂ ଚ୍ୟାନେଲ ଦ୍ବାରା ଆୟୋଜିତ ଷ୍ଟ୍ରିମରେ ଓଡିଶା ଟ୍ରେନ ଦୁର୍ଘଟଣା ପାଇଁ ୧ ଲକ୍ଷ ଟଙ୍କା ଦାନ କରିଛନ୍ତି । ଚହଲଙ୍କୁ ପବଜୀ ଗେମ୍ ଖେଳ ବହୁତ ପସନ୍ଦ । ଆଉ ଗେମ୍ ଖେଳିବା ସମୟରେ ସେ ଏହି ଦାନ କରିଛନ୍ତି । ଅନେକ ୟୁଟ୍ୟୁବର ଓଡିଶାକୁ ଟ୍ରେନ ଦୁର୍ଘଟଣାରେ ସହାୟତା ପାଇଁ ଦାନ କରୁଛନ୍ତି । ଏହି ଦୁର୍ଘଟଣାରେ କେବଳ ଚହଲ ନୁହେଁ ବୀରେନ୍ଦ୍ର ସେହ୍ବାଗ ମଧ୍ୟ ପୀଡିତଙ୍କ ପିଲାଙ୍କୁ ମାଗଣା ଶିକ୍ଷା ଦେବାକୁ କହିଛନ୍ତି । ବୀରେନ୍ଦ୍ର ସେହ୍ଵାଗ ଟ୍ଵିଟ୍ କରି ଦୁଃଖ ପ୍ରକାଶ କରିବା ସହିତ ଦୁର୍ଘଟଣାରେ ମୃତ୍ୟୁବରଣ କରିଥିବା ବ୍ୟକ୍ତିଙ୍କ ପିଲାଙ୍କୁ ମାଗଣା ଶିକ୍ଷା ଦେବେ । ସେ ଟ୍ଵିଟ୍ କରି କହିଛନ୍ତି ‘ଏହି ଦୃଶ୍ୟ ଆମକୁ ଅନେକ ଦିନ ପର୍ୟ୍ୟନ୍ତ ବିଚଳିତ କରିବ । ଦୁଃଖ ସମୟରେ ଅତିକମରେ ମୁଁ ଏତିକି କରିପାରିବି ଯେ, ଏଭଳି ଦୁଃଖଦ ଘଟଣାରେ ପ୍ରାଣ ହରାଇଥିବା ବ୍ୟକ୍ତିଙ୍କ ପିଲାଙ୍କ ପଢା ଖର୍ଚ୍ଚ ବହନ କରିବି । ଏହିସବୁ ପିଲାମାନଙ୍କୁ ସେହ୍ଵାଗ ଇଣ୍ଟରନ୍ୟାସନାଲ ସ୍କୁଲରେ ମାଗଣା ଶିକ୍ଷା ଦିଆଯିବ ।
