ନୂଆଦିଲ୍ଲୀ: ଆଲୋଚନା ପାଇଁ ପ୍ରସ୍ତାବ ଦେଇ କେନ୍ଦ୍ର କ୍ରୀଡ଼ାମନ୍ତ୍ରୀ ଅନୁରାଗ ଠାକୁର ପ୍ରତିବାଦରତ କୁସ୍ତିଖେଳାଳିମାନଙ୍କୁ ପୁଣି ଥରେ ଆମନ୍ତ୍ରଣ କରିଛନ୍ତି । ତେବେ ସରକାରଙ୍କ ପ୍ରସ୍ତାବ ପରେ କୁସ୍ତି ଖେଳାଳି ସାକ୍ଷୀ ମଲିକ ନିଜର ପ୍ରତିକ୍ରୀୟା ଦେଇ କହିଥିଲେ, ସରକାରଙ୍କ ପ୍ରସ୍ତାବ କ’ଣ ନ ଜାଣିବା ପର୍ୟ୍ୟନ୍ତ ପ୍ରତିବାଦ ବନ୍ଦ କରାଯିବ ନାହିଁ । ସରକାର ଆମକୁ କେମିତିକା ପ୍ରସ୍ତାବ ଦେଇଛନ୍ତି, ଦେଖିବୁ। ଡବ୍ଲୁଏଫଆଇର ମୁଖ୍ୟ ବ୍ରିଜ୍ ଭୂଷଣଙ୍କୁ ଗିରଫ କରିବା ଆମର ମୁଖ୍ୟ ଦାବି ।
ସେ ଆହୁରି ମଧ୍ୟ କହିଛନ୍ତି, ସରକାର ଦେଇଥିବା ପ୍ରସ୍ତାବକୁ ଆମେ ଖାପ୍ ପଞ୍ଚାୟତ ନେତାମାନଙ୍କ ଆଗରେ ଉପସ୍ଥାପନା କରି ସେମାନଙ୍କ ସହିତ ଆଲୋଚନା କରିବୁ। ଆମେ ନ ବୁଝି ନ ଶୁଝି କୌଣସି ପ୍ରସ୍ତାବ ଗ୍ରହଣ କରିବୁ ନାହିଁ। ଆମ ବରିଷ୍ଠ ଓ ସମର୍ଥକମାନଙ୍କ ସହିତ ସରକାର ଦେଇଥିବା ପ୍ରସ୍ତାବ କଥା ଆଲୋଚନା କରିବୁ। ପ୍ରସ୍ତାବ ଉତ୍ତମ ବୋଲି ସମସ୍ତେ ସମ୍ମତି ଦେବା ପରେ ଯାଇ ଆମେ ରାଜି ହେବୁ। ଆଲୋଚନା ପାଇଁ ଏପର୍ୟ୍ୟନ୍ତ ସମୟ ମଧ୍ୟ ଧାର୍ୟ୍ୟ କରାଯାଇ ନାହିଁ। ଆମେ ଆଲୋଚନା ସମୟ ଓ ସ୍ଥାନ ଜାଣିବା ପାଇଁ ଅପେକ୍ଷା କରିଛୁ। ରୁଦ୍ଧଦ୍ବାର ନୁହେଁ ଉନ୍ମୁକ୍ତ ବୈଠକ ପାଇଁ ଆମେ କହିବୁ। କିଛି ସମାଧାନ ହେବା ନେଇ ଆମେ ଆଶାୟୀ ବୋଲି ସାକ୍ଷୀ କହିଛନ୍ତି।
