ମନୁ ଭାକର ଏବଂ ପିଭି ପିଆର ଶ୍ରୀଜେଶ ହେବେ ଧ୍ୱଜାଧାରୀ

ନୂଆଦିଲ୍ଲୀ: ପ୍ୟାରିସ୍ ଅଲିମ୍ପିକ୍ସ ୨୦୨୪ ଜୁଲାଇ ୨୬ ସେନ୍ ନଦୀରେ ରଙ୍ଗାରଙ୍ଗ କାର୍ଯ୍ୟକ୍ରମ ସହ ଆରମ୍ଭ ହୋଇଥିଲା । ଅଗଷ୍ଟ ୧୧ରେ ଏହାର ଉଦଯାପନୀ ସମାରୋହ ଆୟୋଜନ କରାଯିବ । ଭାରତୀୟ ଅଲିମ୍ପିକ୍ସ ସଂଘ ପକ୍ଷରୁ ଦିଆଯାଇଥିବା ସୂଚନା ଅନୁସାରେ ଉଦଯାପନୀ ସମାରୋହରେ ଭାରତ ପାଇଁ ମନୁ ଭାକର ଏବଂ ପିଭି ପିଆର ଶ୍ରୀଜେଶ ଧ୍ୱଜାଧାରୀ ଭୂମିକା ନିର୍ବାହ କରିବେ । ଓପନିଂ ସେରମନିରେ ଭାରତ ପାଇଁ ପିଭି ସିନ୍ଧୁ ମହିଳା ଧ୍ୱଜାଧାରୀ ଏବଂ ଶରତ କମଲ ପୁରୁଷ ଧ୍ୱଜାଧାରୀ ଦାୟିତ୍ୱ ତୁଲାଇଥିଲେ । ଇଣ୍ଡିଆନ୍ ଅଲିମ୍ପିକ୍ସ ସଂଘର ଅଧ୍ୟକ୍ଷ ପିଟି ଉଷା ଉଭୟ ଖେଳାଳିଙ୍କ ନାଁ ଘୋଷଣା କରିଛନ୍ତି । ଏହାସହ ସେ କହିଛନ୍ତି ଯେ ଶ୍ରୀଜେଶଙ୍କୁ ଧ୍ୱଜାଧାରୀ ଭାବେ ମନୋନୀତ କରାଯିବା ପରେ ସେ ଭାବୁକ ହୋଇଥିଲେ । ତାଙ୍କ ସହ ଶେଫ-ଡି-ମିଶନ ଗଗନ ନାରଙ୍ଗ ଏବଂ ଭାରତୀୟ ଦଳ ମଧ୍ୟ ଉଦଯାପନୀ ସମାରୋହରେ ସାମିଲ ହେବେ । ଶ୍ରୀଜେଶ ଭାରତୀୟ ହକି ଟିମ୍ ପାଇଁ ୨ ଦଶନ୍ଧି ଧରି ଯୋଗଦାନ ଦେଇଛନ୍ତି । ପିଟି ଉଷା କହିଛନ୍ତି ଯେ ପୁରୁଷ ଧ୍ୱଜାଧାରୀ ରୂପେ ଜାଭେଲିନ୍ ଥ୍ରୋରେ ରୌପ୍ୟ ବିଜେତା ନୀରଜ ଚୋପ୍ରାଙ୍କ ସହ କଥା ହୋଇଥିଲେ କିନ୍ତୁ ସେ ଶ୍ରୀଜେଶଙ୍କୁ ଏହି ଦାୟିତ୍ୱ ଦେବା ପାଇଁ ଅନୁରୋଧ କରିଥିଲେ ।