୨୭ ତାରିଖରୁ ଆରମ୍ଭ ହେବ ଟେବୁଲ ଟେନିସ୍: ମୈଦାନକୁ ଓହ୍ଲାଇବେ ହର୍ମିତ୍ ଦେଶାଇ

ଆଜି ଠାରୁ ଆରମ୍ଭ ହୋଇଛି ପ୍ୟାରିସ ଅଲିମ୍ପିକ୍ସ । ଏହିରେ ୧୦୬ ଦେଶର ୧୦,୫୦୦ ଖେଳାଳି ଭାଗ ନେଇଛି । ତେଣୁ ଆଜି ଠାରୁ ବିଭିନ୍ନ ପ୍ରତିଯୋଗିତା ଆରମ୍ଭ ହୋଇଯାଇଛି । ତେବେ ଆସନ୍ତା ୨୭ ତାରିଖରୁ ଆରମ୍ଭ ହେବ ଟେବୁଲ ଟେନିସ୍ (ଟିଟି) କ୍ରୀଡ଼ା । ପ୍ରଥମ ଦିବସରେ ପୁରୁଷ, ମହିଳା ଏବଂ ମିକ୍ସଡ୍ ଡବଲ୍ସ ଇଭେଣ୍ଟ ରହିଛି । ପୁରୁଷ ସିଙ୍ଗଲ୍ସରେ ହର୍ମିତ୍ ଦେଶାଇ ଏକମାତ୍ର ଭାରତୀୟ ଭାବେ ମୈଦାନକୁ ଓହ୍ଲାଇବେ । ସେ ପ୍ରଥମ ରାଉଣ୍ଡ୍ରେ ଜୋର୍ଡାନର ଜାୟଦ ଅବୋ ୟମାନଙ୍କୁ ଭେଟିବେ ।ସେହିପରି ୨୮ ତାରିଖରେ ମହିଳା ସିଙ୍ଗଲ୍ସ ରାଉଣ୍ଡ୍-୬୪ରେ ଶ୍ରୀଜା ଆକୁଲା, ମନିକା ବାତ୍ରା ଏବଂ ପୁରୁଷ ବର୍ଗ ରାଉଣ୍ଡ୍-୬୪ରେ ଅଚାନ୍ତ ଶରତ କମଲ ଅଭିଯାନ ଆରମ୍ଭ କରିବେ । ଅଭିଜ୍ଞ କମଲ ପ୍ରଥମ ରାଉଣ୍ଡ୍ରେ ସ୍ଲୋଭାକିଆର ଡେନି କୋଜୁଲଙ୍କୁ ଏବଂ ମନିକା ବ୍ରିଟେନର ଆନ୍ନା ହର୍ସିଙ୍କୁ ଭେଟିବେ । ଦଳଗତ ଇଭେଣ୍ଟ ଅଗଷ୍ଟ ୫ ତାରିଖରୁ ଆରମ୍ଭ ହେବ । ଭାରତୀୟ ପୁରୁଷ ଓ ମହିଳା ପାଇଁ କ୍ୱାର୍ଟର ଫାଇନାଲ୍ ପଥ କଷ୍ଟକର ରହିଛି । ପୁରୁଷ ଦଳ ଶକ୍ତିଶାଳୀ ଚୀନକୁ ଭେଟିବ । ଚୀନ ଦଳ ଗତ ୪ଟି ଅଲିମ୍ପିକ୍ସରେ ସ୍ୱର୍ଣ୍ଣ ପଦକ ହାସଲ କରିଛି । ଭାରତୀୟ ମହିଳା ଦଳ ରାଉଣ୍ଡ୍-୧୬ରେ ରୋମାନିଆକୁ ଭେଟିବ । ଏହି ମ୍ୟାଚ୍ରେ ବିଜୟୀ ହେଲେ ଦଳ ୨୦୧୬ ରିଓ ଅଲିମ୍ପିକ୍ସ ରୌପ୍ୟ ବିଜେତା ଜର୍ମାନୀ ଦଳକୁ ଭେଟିବା ସମ୍ଭାବନା ରହିଛି ।