ଅପେକ୍ଷାର ଅନ୍ତ। ଶନିବାର ସନ୍ଧ୍ୟାରୁ ଜାପାନର ନୋଗୋୟାରେ ଆରମ୍ଭ ହେବ ଏସିଆର ସର୍ବବୃହତ କ୍ରୀଡ଼ା ମହାକୁମ୍ଭ—ଏସୀୟ କ୍ରୀଡ଼ାର ୨୦ତମ ସଂସ୍କରଣ। ପାଲୋମା ମିଜୁହୋ ଷ୍ଟାଡିୟମରେ ରଙ୍ଗାରଙ୍ଗ ଉଦ୍ଘାଟନୀ ସମାରୋହ ସହ ଆରମ୍ଭ ହେବ ମେଡାଲ ପାଇଁ ମହାଲଢ଼େଇ। ଅକ୍ଟୋବର ୪ ପର୍ଯ୍ୟନ୍ତ ଚାଲିବ ଏହି କ୍ରୀଡ଼ା ମହାକୁମ୍ଭ। ଏଥର ୪୬ଟି ଏସୀୟ ଦେଶର ପ୍ରାୟ ୧୦,୮୪୦ ଜଣ କ୍ରୀଡ଼ାବିତ୍ ୪୩ଟି କ୍ରୀଡ଼ାର ୪୬୯ଟି ଇଭେଣ୍ଟରେ ପଦକ ପାଇଁ ପ୍ରତିଦ୍ୱନ୍ଦ୍ୱିତା କରିବେ। ୧୯୫୮ ଓ ୧୯୯୪ ପରେ ତୃତୀୟ ଥର ପାଇଁ ଜାପାନ ଏସୀୟ କ୍ରୀଡ଼ା ଆୟୋଜନ କରୁଛି।
ଏହି ମହାମଞ୍ଚରେ ଭାରତ ମଧ୍ୟ ବଡ଼ ଦଳ ସହ ଅବତୀର୍ଣ୍ଣ ହେଉଛି। ପ୍ରାୟ ୫୦୦ ଜଣିଆ ଭାରତୀୟ ପ୍ରତିଯୋଗୀ ଦଳ ୩୫ଟି କ୍ରୀଡ଼ାରେ ନିଜ ଦକ୍ଷତା ଦେଖାଇବ। ଆଥଲେଟିକ୍ସରୁ ଆରମ୍ଭ କରି ସୁଟିଂ, କୁସ୍ତି, ତୀରନ୍ଦାଜୀ, ବ୍ୟାଡମିଣ୍ଟନ, ହକି, କ୍ରିକେଟ୍ ଓ କବାଡ଼ି—ଅନେକ କ୍ରୀଡ଼ାରେ ଭାରତୀୟ ଖେଳାଳିଙ୍କ ଉପରେ ରହିବ ନଜର। ବିଶେଷ କରି ହକି, କ୍ରିକେଟ୍ ଓ କବାଡ଼ିରେ ଭାରତ ପଦକ ଦୌଡ଼ରେ ରହିବା ସହ ଆଥଲେଟିକ୍ସ, ସୁଟିଂ ଓ କୁସ୍ତି ଭଳି ବ୍ୟକ୍ତିଗତ ଇଭେଣ୍ଟରେ ମଧ୍ୟ ଭାରତୀୟ କ୍ରୀଡ଼ାବିତ୍ଙ୍କ ଉପରେ ରହିଛି ଆଶା। ଏସୀୟ କ୍ରୀଡ଼ାରେ ହକିରେ ଭାରତ ଏପର୍ଯ୍ୟନ୍ତ ୫ଟି ସ୍ୱର୍ଣ୍ଣ, ୧୧ଟି ରୌପ୍ୟ ଓ ୭ଟି ବ୍ରୋଞ୍ଜ ପଦକ ଜିତିଛି।
ତେବେ ଏଥର ଭାରତୀୟ ଦଳର ଲକ୍ଷ୍ୟ କେବଳ ଅଂଶଗ୍ରହଣ ନୁହେଁ, ଅଧିକରୁ ଅଧିକ ପଦକ ହାସଲ କରି ଦେଶର ଗୌରବ ବଢ଼ାଇବା। ଆଜିଠୁ ଆରମ୍ଭ ହେଉଥିବା ଏହି କ୍ରୀଡ଼ା ମହାସମରରେ କେଉଁ ଦେଶର ଖେଳାଳି ରଚିବେ ନୂଆ ଇତିହାସ, ତା’ ଉପରେ ରହିବ ସାରା ଏସିଆର ନଜର।
