ଜୟପୁର: ଭାରତରେ କୋରୋନା ସଂକ୍ରମଣର ଶିଖର ଛୁଇଁଛି । ଏହି ସମୟରେ ବିଭିନ୍ନ ଦେଶର ଖେଳାଳୀ ଏବଂ କ୍ରିକେଟ ଦଳ ଭାରତ ପାଇଁ ପ୍ରାର୍ଥନା କରିବା ସହ ସହଯୋଗର ହାତ ମଧ୍ୟ ବଢାଇଛନ୍ତି । ତେବେ ଏ କ୍ଷେତ୍ରରେ ପଛରେ ରହିନି ଆଇପିଏଲ ଫ୍ରାଞ୍ଚାଇଜ ରାଜସ୍ଥାନ ରୋୟଲ୍ସ । ପଏଣ୍ଟ ଟେବୁଲରେ ୭ନମ୍ବର ସ୍ଥାନରେ ରହି ଅନ୍ୟ ଦଳ ମାନଙ୍କ ନିକଟରେ ପଛରେ ପଡିଯାଇଥିବା ଦଳ କିନ୍ତୁ ଦେଶ ପାଇଁ ଥିବା କର୍ତ୍ତବ୍ୟରେ ସେମାନଙ୍କଠାରୁ ଦୁଇ ପାଦ ଆଗରେ ରହିଛି । ଦେଶ କୋରୋନା ସହ ଲଢିବା ପାଇଁ ଅନେକ ପ୍ରକାର ଅସୁବିଧା ଦେଇ ଗତି କରୁଥିବା ବେଳେ ରାଜସ୍ଥାନ ରୋୟଲ୍ସ ଏଥିପାଇଁ ଆର୍ଥିକ ସହାୟତା ଯୋଗାଇ ଦେଇଛି । ଦଳ କୋରୋନାରେ ପ୍ରଭାବିତ ହୋଇତିବା ଲୋକଙ୍କୁ ୭.୫ କୋଟି ଟଙ୍କା ଦାନ କରିଛି । ରୋଗୀମାନଙ୍କ ପାଇଁ ଦଳର ଖେଳାଳୀ, ମାଲିକ ଏବଂ ମ୍ୟାନେଜମେଣ୍ଟ ପକ୍ଷରୁ ୧ ମିଲିୟନ ଡଲାରରୁ ଅଧିକ ଆର୍ଥିକ ରାଶି ପ୍ରଦାନ କରାଯାଉଛି । ଏସମସ୍ତ ଟଙ୍କାକୁ ଆର.ଆର ଫାଉଣ୍ଡେସନ ଏବଂ ଦ ବ୍ରିଟିଶ ଏସିଆନ ଟ୍ରଷ୍ଟ ଜରିଆରେ ଖର୍ଚ୍ଚ କରାଯିବ ବୋଲି ଟିମ ପକ୍ଷରୁ କୁହାଯାଇଛି । କୋରୋନା ମହାମାରୀ ବେଳେ ପ୍ରଭାବିତ ରୋଗୀ ଏବଂ ରାଜସ୍ଥାନବାସୀଙ୍କୁ ବିଭିନ୍ନ ପ୍ରକାର ସହଯୋଗ ଯୋଗାଇ ଦେବାକୁ ଏକ ଅଭିଯାନ ଆରମ୍ଭ କରିଛନ୍ତି ରାଜସ୍ଥାନ ଦଳର ମାଲିକ ଏବଂ ଖେଳାଳୀ । ଏହା ପୂର୍ବରୁ ପ୍ୟାଟ କମିନ୍ସ ଏବଂ ବ୍ରେଟ ଲି ମଧ୍ୟ ଭାରତ ପାଇଁ କିଛି ଅର୍ଥରାଶି ସହାୟତା କରିଥିଲେ ।
କୋରୋନା ମୁକାବିଲା ପାଇଁ ଆଗେଇ ଆସିଲା ରୋୟଲ୍ସ
