ଭୁବନେଶ୍ୱର: ବୀରେନ୍ଦ୍ର ଲାକ୍ରାଙ୍କୁ ମିଳିଲା ନୂଆ ଦାୟିତ୍ୱ । ଆସନ୍ତା ୨୩ ତାରିଖରୁ ଏସିଆ କପ୍ ଇଣ୍ଡୋନେସିଆରେ ଆରମ୍ଭ ହେବାକୁ ଯାଉଛି । ଏସିଆ କପ ପାଇଁ ଦଳ ଘୋଷଣା ହୋଇସାରିଥିବା ବେଳେ ଦଳର ଅଧିନାୟକ ଭାବେ ଦାୟିତ୍ୱ ଭାରତୀୟ ହକି ଦଳର ଖେଳାଳି ରୁପିନ୍ଦର ପାଲ ସିଂହଙ୍କୁ ଦିଆଯାଇଥିଲା । ସେହିଭଳି ଉପ ଅଧିନାୟକ ଦାୟିତ୍ୱ ଓଡ଼ିଆ ହକି ଖେଳାଳି ବୀରେନ୍ଦ୍ର ଲାକ୍ରାଙ୍କୁ ଦିଆଯାଇଥିଲା । କିନ୍ତୁ ଅଭ୍ୟାସ ସମୟରେ ଆହତ ସମସ୍ୟା କାରଣରୁ ରୁପିନ୍ଦର ଅଧିନାୟକ ପଦରୁ ବାଦ ପଡ଼ିଥିଲେ ।
ଏବେ ଭାରତୀୟ ହକି ଦଳର ପୁରା ଦାୟିତ୍ୱ ଓଡ଼ିଆ ପୁଅ ତଥା ଅଲିମ୍ପିକ୍ସ ମେଡାଲ ବିଜେତା ବୀରେନ୍ଦ୍ର ଲାକ୍ରାଙ୍କ ଉପରେ ନ୍ୟସ୍ତ କରାଯାଇଛି । ଇଣ୍ଡୋନେସିଆରେ ହେବାକୁ ଥିବା ହିରୋ ମେନ୍ସ ଏସିଆ କପ୍ ଭାରତୀୟ ଟିମ୍ ବୀରେନ୍ଦ୍ର ଲାକ୍ରାଙ୍କ ଅଧିନାୟକତ୍ବରେ ଖେଳିବ। ତେବେ ଏନେଇ ବୀରେନ୍ଦ୍ର ଲାକ୍ରାଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଟ୍ୱିଟ ଜରିଆରେ ଅଭିନନ୍ଦନ ଜଣାଇଛନ୍ତି । କ୍ୟାପଟେନ ଲାକ୍ରା ଓ ପୂରା ଭାରତୀୟ ହକି ଟିମକୁ ଆଗାମୀ ମ୍ୟାଚ୍ ପାଇଁ ଶୁଭେଚ୍ଛା ଜଣାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
Olympic #Bronze Medalist from #Odisha Birendra Lakra to lead the Indian Men's Hockey Team at the Hero Men's Asia Cup in Indonesia
Previously the vice-captain of the team, Birendra was promoted to captain after Rupinder Pal Singh was ruled out due to an injury
Congratulations 🎉 pic.twitter.com/6UCbJ5lJfc
— Odisha Sports (@sports_odisha) May 14, 2022
ଭାରତୀୟ ଦଳ ପାଇଁ ୨୦୧ଟି ମ୍ୟାଚ ଖେଳିଥିବା ବୀରେନ୍ଦ୍ର ୨୦୦୭ରେ ଭାରତୀୟ ଜୁନିୟର ହକି ଟିମରେ ଡେବ୍ୟୁ କରିଥିଲେ । ଆଉ ଏହାପରେ ପଛକୁ ଫେରି ଚାହିଁନଥିଲେ ବୀରେନ୍ଦ୍ର । ଟୋକିଓ ଅଲିମ୍ପିକ୍ସରେ ଭାରତୀୟ ହକି ଦଳର ଉପ-ଅଧିନାୟକ ରହିଥିଲେ ବୀରେନ୍ଦ୍ର ଲାକ୍ରା। ଆଉ ଦୀର୍ଘ ୪୧ ବର୍ଷ ପରେ ଟୋକିଓ ଅଲିମ୍ପିକ୍ସରେ ଭାରତୀୟ ହକି ଦଳ ବ୍ରୋଞ୍ଜ ମେଡାଲ ବିଜୟୀ ହୋଇଥିଲା । ଲଗାତାର ମ୍ୟାଚ୍ ଖେଳିବା ସହ ସେ ଦଳର ନିର୍ଭରଯୋଗ୍ୟ ଖେଳାଳୀ ଭାବେ ପରିଚିତ ହୋଇଥିଲେ ।
