ବିଜୟ ଧାରାକୁ ଫେରିବା ଲକ୍ଷ୍ୟ ନେଇ ୫ ଥରର ବିଜେତା ମୁମ୍ବାଇ ଇଣ୍ଡିଆନ୍ସ ଆଜି ଅହମଦାବାଦରେ ଘରୋଇ ଦଳ ଗୁଜରାଟ ଟାଇଟନ୍ସକୁ ଭେଟିବ। ବିଜେତା ଟାଇଟନ୍ସ ସଂପ୍ରତି ପଏଣ୍ଟ ଟେବୁଲର ଚତୁର୍ଥରେ ଥିଲା ବେଳେ ଆଇପିଏଲ୍ ଇତିହାସର ସଫଳ ଦଳ ଇଣ୍ଡିଆନ୍ସ ଚତୁର୍ଥରେ ରହିଛି।
ଆରମ୍ଭରୁ ୨ ମ୍ୟାଚ୍ ହାରିଥିବା ମୁମ୍ବାଇ ଏବେ ବିଜୟ ସହ ଏକ୍ଷକୁ ଫେରିଥିଲା। କିନ୍ତୁ ପଞ୍ଜାବ କିଙ୍ଗ୍ସ ବିପକ୍ଷ ଶନିବାର ମ୍ୟାଚ୍ରେ ଏହି ଦଳ ୧୪ ରନ୍ରେ ପରାସ୍ତ ହୋଇଥିଲା। ଏହି ମ୍ୟାଚ୍ର ଶେଷ ୫ ଓଭରରେ ମୁମ୍ବାଇ ବୋଲର ୯୬ ରନ୍ ବ୍ୟୟ କରିବାରୁ ପଞ୍ଜାବ ବଡ଼ ସ୍କୋର କରିପାରିଥିଲା। ଦ୍ରୁତ ବୋଲର ଅର୍ଜୁନ ତେନ୍ଦୁଲକର, ଜାସନ ବେହରେନଡର୍ଫ, କାମେରୁନ ଗ୍ରିନ ଓ ଜୋଫ୍ରା ଅର୍ଚର ନିଜ ଓଭର କୋଟା ପୂରଣ କରି ୪୦ରୁ ଊର୍ଦ୍ଧ୍ବ ରନ୍ ବ୍ୟୟ କରିଥିଲେ। ଅଭିଜ୍ଞ ସ୍ପିନର ପୀୟୂଷ ଚାୱାଲା ଓ ତାଙ୍କ ସାଥୀ ହ୍ରିତିକ ସୋକିନ କିନ୍ତୁ ସୁନ୍ଦର ବୋଲିଂ କରି ରନ୍ ଗତି କମାଇଥିଲେ। ବ୍ୟାଟିଂରେ ରୋହିତ ଶର୍ମା, ସୂର୍ୟ୍ୟକୁମାର ଯାଦବ, ଗ୍ରିନ ଓ ଟିମ୍ ଡେଭିଡ ଭଲ ଖେଳିଥିଲେ ମଧ୍ୟ ଦଳକୁ ଜିତାଇବାରେ ସକ୍ଷମ ହୋଇନଥିଲେ। ଡେଥ୍ ଓଭରରେ ଅର୍ଶଦୀପ ସିଂହଙ୍କ ସୁନ୍ଦର ବୋଲିଂ ଯୋଗୁଁ ମୁମ୍ବାଇ ହାରିବାକୁ ବାଧ୍ୟ ହୋଇଥିଲା। ତେଣୁ ଟାଇଟନ୍ସର ବୋଲିଂ ଲାଇନ୍ ଯେଭଳି ରହିଛି ମୁମ୍ବାଇ ବ୍ୟାଟର୍ ସଂଘର୍ଷ କରିବାର ସମ୍ଭାବନା ରହିଛି।
ଆଜି ଗୁଜୁରାଟ ଟାଇଟନ୍ସକୁ ଭେଟିବ ମୁମ୍ବାଇ ଇଣ୍ଡିଆନ୍ସ
