୯ରୁ ୯ ଜିତି ଭାରତର ରେକର୍ଡ, ବିଶ୍ୱକପରେ ଟିମ୍ ଇଣ୍ଡିଆର ବଡ଼ ବିଜୟ । ଶେଷ ଲିଗ୍ ମ୍ୟାଚରେ ନେଦରଲାଣ୍ଡସକୁ ୧୬୦ ରନରେ ପରାସ୍ତ କରିଛି ରୋହିତ ବାହିନୀ । ଏଥିସହ ଲିଗ୍ ପର୍ଯ୍ୟାୟର ସମସ୍ତ ୯ଟି ମ୍ୟାଚ୍ ଜିତିଛି । ଚଳିତ ବିଶ୍ବକପ ଲିଗ୍ ପର୍ଯ୍ୟାୟରେ ଗୋଟିଏ ବି ମ୍ୟାଚ୍ ହାରି ନଥିବା ଏକମାତ୍ର ଦଳ ହୋଇଛି ଭାରତ । ଭାରତ ପକ୍ଷରୁ ବୁମରା, ଜାଡେଜା, ସିରାଜ ଏବଂ କୁଲଦୀପ ଯାଦବ ୨ଟି ଲେଖାଏଁ ଓ୍ବିକେଟ ଅକ୍ତିଆର କରିଥିଲେ । ସବୁଠାରୁ ବଡ଼ କଥା ହେଉଛି କି କୋହଲି ଏବଂ ରୋହିତଙ୍କୁ ଗୋଟିଏ ଲେଖାଏଁ ଓ୍ବିକେଟ ମଧ୍ୟ ମିଳିଛି । ଭାରତୀୟ ଦଳର ୯ ଜଣ ବୋଲର ବୋଲିଂ କରିଥିଲେ । ଶୁଭମନ ଗିଲ ମଧ୍ୟ ବୋଲିଂ କରିଥିବା ନଜର ଆସିଥିଲା ।
ଉଭୟ ବ୍ୟାଟିଂ ଓ ବୋଲିଂରେ ଜବରଦସ୍ତ ପ୍ରଦର୍ଶନ ବଳରେ ବୃହତ ବିଜୟ ହାସଲ କରିଥିଲା ଭାରତ । ଶ୍ରେୟସ ଆୟାର ଓ ଲୋକେଶ ରାହୁଲଙ୍କ ବିସ୍ଫୋରକ ଧୂଆଁଧାର ସେଞ୍ଚୁରୀ ବଳରେ ନେଦରଲ୍ୟାଣ୍ଡସ୍ ବିପକ୍ଷରେ ଭାରତ ବିଶାଳ ୪୧୦ ରନ୍ କରିଥିଲା । ୬୨ ବଲରେ ଶତକ କରିଥିଲେ ଲୋକେଶ ରାହୁଲ । ସେହିଭଳି ୮୪ ବଲରେ ଶତକ ହାସଲ କରିଥିଲେ ଶ୍ରେୟସ ଆୟାର । ସେ ୧୨୮ ରନ୍ କରି ଅପରାଜିତ ରହିଥିଲେ। ବିଶ୍ବକପରେ ଶ୍ରେୟସଙ୍କର ଏହା ପ୍ରଥମ ଓ ଦିନିକିଆରେ ଚତୁର୍ଥ ଶତକ ।
ସେହିପରି ରୋହିତ ଶର୍ମା, ଶୁବମନ ଗିଲ୍, ବିରାଟ କୋହଲି ଅର୍ଦ୍ଧଶତକ କରିଥିଲେ । ଭାରତ ଶେଷ ୧୦ ଓଭରରେ ୧୨୬ ରନ୍ କରିଥିଲା। ସେଥିରୁ ଶେଷ ୫ ଓଭରରେ କରିଥିଲା ୭୩ ରନ୍। ଜବାବରେ ନେଦରଲ୍ୟାଣ୍ଡସ୍ ମାତ୍ର ୨୫୦ ରନରେ ଅଲଆଉଟ୍ ହୋଇଥିଲା । ବିଶ୍ବକପରେ ଲଗାତାର ୯ଟି ମ୍ୟାଚ୍ ଜିତାଇଥିବା ପ୍ରଥମ ଭାରତୀୟ କ୍ୟାପଟେନ୍ ହୋଇଛନ୍ତି ରୋହିତ ଶର୍ମା ।
ପୂର୍ବରୁ ୨୦୦୩ ୱାର୍ଲଡ କପରେ ସୌରଭ ଗାଙ୍ଗୁଲି ଲଗାତାର ୮ଟି ମ୍ୟାଚରେ ଭାରତକୁ ବିଜୟୀ କରାଇଥିଲେ । ୧୫ ତାରିଖରେ ମୁମ୍ବାଇ ୱାଙ୍ଖଡେରେ ନ୍ୟୁଜିଲାଣ୍ଡ ସହ ପ୍ରଥମ ସେମିଫାଇନାଲରେ ମୁହାଁମୁହିଁ ହେବ ଭାରତ । ଗୁରୁବାର କୋଲକାତାରେ ଦ୍ବିତୀୟ ସେମିଫାଇନାଲରେ ଦକ୍ଷିଣ ଆଫ୍ରିକା ଓ ଅଷ୍ଟ୍ରେଲିଆ ମୁକାବିଲା ହେବ । ଆସନ୍ତା ୧୯ ତାରିଖରେ ଫାଇନାଲ୍ ଫାଇଟ୍ । ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଫାଇନାଲ୍ ମୁକାବିଲା ଖେଳାଯିବ ।
