ରବିଙ୍କ ପରେ ଫେରିବେ ଅନିଲ

ନୂଆଦିଲ୍ଲୀ: ପୁଣି ଥରେ ଭାରତୀୟ ଦଳକୁ ଫେରୁଛନ୍ତି କିମ୍ବଦନ୍ତୀ କ୍ରିକେଟର ଅନିଲ କୁମ୍ବଲେ । ଟିମ ଇଣ୍ଡିଆକୁ ପୁଣି ଥରେ ଟପକୁ ନେବା ପାଇଁ ଫେରୁଛନ୍ତି ଭାରତର ପୂର୍ବତନ ଷ୍ଟାର ବୋଲର ତଥା ପୂର୍ବତନ କୋଚ । ଚୁକ୍ତି ଅନୁସାରେ ଆସନ୍ତା ଟି-ଟ୍ୱେଣ୍ଟି ବିଶ୍ୱକପ ପରେ ଭାରତର ମୁଖ୍ୟ କୋଚ ରବି ଶାସ୍ତ୍ରୀଙ୍କ କାର୍ଯ୍ୟକାଳ ଶେଷ ହେଉଛି । ଏହାପରେ ଭାରତୀୟ ଦଳର ମୁଖ୍ୟ କୋଚ କିଏ ହେବ ସେ ନେଇ ଚର୍ଚ୍ଚା ଲାଗି ରହିଛି । ଏହି ତାଲିକାରେ ଅନେକ ପୂର୍ବତନ ଖେଳାଳୀଙ୍କର ନାମ ରହିଛି । ଶ୍ରୀଲଙ୍କା ବିପକ୍ଷରେ ଦଳର କୋଚ ଭାବେ ନିଯୁକ୍ତ ହୋଇଥିବା ରାହୁଲ ଦ୍ରାବିଡ ମଧ୍ୟ ମୁଖ୍ୟ କୋଚ ଦୌଡରେ ସାମିଲ ଥିଲେ ।
ତେବେ ସମସ୍ତ ଖେଳାଳୀମାନଙ୍କ ମଧ୍ୟରେ ସବୁଠୁ ଆଗରେ ରହିଛି ପୂର୍ବତନ କୋଚ ଅନିଲ କୁମ୍ବଲେଙ୍କ ନାମ । ପୁଣି ଥରେ ଶାସ୍ତ୍ରୀଙ୍କ ପରେ ଅନିଲ କୋଚ ପଦକୁ ପ୍ରତ୍ୟାବର୍ତ୍ତନ କରିବେ ବୋଲି ଯଥେଷ୍ଟ ସମ୍ଭାବନା ରହିଛି । କିଛି ବର୍ଷର ବ୍ୟବଧାନ ପରେ ଅନିଲ ଟିମ ଇଣ୍ଡିଆର ନୂଆ ମୁଖିଆ ହେବେ ବୋଲି ଆଶା କରାଯାଉଛି । ପୂର୍ବରୁ ଏହି ଭେଟେରାନ ଖେଳାଳୀ ୨୦୧୬-୧୭ରେ ବର୍ଷକ ପାଇଁ ଦଳର କୋଚ ଭାର ସମ୍ଭାଳିଥିଲେ । ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକର, ଭିଭିଏସ ଲକ୍ଷ୍ମଣ ଏବଂ ବିସିସିଆଇ ଅଧ୍ୟକ୍ଷ ସୌରଭ ଗାଙ୍ଗୁଲିଙ୍କ ନେତୃତ୍ୱରେ କ୍ରିମେଟ ପରାମର୍ଶଦାତା ତାଙ୍କୁ କୋଚ ଭାବେ ନିୟୋଜିତ କରିଥିଲେ । କିନ୍ତୁ ୨୦୧୭ ଚମ୍ପିଆନ୍ସ ଟ୍ରଫିରେ ପାକିସ୍ତାନ ବିପକ୍ଷରେ ହାରିବା ପରେ ଅଧିନାୟକ କୋହଲୀଙ୍କ ସହ ମତଭେଦ ହେବାରୁ ସେ କୋଚ ପଦରୁ ଇସ୍ତଫା ଦେଇଥଲେ ।
ତେବେ ଅନିଲ କୁମ୍ବଲେଙ୍କ ପରେ ଦଳର ମୁଖ୍ୟ କୋଚ ଦୌଡରେ ପୂର୍ବତନ ଖେଳାଳୀ ଭିଭିଏସ ଲକ୍ଷ୍ମଣଙ୍କ ନାମ ମଧ୍ୟ ରହିଛି । ଅନିଲଙ୍କ ପରେ ଦ୍ୱିତୀୟ ପସନ୍ଦ ଭାବେ ଭିଭିଏସ ଲକ୍ଷ୍ମଣଙ୍କୁ ନେଇ ଆଲୋଚନା କରାଯାଉଛି । ତେବେ ଏହି ଦୁଇ ଖେଳାଳୀଙ୍କ ମଧ୍ୟରୁ କି, ଦଳର ମୁଖ୍ୟ କୋଚ ହେବେ ତାହା ବିଶ୍ୱକପ ପରେ ଜଣାଯିବ ।