ନୂଆଦିଲ୍ଲୀ: ଟି-ଟ୍ୱେଣ୍ଟି ବିଶ୍ୱକପ ପାଇଁ ବିସିସିଆଇ ତରଫରୁ ଜାରି ହୋଇଥିବା ସ୍କ୍ୱାର୍ଡ ଏବେ କ୍ରୀଡା ଜଗତରେ ଚର୍ଚ୍ଚାର ବିଷୟ ପାଲଟିଛି । ସିଲେକ୍ସନ ପରେ ତିନୋଟି ଘଟଣାକୁ ନେଇ ଚର୍ଚ୍ଚା ଲାଗି ରହିଛି । ୪ ବର୍ଷ ପରେ ଅଫସ୍ପିନର ରବିଚନ୍ଦ୍ରନ ଅଶ୍ୱିନଙ୍କ ପ୍ରତ୍ୟାବର୍ତ୍ତନ ସହିତ ଶିଖର ଧୱନ ଏବଂ ୟୁଜଭେନ୍ଦ୍ର ଚହଲଙ୍କୁ ଦଳରେ ସ୍ଥାନ ନ ମିଳିବା ସମସ୍ତଙ୍କୁ ଚକିତ କରିଥିଲା । ତେବେ ସବୁଠୁ ବଡ ଚର୍ଚ୍ଚାର ବିଷୟ ଥିଲା ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀଙ୍କୁ ମେଣ୍ଟର କରିବାର ନିଷ୍ପତ୍ତି । ଏହାକୁ ନେଇ ଅନେକ ସମାଲୋଚନାର ସାମନା କରୁଛନ୍ତି କ୍ୟାପଟେନ କୁଲ ମାହି । ତେବେ ଧୋନୀଙ୍କୁ ମେଣ୍ଟର କରିବାର ମୁଖ୍ୟ କାରଣ ଦର୍ଶାଇଛନ୍ତି ବିସିସିଆଇ ସଭାପତି ସୌରଭ ଗାଙ୍ଗୁଲି ।
ଗଣମାଧ୍ୟମ ସହ ଆଲୋଚନା କରିବା ସମୟରେ ସୌରଭ ଗାଙ୍ଗୁଲି ଧୋନୀଙ୍କ ସିଲେକ୍ସନକୁ ନେଇ ଖୁଲାସା କରିଛନ୍ତି । ବିଶ୍ୱକପରେ ଧୋନୀଙ୍କ ଚତୁରତା ଏବଂ ରେକର୍ଡ ଦଳକୁ ବିଶ୍ୱକପ ଜିତିବା ପାଇଁ ସହାୟକ ହେବ ବୋଲି କହିଛନ୍ତି ଦାଦା । ଧୋନୀଙ୍କ ଅଧିନାୟକତ୍ୱରେ ଭାରତ ଆଇସିସିର ସମସ୍ତ ଟ୍ରଫି ଜିତିବାରେ ସଫଳ ହୋଇଥିଲା । ମ୍ୟାଚକୁ ଆଗେଇ ନେବାରେ ସେ ଖୁବ ମାହିର ଏବଂ ସେ ଅନେକ ଥର ପରାଜୟ ମୁହଁରୁ ଦଳକୁ ବିଜୟୀ କରାଇଛନ୍ତି । ତାଙ୍କର ଏସବୁ ଚମତ୍କାରିତା ବିଶ୍ୱକପରେ ଦଳ ପାଇଁ ପ୍ଳସ ପଏଣ୍ଟ ହେବା ସହ ତାଙ୍କ ପରାମର୍ଶ ଦଳକୁ ଖୁବ ସହାୟକ ହେବ ବୋଲି ଆଶା କରାଯାଉଛି । ଏଥିସହ ତାଙ୍କ ଉପସ୍ଥିତି ଦଳକୁ ଏକ ଆତ୍ମବିଶ୍ୱାସ ଯୋଗାଇବ । ତେଣୁ ବହୁ ଆଲେଚନା ପରେ ଧୋନୀଙ୍କୁ ମେଣ୍ଟର ଭାବେ ଦଳରେ ସାମିଲ କରାଯାଇଛି ।
