କ୍ରିକେଟ ପରେ ଶିକ୍ଷକ ହେବେ ଧୋନୀ

ରାୟପୁର(ଓଡିଶା ସ୍ପୋର୍ଟସ): କ୍ରିକେଟରୁ ଅବସର ନେବା ପରେ ଏବେ ଶିକ୍ଷକ ହେବାକୁ ମନ ବଳାଇଛନ୍ତି କିମ୍ବଦନ୍ତୀ କ୍ରିକେଟର ତଥା ପୃତିବୀର ସଫଳତମ ଅଧିନାୟକ ମହେନ୍ଦ୍ର ସିଂହ ଧୋନୀ । କ୍ରିକେଟରେ ତାଙ୍କୁ ଅନେକ ଯୁବ ଖେଳାଳୀ ଗୁରୁ ଭାବରେ ମାନନ୍ତି । ତାଙ୍କଠୁ ବହୁତ କିଛି ଶିଖିବାକୁ ଚେଷ୍ଟା କରନ୍ତି । କିନ୍ତୁ ତାଙ୍କ ନାମ ଛତିଶଗଡ ଶିକ୍ଷକ ନିଯୁକ୍ତି ଆବେଦନକାରୀ ତାଲିକାରେ ଲେଖା ହୋଇଥିବା ଦେଖିବାକୁ ମିଳିଛି ।
ଘଟଣାଟି ହେଉଛି ଏପରି ଯେ, ଛତିଶଗଡରେ ଶିକ୍ଷକ ପାଇଁ ଆବେଦନ କରାଯାଉଥିବା ଆବେଦନପତ୍ରରେ ମହେନ୍ଦ୍ର ସିଂ ଧୋନୀଙ୍କ ନାମ ବ୍ୟବହାର ହୋଇଛି । କେବଳ ଧୋନୀ ନୁହେଁ ପୂର୍ବତନ କ୍ରିକେଟର ସଚିନ ତେନ୍ଦୁଲକରଙ୍କ ନାମ ମଧ୍ୟ ଲେଖାଯାଇଛି । ଆବେଦନକାରୀଙ୍କ ନାମ ଜାଗାରେ ମହେନ୍ଦ୍ର ସିଂହ ଧୋନୀ ଲେଖାଯାଇଥିବା ବେଳେ ବାପାଙ୍କ ନାମ ଲେଖା ଯାଇଛି ସଚିନ ତେନ୍ଦୁଲକର । ଯାହା ଏବେ ସୋଶଲ ମିଡିଆରେ ଭାଇରାଲ ହେଉଥିବାର ଦେଖାଯାଉଛି । ଏଥିସହ ସିଏସଭିଟିୟୁ ବିଶ୍ୱ ବିଦ୍ୟାଳୟ ଅନ୍ତର୍ଗତ ଇଞ୍ଜିନିୟରିଂ କଲେଜରୁ ଡିଗ୍ରୀ ପାସ କରିଥିବା ଦର୍ଶାଇଛନ୍ତି । ରାୟପୁରର ବାସିନ୍ଦା ବୋଲି ସେ ଏହି ଆବେଦନପତ୍ରରେ ଲେଖିଛନ୍ତି । କିନ୍ତୁ ସେହି ଆବେଦନକାରୀଙ୍କୁ ଇଣ୍ଟରଭ୍ୟୁ ପାଇଁ ଡକାଯିବା ପରେ ଏହି ଆବେଦନ ଏକ ଜାଲ ଆବେଦନ ବୋଲି ଜଣାପଡିଛି ।
ତେବେ ଯାଞ୍ଚ ସମୟରେ ଏହି ଆବେଦନ ଏକ ଜାଲ ବୋଲି କିପରି ଜଣା ପଡିନଥିଲା ତାହା ଏବେ ଏକ ବଡ ପ୍ରଶ୍ନ ଉଠିଛି । ଏଥିସହିତ ଯଦି କର୍ତ୍ତୃପକ୍ଷ ଏହା ବିରୁଦ୍ଧରେ ଏତଲା ଦିଅନ୍ତି ଏହି ଘଟଣାର ତଦନ୍ତ କରାଯାଇପାରେ ।