ଭାରତୀୟ କ୍ରକେଟ ଟିମ ପାଇଁ ଖୁସି ଖବର । ହସ୍ପିଟାଲରୁ ଡିସଚାର୍ଜ ହୋଇଛନ୍ତି ଭାରତୀୟ ଷ୍ଟାର ବ୍ୟାଟର ଶୁଭମନ ଗିଲ । ସକାଳେ ହସ୍ପିଟାଲରେ ଭର୍ତ୍ତି ହୋଇଥିଲେ ଏବେ ହସ୍ପିଟାଲରୁ ଡିସଚାର୍ଜ ହୋଇଛନ୍ତି । ତେବେ ଶୁଭମନ ଆଗାମୀ ମ୍ୟାଚ ଖେଳିବେ କି ନାହିଁ ସେ ବାବଦରେ ବିସିସିଆଇ ପକ୍ଷରୁ କୌଣସି ସ୍ୱଷ୍ଟ ସୂଚନା ମିଳିନାହିଁ । ଏହାପୂର୍ବରୁ ଡେଙ୍ଗୁ କାରଣରୁ ଅଷ୍ଟ୍ରେଲିଆ ବିପକ୍ଷ ମ୍ୟାଚରୁ ବାଦ୍ ପଡିଥିଲେ ଶୁଭମନ ।
ଜାତୀୟ ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁଯାୟୀ, ଶୁଭମନଙ୍କ ସ୍ୱାସ୍ଥ୍ୟବସ୍ଥା ଉପରେ ଏକ ଡାକ୍ତରୀ ଟିମ୍ ନଜର ରଖିଛନ୍ତି । ତାଙ୍କ ସ୍ୱାସ୍ଥ୍ୟବସ୍ଥାରେ ସୁଧାର ଆସିଲେ ପରବର୍ତ୍ତୀ ନିଷ୍ପତ୍ତି ନିଆଯିବ । ଆଗାମୀ ମ୍ୟାଚ୍ ପାଇଁ ଶୁଭମନ ଫିଟ୍ ରହିବେ କି ନାହିଁ ତାହା ଜଣାପଡିନି । ଗିଲ ଅସୁସ୍ଥ ହେବା କାରଣରୁ ଅଷ୍ଟ୍ରେଲିଆ ବିପକ୍ଷ ମ୍ୟାଚରେ ଇଶାନ କିଷାନଙ୍କୁ ସୁଯୋଗ ମିଳିଥିଲା । କିନ୍ତୁ ଅଷ୍ଟ୍ରେଲିଆ ବିପକ୍ଷ ମ୍ୟାଚରେ ବିଫଳ ହୋଇଥିଲେ ଇଶାନ । ଖାତା ଖୋଲିବା ପୂର୍ବରୁ ଇଶାନ ପ୍ୟାଭିଲିୟନ ଫେରିଥିଲେ । ତେଣୁ ଆଫଗାନିସ୍ତାନ ବିପକ୍ଷ ମ୍ୟାଚରେ ଇଶାନଙ୍କୁ ପୁଣିଥରେ ସୁଯୋଗ ମିଳିବ କି ନାହିଁ ତାହାକୁ ନେଇ ସନ୍ଦେହ ରହିଛି ।
