ଶ୍ରୀଲଙ୍କାରେ ଭାରତ ଏବଂ ପାକିସ୍ତାନ ମଧ୍ୟରେ ଏସିଆ କପ୍ ଖେଳାଯିବ । ବିସିସିଆଇ ସଚିବ ଜୟ ଶାହା ଏବଂ ପାକିସ୍ତାନ କ୍ରିକେଟ ବୋର୍ଡର ପ୍ରମୁଖ ଜକା ଅଶରଫ କଥାବାର୍ତ୍ତା ହେବା ପରେ ଏଭଳି ନିଷ୍ପତ୍ତି ହୋଇଛି ।ହାଇବ୍ରିଡ ମଡେଲରେ ଖେଳାଯିବାକୁ ଥିବା ଏସିଆ କପର ଆୟୋଜନ କରିବାର ଅଧିକାର ପାକିସ୍ତାନରେ ରହିଛି । କିନ୍ତୁ ପାକିସ୍ତାନରେ କେବଳ ୪ଟି ମ୍ୟାଚ୍ ହେବ ଆଉ ଅନ୍ୟ ମ୍ୟାଚ୍ ଶ୍ରୀଲଙ୍କାରେ ଖେଳାଯିବ ।
ଡରବନରେ ଆଇସିସି ବୋର୍ଡ ବୈଠକ ପୂର୍ବରୁ ଜୟ ଶାହା ଏବଂ ଜକା ଅଶରଫ ମଧ୍ୟରେ ଏସିଆ କପ୍ ସିଡ୍ୟୁଲ ଫାଇନାଲ କରିବା ପାଇଁ ଏକ ଅନୌପଚାରିକ ମିଟିଂ ଥିଲା । ଏହାକୁ ନେଇ ଆଇପିଏଲ ଚେୟାରମ୍ୟାନ୍ ଅରୁଣ ଧୁମଲ କହିଛନ୍ତି, ଜୟ ଶାହା ଏବଂ ପିସିବି ମୁଖ୍ୟଙ୍କ ମଧ୍ୟରେ ସାକ୍ଷାତ ହୋଇ ଏସିଆ କପ୍ ସିଡ୍ୟୁଲକୁ ନେଇ ଚର୍ଚ୍ଚା ହୋଇଥିଲା ।
ଅରୁଣ ଧୁମଲ କହିଛନ୍ତି, ଭାରତୀୟ ଟିମ୍ ଆଗାମୀ ଏସିଆ କପରେ ସମସ୍ତ ମ୍ୟାଚ୍ ଶ୍ରୀଲଙ୍କାରେ ଖେଳିବ । ଏସିଆ କପ୍ ୨୦୨୩ରେ ଲିଗ ପର୍ଯ୍ୟାୟରେ ୪ଟି ମ୍ୟାଚ୍ ପାକିସ୍ତାନରେ ହେବ । ଏହାପରେ ସମସ୍ତ ମ୍ୟାଚ୍ ଶ୍ରୀଲଙ୍କାରେ ଖେଳିବ । ଭାରତ-ପାକିସ୍ତାନ ମଧ୍ୟରେ ହେବାକୁ ଥିବା ୨ଟି ମ୍ୟାଚ୍ ମଧ୍ୟ ଶ୍ରୀଲଙ୍କାରେ ହେବ । ଯଦି ଟିମ୍ ଫାଇନାଲରେ ପହଞ୍ଚେ ତେବେ ଶ୍ରୀଲଙ୍କାରେ ତୃତୀୟ ମ୍ୟାଚ ଖେଳାଯିବ ।
