ସାଇନା ସେମି ଫାଇନାଲରେ: ସିନ୍ଧୁ, ଶ୍ରୀକାନ୍ତ ଆଉଟ

ଭୁବନେଶ୍ୱର: ଇଣ୍ଡୋନେସିଆ ମାଷ୍ଟର୍ସ ବ୍ୟାଡ୍ମିଣ୍ଟନ ଟୁର୍ନାମେଣ୍ଟ ସେମିଫାଇନାଲରେ ସାଇନା ନେହ୍ବାଲ ପ୍ରବେଶ କରିଥିବାବେଳେ, ପି.ଭି. ସିନ୍ଧୁ ଓ କିଡାମ୍ବି ଶ୍ରୀକାନ୍ତ ସେମାନଙ୍କ କ୍ୱାର୍ଟର ଫାଇନାଲ ମ୍ୟାଚ ହାରିଯାଇଛନ୍ତି। ଗତ ସପ୍ତାହରେ ମାଲେସିଆ ମାଷ୍ଟର୍ସରେ ସେମିଫାଇନାଲକୁ ଉନ୍ନୀତ ହୋଇଥିବା ସାଇନା ୨୧-୭, ୨୧-୧୮ରେ ଥାଇଲାଣ୍ଡର ପର୍ନପାଓ୍ବି ଚୋଚୁଓଙ୍ଗ୍ଙ୍କୁ ପରାସ୍ତ କରି ସେମିଫାଇନାଲରେ ପ୍ରବେଶ କରିଛନ୍ତି। ଦୁଇଥର ରାଜ୍ୟଗୋଷ୍ଠୀ କ୍ରୀଡ଼ା ଚାମ୍ପିୟନ ବର୍ତ୍ତମାନ ୬ଷ୍ଠ ସିଡ୍ ତଥା ଚାଇନାର ହି ବିଙ୍ଗ୍ଜିଆଓଙ୍କୁ ଭେଟିବେ। ଏହି ଖେଳାଳିଙ୍କୁ ସେ ତାଙ୍କ କ୍ୟାରିୟରରେ ପ୍ରଥମ ଥର ଭେଟିବେ। ୩ ଥର ଅଲିମ୍ପିକ ଚାମ୍ପିୟନ କାରୋଲିନ୍ ମାରିନ୍ଙ୍କ ଉଚିତ ମୁକାବିଲା କରି ନ ପାରି ସିନ୍ଧୁ ୧୧-୨୧, ୧୨-୨୧ରେ ପରାଜିତ ହୋଇଯାଇଥିଲେ। ଅନ୍ୟପକ୍ଷରେ ପୁରୁଷ ସିଙ୍ଗଲ୍ସ କ୍ୱାର୍ଟର ଫାଇନାଲରେ ଶ୍ରୀକାନ୍ତ ୧୮-୨୧, ୧୯-୨୧ରେ ସ୍ଥାନୀୟ ହିରୋ ତଥା ଏସିଆନ ଗେମ୍ସ ଚାମ୍ପିୟନ ଜୋନାତନ କ୍ରିଷ୍ଟିଙ୍କଠାରୁ ହାରିଯାଇଥିଲେ।