ଘରୋଇ ପିଚରେ ଚେନ୍ନାଇକୁ ରୋକିଲା କୋଲକାତା

ଚେନ୍ନାଇ : ରବିବାର ଚେପକରେ ଖେଳାଯାଇଥିବା ମ୍ୟାଚରେ ଚେନ୍ନାଇ ସୁପର କିଙ୍ଗ୍ସ କୁ ରୋକିଛି କୋଲକାତା ନାଇଟ ରାଇଡର୍ସ । ପ୍ଲେ ଅଫ୍ ଦ୍ୱାରରେ ଥିବା ଚେନ୍ନାଇକୁ ୬ ୱିକେଟରେ ପରାସ୍ତ କରିଛି କୋଲକାତା । ଚେନ୍ନାଇ ନିଜ ପିଚରେ ଟସ୍ ଜିତି ପ୍ରଥମେ ବ୍ୟାଟିଂ କରି ୧୪୪ ରନ୍ କରିଥିଲା । ଆଇପିଏଲର ଚଳିତ ସଂସ୍ମରଣରେ ଚେନ୍ନାଇର ଏହା ସର୍ବନିମ୍ନ ସ୍କୋର୍ । ପାୱାର ପ୍ଲେ ଭିତରେ ୩ ୱିକେଟ୍ ହରାଇ କୋଲକାତା ସଙ୍କଟରେ ପଡ଼ିଥିଲେ ମଧ୍ୟ ରିଙ୍କୁ ସିଂହ ଏବଂ ନୀତୀଶ ରାଣା ବ୍ୟକ୍ତିଗତ ଅର୍ଦ୍ଧଶତକ ହାସଲ ସହିତ ୯୯ ରନ୍ର ଭାଗୀଦାରି ଗଢ଼ିଥିଲେ। କୋଲକାତା ୭ ବଲ୍ ପୂର୍ବରୁ ବିଜୟ ଲକ୍ଷ୍ୟରେ ପହଞ୍ଚିଯାଇଥିଲା। ଏହି ମ୍ୟାଚ୍ ଜିତିଥିଲେ ଚେନ୍ନାଇ ଆନୁଷ୍ଠାନିକ ଭାବେ ପ୍ଲେ ଅଫ୍ ଯୋଗ୍ୟତା ସହ ୧-୨ ଭିତରେ ରହିବାକୁ ମଧ୍ୟ ନିଶ୍ଚିତ କରିଥା’ନ୍ତା। ଏହି ସମ୍ଭାବନା ଏବେ ବିଳମ୍ବିତ ହୋଇଛି। କୋଲକାତା କିନ୍ତୁ ଷଷ୍ଠ ବିଜୟ ସତ୍ତ୍ବେ ଚାପରେ ରହିଛି। ଉଭୟ ଦଳ ହାତରେ ଗୋଟିଏ ଲେଖାଏଁ ମ୍ୟାଚ୍ ରହିଛି। ସପ୍ତାହାନ୍ତ ଶନିବାର କୋଲକାତା-ଲକ୍ଷ୍ନୌ ଏବଂ ଚେନ୍ନାଇ-ଦିଲ୍ଲୀ ମୁକାବିଲା ହେବ।