ନୂଆଦିଲ୍ଲୀ: ୨୦୨୬ ଟି-୨୦ ବିଶ୍ୱକପରେ ଭାରତ–ପାକିସ୍ତାନ ମ୍ୟାଚକୁ ନେଇ ଲାଗିଥିବା ସସପେନ୍ସରେ ଏବେ ପୂର୍ଣ୍ଣଛେଦ ପଡିଛି । କ୍ରିକବଜ୍ର ଏକ ରିପୋର୍ଟ ଅନୁଯାୟୀ, ପାକିସ୍ତାନ କ୍ରିକେଟ୍ ବୋର୍ଡ (PCB) ଭାରତ ବିପକ୍ଷରେ ଖେଳିବାକୁ ରାଜି, କିନ୍ତୁ ଏହା ପାଇଁ ଗୋଟିଏ ସର୍ତ୍ତ ରଖିଛି। PCB ଚାହୁଁଛି ଯେ ଭାରତ ଏକ ତ୍ରି-ସିରିଜ୍ରେ ଅଂଶଗ୍ରହଣ କରୁ, ଯେଉଁଥିରେ ଭାରତ, ପାକିସ୍ତାନ ଓ ବାଂଲାଦେଶ ଦଳ ସାମିଲ ହେବେ।
ଯଦି ଭାରତ ଏହି ପ୍ରସ୍ତାବକୁ ଗ୍ରହଣ କରେ, ତେବେ ପାକିସ୍ତାନ ପ୍ରଧାନମନ୍ତ୍ରୀ ଟିମ୍କୁ ୨୦୨୬ ଟି-୨୦ ବିଶ୍ୱକପରେ ଭାରତ ବିପକ୍ଷରେ ଖେଳିବାକୁ ଅନୁମତି ଦେବେ ବୋଲି କୁହାଯାଉଛି। ପ୍ରସ୍ତାବିତ ତ୍ରି-ସିରିଜ୍ ଏକ ନିରପେକ୍ଷ ସ୍ଥାନରେ ଆୟୋଜିତ ହେବ। ହେଲେ ଏହି ପ୍ରସ୍ତାବକୁ ନେଇ ଆଇସିସି, ବିସିସିଆଇ କିମ୍ବା ଅନ୍ୟ କୌଣସି କ୍ରିକେଟ୍ ବୋର୍ଡ ପକ୍ଷରୁ ଏପର୍ଯ୍ୟନ୍ତ କୌଣସି ଆନୁଷ୍ଠାନିକ ଘୋଷଣା କରାଯାଇନାହିଁ।
ଭାରତ–ପାକିସ୍ତାନ ମ୍ୟାଚ୍କୁ ବିଶ୍ୱ କ୍ରିକେଟର ସବୁଠାରୁ ବଡ଼ ପ୍ରତିଦ୍ୱନ୍ଦ୍ୱିତା ଭାବେ ଦେଖାଯାଏ। ବିଶ୍ୱକପ୍ ଭଳି ବଡ଼ ଟୁର୍ଣ୍ଣାମେଣ୍ଟରେ ଏହି ମ୍ୟାଚ୍ ସର୍ବାଧିକ ଦର୍ଶକ ଏବଂ ରାଜସ୍ୱ ଆଣିଥାଏ। ଗଣମାଧ୍ୟମ ରିପୋର୍ଟ ଅନୁଯାୟୀ, ICC ଟୁର୍ଣ୍ଣାମେଣ୍ଟରେ ଭାରତ–ପାକିସ୍ତାନ ଗୋଟିଏ ମ୍ୟାଚ୍ରୁ ପ୍ରାୟ ୨୫୦ ମିଲିୟନ ଆମେରିକୀୟ ଡଲାର (୨୨ ହଜାର କୋଟି ଟଙ୍କାରୁ ଅଧିକ) ରାଜସ୍ୱ ହୋଇଥାଏ। ଯଦି ଏହି ମ୍ୟାଚ୍ ବାତିଲ୍ ହୁଏ, ତେବେ ICC ଠାରୁ ଆରମ୍ଭ କରି ପ୍ରସାରକ ସଂସ୍ଥା ପର୍ଯ୍ୟନ୍ତ ସମସ୍ତଙ୍କୁ ଭାରି ଆର୍ଥିକ କ୍ଷତି ସହିବାକୁ ପଡ଼ିବ।
