ପାକିସ୍ତାନ ଖେଳିବନି ଏସିଆ କପ

ଏସିଆ କପକୁ ନେଇ ବିବାଦ ଏବେ ନୂଆ ମୋଡ଼ ନେଇଛି । ପ୍ରଥମେ ପାକିସ୍ତାନ ଏହାର ଆୟୋଜନର ଅଧିକାର ପାଇଥିବା ବେଳେ ଭାରତର ବିରୋଧ ପରେ ଏହି ଟୁର୍ଣ୍ଣାମେଣ୍ଟକୁ ଶ୍ରୀଲଙ୍କାରେ ଆୟୋଜନ କରାଯିବାର ପ୍ରକ୍ରିୟା ଆରମ୍ଭ କରାଯାଇଛି । ଏହି ନିଷ୍ପତ୍ତିକୁ ପାକିସ୍ତାନ ତୀବ୍ର ବିରୋଧ କରିବା ସହିତ ଏସିଆ କପକୁ ବୟକଟ କରିବା ପାଇଁ ଧମକ ଦେଇଛି । ବିସିସିଆଇ ଭାରତୀୟ ଟିମକୁ ପାକିସ୍ତାନ ପଠାଇବ ନାହିଁ ବୋଲି ରୋକଠୋକ ମନା କରିବା ପରେ ଇସଲାମାବାଦ ହାତରୁ ଆୟୋଜନ ଅଧିକାର ଖସିଯାଇଛି । ପାକିସ୍ତାନ କ୍ରିକେଟ ବୋର୍ଡ ମୁଖ୍ୟ ନଜାମ ସେଠୀ ଏସିଆନ କ୍ରିକେଟ କାଉନସିଲର ଅଧିକାରୀମାନଙ୍କୁ ମଙ୍ଗଳବାର ଭେଟିଥିଲେ । ଏହି ସମୟରେ ଏସିଆ କପ୍ର ଭେନ୍ୟୁକୁ ଶ୍ରୀଲଙ୍କା ସ୍ଥାନାନ୍ତର ପାଇଁ କରାଯାଉଥିବା ପ୍ରୟାସକୁ ବିରୋଧ କରିଥିଲେ । ପିସିବି ସୂତ୍ରରେ କୁହାଯାଇଛି ଯେ, ଏସିଆନ କ୍ରିକେଟ କାଉନସିଲ ପାକିସ୍ତାନ ଏସିଆ କପ ପାଇଁ ଦେଇଥିବା ହାଇବ୍ରିଡ ମଡେଲ ପ୍ରସ୍ତାବକୁ ଗ୍ରହଣ କରିବା ଦରକାର ବୋଲି ସେଠୀ କହିଛନ୍ତି । ପିସିବିର ଅଧିକାରୀ କହିଛନ୍ତି ଯେ, ଯଦି ତାଙ୍କ ପ୍ରସ୍ତାବ ଏସିଆନ କ୍ରିକେଟ କାଉନସିଲ(ଏସିସି) ଦ୍ୱାରା ଗ୍ରହଣ ନ କରାଯାଏ, ତା’ହେଲେ ପାକିସ୍ତାନ କ୍ରିକେଟ ଟିମ୍ ଏସିଆ କପ୍କୁ ବୟକଟ କରିବ।