ଜଗତସିଂହପୁର: ନାମ ତାଙ୍କର ରାହୁଲ ବାରିକ ବୟସ- ୨୫ , ଉଚ୍ଚତା- ୬ ଫୁଟ ୩ ଇଞ୍ଚ । ସେ ନେଟ୍ସକୁ ଓହ୍ଲାଇଲେ ପ୍ରତିପକ୍ଷ ଦଳରେ ଖେଳିଯାଏ ଆତଙ୍କ । ଭଲିବଲ୍ କୋର୍ଟର ଯେଉଁ କୋଣରେ ବଲ୍ ଥିଲେ ବି, ତାକୁ ସ୍ମାସ୍ କରି ପଏଣ୍ଟ ଆଣିବାର ଦକ୍ଷତା ରଖନ୍ତି ସେ । ଭାରତୀୟ ଭଲିବଲ ଦଳରେ ନୂତନଭାବେ ସ୍ଥାନ ପାଇଥିବା ଏହି ଆଟାକିଂ ଷ୍ଟ୍ରାଇକର ହେଲେ ରାହୁଲ ବାରିକ । ୩୧ ବର୍ଷ ପରେ ଭାରତୀୟ ଦଳରେ ସ୍ଥାନ ପାଇଥିବା ଏହି ଉଦୀୟମାନ ଓଡ଼ିଆ ତାରକାଙ୍କ ଉପରେ ଏବେ ସମସ୍ତଙ୍କ ନଜର । ଜୁଲାଇ ୮ରୁ ୧୫ ଯାଏ ତାଇୱାନ ତାଇପେଇରେ ଅନୁଷ୍ଠିତ ହେଉଥିବା ଏସୀୟ ମେନ୍ସ ଭଲିବଲ ଚ୍ୟାଲେଞ୍ଜ କପ୍ ପାଇଁ ଭାରତୀୟ ଦଳରେ ସ୍ଥାନ ପାଇଥିବା ରାହୁଲଙ୍କ ପ୍ରଦର୍ଶନ ନେଇ ଭାରତୀୟ ଦଳ ବେଶ୍ ଆଶା ରଖିଛି। କିଟ୍ ବିଜୁ ପଟ୍ଟନାୟକ ଇନଡୋର ଷ୍ଟାଡିୟମରେ ହୋଇଥିବା ସମ୍ଭାବ୍ୟ ଭାରତୀୟ ଦଳର ପ୍ରଶିକ୍ଷଣ ଶିବିରରେ ଚମତ୍କାର ଖେଳ ପ୍ରଦର୍ଶନ କରିଥିଲେ ରାହୁଲ । ଭାରତୀୟ ଦଳର ଅଧିନାୟକ ପ୍ରିନ୍ସ ମଧ୍ୟ ରାହୁଲଙ୍କ ପ୍ରଦର୍ଶନକୁ ନେଇ ବେଶ୍ ଖୁସି ଅଛନ୍ତି ।
ରାହୁଲଙ୍କ ଗାଁ ଜଗତସିଂହପୁର ଜିଲ୍ଲା ବାଲିକୁଦା ବ୍ଲକ ଅନ୍ତର୍ଗତ ଗରାମ ଗାଁରେ । ବାପା ପ୍ରଶାନ୍ତ ବାରିକ ଜଣେ ଅବସରପ୍ରାପ୍ତ ସେନା କର୍ମଚାରୀ । ମାଆ ମମତା ବାରିକ ଗୃହିଣୀ । ଭଲିବଲ୍ ପାଇଁ ଗାଁରେ ନ ଥିଲା କୌଣସି ଭିତ୍ତିଭୂମି । କିନ୍ତୁ ସ୍କୁଲ ବେଳୁ ରାହୁଲ ଖେଳୁଥିଲେ ଚମତ୍କାର ଭଲିବଲ । ରାହୁଲଙ୍କ ଭଲିବଲ୍ ଖେଳ ଦେଖି ପ୍ରଭାବିତ ହୋଇଥିଲେ ପାରାଦୀପ ପୋର୍ଟ କ୍ରୀଡ଼ା ବିଭାଗର ଭଲି କୋଚ୍ ସଂଜୟ କୁମାର ଦାସ । ମାଟ୍ରିକ୍ ପାସ୍ ପରେ ରାହୁଲଙ୍କୁ ପୋର୍ଟ ହଷ୍ଟେଲରେ ରଖି ଅଧିକ ପ୍ରଶିକ୍ଷଣ ଦେଇଥିଲେ ସଂଜୟ । ଯେଉଁଠୁ ରାହୁଲଙ୍କ ପ୍ରତିଭା ଅଧିକ ଚମକିଥିଲା । ୨୦୧୭ରେ ଅନ୍ତଃ ଜିଲ୍ଲାସ୍ତରୀୟ ପ୍ରତିଯୋଗିତାରେ ଦମଦାର ଖେଳିଥିବା ରାହୁଲଙ୍କୁ ବ୍ରେକ୍ ମିଳିଥିଲା ୧୯ ବର୍ଷରୁ କମ୍ ଓଡ଼ିଶା ଭଲିବଲ୍ ଦଳରେ ।
ଦୁଇ ବର୍ଷ କାଳ ଜୁନିଅର ଟିମରେ ଖେଳିଥିବା ରାହୁଲ ୨୦୧୯ରେ ମନୋନୀତ ହୋଇଥିଲେ ୨୧ ବର୍ଷରୁ କମ୍ ଓଡ଼ିଶା ଭଲିବଲ୍ ଟିମ୍ରେ । ରାହୁଲଙ୍କ ପ୍ରଦର୍ଶନ ଦିନକୁ ଦିନ ଶାଣିତ ହୋଇଚାଲିଥିଲା ।ସେ ଆଉ ପଛକୁ ଫେରି ଚାହିଁ ନ ଥିଲେ । ଉତ୍କଳ ବିଶ୍ବବିଦ୍ୟାଳୟ ଭଲିବଲ ଟିମ୍ରେ ଖେଳି ଦଳକୁ ପୂର୍ବାଞ୍ଚଳ ଭଲିବଲ୍ ପ୍ରତିଯୋଗିତାରେ ଚାମ୍ପିଅନ କରାଇବାରେ ରାହୁଲ ନିଭାଇଥିଲେ ଗୁରୁତ୍ବପୂର୍ଣ୍ଣ ଭୂମିକା । ଏହା ଭିତରେ ରାହୁଲ ଭାରତୀୟ ଅର୍ଦ୍ଧସାମରିକ ବାହିନୀ ଆଇଟିବିପିରେ ଚାକିରି କରିବାର ସୁଯୋଗ ପାଇଥିଲେ । ୨୦୨୦ରେ ଓଡ଼ିଶା ସିନିଅର ଟିମ୍ରେ ସ୍ଥାନ ପକ୍କା କରିଥିବା ରାହୁଲ ଅନେକ ଜାତୀୟ ସ୍ତରର ପ୍ରତିଯୋଗିତାରେ ଦମଦାର ଖେଳ ପ୍ରଦର୍ଶନ କରିଥିଲେ । ଫଳରେ ଭାରତୀୟ ଭଲିବଲ ଚୟନକର୍ତ୍ତାଙ୍କ ଦୃଷ୍ଟି ଆକର୍ଷଣ କରିବାରେ ସଫଳ ହୋଇଥିଲେ ।
ଓଡ଼ିଶା ସିନିଅର ଟିମରେ ଖେଳିବା ବେଳେ ଭୁବନେଶ୍ବର କ୍ରୀଡ଼ା ଛାତ୍ରାବାସର କୋଚ୍ ସତ୍ୟନାରାୟଣ ସେନାପତିଙ୍କଠାରୁ ଭଲ ପ୍ରଶିକ୍ଷଣ ପାଇଥିଲେ ରାହୁଲ । ତାଙ୍କ ଅଭିଜ୍ଞତା ଓ କୌଶଳ ରାହୁଲଙ୍କୁ ଆଗକୁ ବଢ଼ିବାରେ ବେଶ୍ ସହାୟକ ହୋଇଥିଲା । ଓଡ଼ିଶା ଦଳର ଜଣେ ଆକ୍ରମଣାତ୍ମକ ସ୍ମାସର ଭାବେ ଜାତୀୟ ଚୟନକର୍ତ୍ତାଙ୍କ ଦୃଷ୍ଟି ଆକର୍ଷଣ କରିଥିବା ରାହୁଲଙ୍କୁ ୨୦୨୨ରେ ୨୪ ଜଣିଆ ସମ୍ଭାବ୍ୟ ଭାରତୀୟ ଦଳରେ ସ୍ଥାନ ମିଳିଥିଲା । ସେହିବର୍ଷ କିଟ୍ କ୍ୟାମ୍ପସରେ ଆୟୋଜିତ ସମ୍ଭାବ୍ୟ ଭାରତୀୟ ଦଳର ପ୍ରଶିକ୍ଷଣ ଶିବିରରେ ସାମିଲ ହୋଇଥିଲେ ରାହୁଲ । କିନ୍ତୁ ଅଳ୍ପକେ ଚୂଡ଼ାନ୍ତ ଦଳରେ ସ୍ଥାନ ପାଇବାରୁ ବଞ୍ଚିତ ହୋଇଥିଲେ । କିନ୍ତୁ ଏଥର ରାହୁଲଙ୍କୁ ଦେଖିବାକୁ ମିଳିଥିଲା ଜବରଦସ୍ତ ଫର୍ମରେ । ଏଥର ୨୪ ଜଣିଆ ସମ୍ଭାବ୍ୟ ଭାରତୀୟ ଦଳର ଶିବିର ମଧ୍ୟ ଆୟୋଜିତ ହୋଇଥିଲା କିଟ୍ ବିଜୁ ପଟ୍ଟନାୟକ ଇନଡୋର ଷ୍ଟାଡିୟମରେ । ଏଥିର ଜାତୀୟ ଚୟନକର୍ତ୍ତାଙ୍କୁ ବେଶ୍ ପ୍ରଭାବିତ କରିଥିଲା ସ୍ମାସର୍ ରାହୁଲଙ୍କ ଖେଳ । ଶେଷରେ ରାହୁଲଙ୍କୁ ଚୂଡ଼ାନ୍ତ ଭାରତୀୟ ସିନିଅର ଭଲିବଲ୍ ଦଳରେ ସ୍ଥାନ ମିଳିଛି ।
୩୧ ବର୍ଷ ପରେ ଆଉ ଜଣେ ଓଡ଼ିଆ ଭାରତୀୟ ସିନିଅର ଭଲିବଲ୍ ଦଳରେ ଖେଳିବାରେ ରାହୁଲ ହେଉଛନ୍ତି ଦ୍ବିତୀୟ ଓଡ଼ିଆ ଖେଳାଳି । ୩୧ ବର୍ଷ ପରେ ଜଣେ ଓଡ଼ିଆ ଖେଳାଳି ଭାବେ ଭାରତୀୟ ଭଲିବଲ୍ ଦଳରେ ଖେଳିବାର ସୁଯୋଗ ପାଇଛନ୍ତି ରାହୁଲ । ଶେଷ ଥର ପାଇଁ ୧୯୯୨ ମସିହାରେ ଓଡ଼ିଆ ଖେଳାଳି ମହମ୍ମଦ ମସିଉଜ୍ ଜମା ଭାରତୀୟ ସିନିଅର ଦଳରେ ସ୍ଥାନ ପାଇଥିଲେ । ଏବେ ରାହୁଲ ଭାରତୀୟ ଟିମରେ ଖେଳିବା ଓଡ଼ିଶା ପାଇଁ ଅତ୍ୟନ୍ତ ଗର୍ବ ଓ ଗୌରବର ବିଷୟ । ଏଥିପାଇଁ ରାହୁଲଙ୍କୁ ଶୁଭେଚ୍ଛା ଜଣାଇଛନ୍ତି ଭାରତୀୟ ଭଲିବଲ ମହାସଂଘର ସଭାପତି ତଥା ସାଂସଦ ଅଚ୍ୟୁତ ସାମନ୍ତ । ଭାରତୀୟ ଭଲିବଲ୍ ଟିମ୍ରେ ୫ ନମ୍ବର ଜର୍ସିଧାରୀ ରାହୁଲଙ୍କ ଉପରେ ରହିଛି ସମସ୍ତଙ୍କ ନଜର । ତାଙ୍କର ସଫଳତାରେ ଜଗତସିଂହପୁରବାସୀ ବର୍ତ୍ତମାନ ବେଶ ଗର୍ବିତ ।
