ଦିନିକିଆ କ୍ରିକେଟ ବିଶ୍ୱକପ ଜିତିବା ପାଇଁ ମୈଦାନରେ ଫାଇଟ କରୁଛନ୍ତି ସମସ୍ତ ଖେଳାଳି । ପ୍ରତ୍ୟେକ ମ୍ୟାଚରେ କିଏ ମାତ ଖାଉଛି ତ କିଏ ବାଜି ମାରୁଛି । ଛକା ଚଉକାରେ ଫାଟି ପଡୁଛି ପୁରା ଷ୍ଟାଡିୟମ । ଏହାରି ଭିତରେ କମାଲ କରୁଛନ୍ତି ବିଦେଶୀ ଖେଳାଳି । ମଙ୍ଗଳବାର ହୋଇଥିବା ମ୍ୟାଚ ଦେଖିଲେ ହିଁ ସ୍ପଷ୍ଟ ହେଉଛି ।
ସେ ଦିନ ଥିଲା ସାଉଥ ଆଫ୍ରିକା ବିପକ୍ଷରେ ନେଦରଲାଣ୍ଡସର ମ୍ୟାଚ । ଯେଉଁଥିରେ ଏଯାବତ୍ ହାରିନଥିବା ଦଳ କାମୁଡିଥିଲା ମାଟି । ଡଚ୍ ଟିମ୍ଠାରୁ ୩୮ ରନ୍ରେ ପରାଜୟ ବରଣ କରିଥିଲା ଦକ୍ଷିଣ ଆଫ୍ରିକା । ଆଉ ବିଜୟର ଶ୍ରେୟ ନେଇଥିଲେ ଡଚ୍ ବୋଲର ଓ୍ୱେନ୍ ମିକେରନ୍ । ଯାହାପରେ ନେଦରଲ୍ୟାଣ୍ଡ୍ସ ବୋଲର ବନିଯାଇଛନ୍ତି ହିରୋ । ୯ ଓଭର ବୋଲିଂ କରି ୪୦ ରନ୍ ଦେଇ ହାତେଇଥିଲେ ଦୁଇଟି ଓ୍ୱିକେଟ । ଯାହାକି ଥିଲା ଟର୍ଣ୍ଣିଂ ପଏଣ୍ଟ । ଆଉ ପାଲଟିଥିଲା ବାଜି । ତେବେ ଆପଣ ଜାଣନ୍ତି କି ନେଦରଲାଣ୍ଡ ପାଇଁ ହିରୋ ସାଜିଥିବା ଏହି ଖେଳାଳି ଦିନେ ଉବେର ଇଟ୍ସରେ ଫୁଡ ଡେଲିଭରି ବୟ ଭାବେ କାମ କରୁଥିଲେ ।
୨୦୨୦ ଟି-୨୦ ବିଶ୍ୱକପ୍ରେ ସେ ନିଜେ କରିଥିଲେ ଏ ବିଷୟରେ କରିଥିଲେ ଖୁଲ୍ଲାସା । ୩ ବର୍ଷ ପୂର୍ବରୁ ସାରା ବିଶ୍ୱରେ କରୋନା ତାଣ୍ଡବ ରଚିଥିଲା । ଆଉ ସେଥିପାଇଁ ଅନେକ କ୍ରିକେଟ ଟୁର୍ଣ୍ଣାମେଣ୍ଟକୁ ସ୍ଥଗିତ ରଖାଯାଇଥିଲା । ଅନେକ କ୍ରିକେଟରଙ୍କ ଆର୍ଥିକ ସ୍ଥିତି ବି ଖରାପ ହେଉଥିଲା । ସେହି ସମୟରେ ତାଙ୍କ ଅବସ୍ଥା ବି କିଛି ସେମିତି ଥିଲା । ସେ ଟ୍ୱିଟ କରି କହିଥିଲେ, ସେ ଫୁଡ ଡେଲିଭରି ବଏ ଭାବେ କାମ କରୁଛନ୍ତି, କାରଣ ଏବେ କ୍ରିକେଟ ବନ୍ଦ ଅଛି । ସେ ହାର ମାନି ନାହାନ୍ତି ଗୁଜୁରାଣ ମେଣ୍ଟାଇବାକୁ ଫୁଡ ଡେଲିଭରି କାମ କରୁଛନ୍ତି । ତେବେ ବାଧ୍ୟ ହୋଇ ଉବେର ଇଟ୍ସରେ ଡେଲିଭରୀ ବୟ ହୋଇଥିବା ଏହି ଖେଳାଳି ଏବେ ନେଦରଲ୍ୟାଣ୍ଡ୍ସର ଷ୍ଟାର ବୋଲର ପାଲଟିଛନ୍ତି ।
