ନୂଆଦିଲ୍ଲୀ: ପଞ୍ଚମ ମ୍ୟାଚ ବାତିଲ ହେବା ପରେ ଏହାକୁ ନେଇ ବିବାଦ ଥମିବାର ନାଁ ଧରୁନି । ପ୍ରତି ମୂହୁର୍ତ୍ତରେ ଏହି ମ୍ୟାଚ ସହିତ ଜଡିତ କିଛି ରୋମାଞ୍ଚକର ତଥ୍ୟ ସାମନାକୁ ଆସୁଛି । ମ୍ୟାଚ ରଦ୍ଦକୁ ନେଇ ଇସିବି ର ସିଇଓ ଟମ ହ୍ୟାରିସନ ଭାରତୀୟ ଖେଳାଳୀଙ୍କ ଉପରେ ପ୍ରଶ୍ନ ଉଠାଇବା ପରେ ଇଂଲିସ କ୍ରିକେଟକୁ ଚେତାଇ ଦେଇଛନ୍ତି ପୂର୍ବତନ ଖେଳାଳୀ । ଇଂଲଣ୍ଡ ଦଳର ପୂର୍ବତନ ଖେଳାଳୀ କେଭିନ ପିଟରସନଙ୍କ ସମେତ ଅନେକ ଖେଳାଳୀ ଏହାକୁ ନେଇ ମନ୍ତବ୍ୟ ରଖିଛନ୍ତି ।
ପିଟରସନ କହିଛନ୍ତି ଯେ, ‘ଭାରତ ଉପରକୁ ଆଙ୍ଗୁଳି ଉଠାଇବା ଉଚିତ ନୁହେଁ । ଅନ୍ୟକୁ କିଛି କହିବା ପୂର୍ବରୁ ଇଂଲଣ୍ଡ ନିଜ କଥା ଭାବିବା ଆବଶ୍ୟକ । ଦକ୍ଷିଣ ଆଫ୍ରିକା ଗସ୍ତ ସମୟରେ ଦଳ କରୋନା ସଂକ୍ରମଣ ଭୟରେ ସିରିଜ ନ ଖେଳି ଫେରିଆସିଥିଲା ଇଂଲଣ୍ଡ ଟିମ । ଯାହା ଫଳରେ ପ୍ରଚୁର ଆର୍ଥିକ କ୍ଷତି ସହିଥିଲା ଦକ୍ଷିଣ ଆଫ୍ରିକା । ତେଣୁ ଏଠାରେ ଭାରତକୁ ଆଙ୍ଗୁଳି ନିର୍ଦେଶ କରିବା ବନ୍ଦ କରୁ ଇଂଲଣ୍ଡ ଟିମ ।’
ଅଷ୍ଟ୍ରେଲିଆର ପୂର୍ବତନ କ୍ରିକେଟର ସେନ ୱାର୍ଣ୍ଣ ମଧ୍ୟ ଏହାକୁ ନେଇ ନିରାଶ ବ୍ୟକ୍ତ କରିଛନ୍ତି । ଟ୍ୱିଟ କରି ସେ କହିଛନ୍ତି ଯେ, ‘ଭାରତ ଏବଂ ଇଂଲଣ୍ଡ ମଧ୍ୟରେ ଜାରି ରହିଥିବା ଟେଷ୍ଟ ସିରିଜ ବାତିଲ ହେବା ଅତ୍ୟନ୍ତ ନୈରାଶ୍ୟ ଜନକ । ଉଭୟ ଟିମ ମଧ୍ୟରେ ଖୁବ ସୁନ୍ଦର ସିରିଜ ଜାରି ରହିଥିଲା ।’
ସେହିଭଳି ଇଂଲଣ୍ଡର ପୂର୍ବତନ ଅଧିନାୟକ ମାଇକେଲ ଭନ ଟ୍ୱିଟ କରି କହିଛନ୍ତି, ‘ଭାରତ ଇଂଲଣ୍ଡ କ୍ରିକେଟର କରିମା କ୍ଷୁର୍ଣ୍ଣ କରିଛି । କିନ୍ତୁ ଇଂଲଣ୍ଡ ମଧ୍ୟ ଦକ୍ଷିଣ ଆଫ୍ରିକା ଗସ୍ତ ସମୟରେ ତାହା ହିଁ କରିଥିଲା । ତେଣୁ ଅନ୍ୟକୁ କହିବା ପୂର୍ବରୁ ଭାବିବା ଆବଶ୍ୟକ ।’
ଇଂଲଣ୍ଡର ପୂର୍ବତନ ବ୍ୟାଟ୍ସମ୍ୟାନ୍ ମାର୍କ ବାଉଚର କହିଛନ୍ତି, ‘ଆସନ୍ତା ସେପ୍ଟେମ୍ବର ୧୯ ତାରିଖରୁ ୟୁଏଇରେ ଆରମ୍ଭ ହେବାକୁ ଯାଉଛି ଆଇପିଏଲର ଦ୍ୱିତୀୟ ପର୍ଯ୍ୟାୟ । ଯଦି ଭାରତୀୟ ଖେଳାଳି ସଂକ୍ରମିତ ହୁଅନ୍ତି ତେବେ ସେମାନଙ୍କୁ ୧୦ ଦିନ ପାଇଁ ପୃଥକବାସରେ ରହିବାକୁ ହେବ । ଏହି କାରଣରୁ ଭାରତୀୟ ଦଳ ଅନ୍ତିମ ଟେଷ୍ଟକୁ ବାତିଲ କରିଦେଇଥାଇପାରେ ।’
