କଟକ : ଓଡିଶାକୁ ଫେରିବ ଫଟାଫଟ୍ କ୍ରିକେଟର ଆସର । ପୁଣି ବାରବାଟୀରେ ଆୟୋଜିତ ହେବ ଆନ୍ତର୍ଜାତୀୟ ମ୍ୟାଚ । ଜୁନ ମାସରେ ଭାରତ ଦକ୍ଷିଣ ଆଫ୍ରିକା ଟି ଟ୍ୱେଣ୍ଟି ସିରିଜ ଥିବା ବେଳେ ଏହାର ଦ୍ୱିତୀୟ ମ୍ୟାଚଟି ବାରବାଟୀରେ ଖେଳାଯିବ । ଏ ସମ୍ପର୍କରେ ବିସିଆଇ ଓସିଏକୁ ସୂଚନା ଦେଇଛି । ସୂଚନାନୁଯାୟୀ ଜୁନ ୯ରେ ଦିଲ୍ଲୀ,୧୨ କଟକ,୧୪ ବିଶାଖାପାଟଣା,୧୭ ରାଜକୋଟ,ଏବଂ ୧୯ରେ ବାଙ୍ଗାଲୋରରେ ମ୍ୟାଚ ଖେଳାଯିବାକୁ ନିର୍ଦ୍ଧାରଣ କରାଯାଇଛି । ଶୁକ୍ରବାର ଏ ସମ୍ପର୍କରେ ଏକ ବୈଠକ ବସି ସମସ୍ତ କାର୍ଯ୍ୟ ସୁଚୀ ନିର୍ଦ୍ଧାରଣ କରାଯାଇଛି ।
ପୂର୍ବରୁ ବାରବାଟୀରେ ଦୁଇଟି ଟି ଟ୍ୱେଣ୍ଟି ଆନ୍ତର୍ଜାତୀୟ ମ୍ୟାଚ ପ୍ରଥମଟି ଦକ୍ଷିଣ ଆଫ୍ରିକା ଓ ଦ୍ୱିତୀୟଟି ଶ୍ରୀଲଙ୍କା ସହ ଖେଳା ଯାଇଥିଲା । ପ୍ରଥମ ମ୍ୟାଚରେ ଦକ୍ଷିଣ ଆଫ୍ରିକା ୬ ଉଇକେଟରେ ଜିତିଥିଲା ବେଳେ ଶ୍ରୀଲଙ୍କା ବିପକ୍ଷ ମ୍ୟାଚରେ ଭାରତ ଭ୍ରମଣକାରୀ ଦଳକୁ ୮୭ ରନରେ ଅଲଆଉଟ କରି (୯୩) ରନରେ ମ୍ୟାଚକୁ ଜିତିଥିଲା । ଓସିଏ ସମ୍ପାଦକ ସଞ୍ଜୟ ବେହେରା ଜୁନ ମାସରେ ଅନୁଷ୍ଠିତ ହେବାକୁ ଥିବା ମ୍ୟାଚ ପାଇଁ ବେଶ ଖୁସି ଅଛନ୍ତି । ବାରବାଟୀରେ ମ୍ୟାଚ ପାଇଁ ଖେଳପ୍ରେମୀ ମାନେ ଦୀର୍ଘ ଦିନରୁ ଦାବି କରିଆସୁଥିଲେ । ସଞ୍ଜୟ ଆହୁରି ମଧ୍ୟ କହିଛନ୍ତି ଯୁଦ୍ଧକାଳୀନ ଭିତ୍ତିରେ ୬ ଓ ୭ ନମ୍ବର ଗ୍ୟାଲେରିର କାମ ଚାଲୁ ରହିଛି । ନୂଆ ପଡିଆ ଓ ପିଚ ପ୍ରସ୍ତୁତ କରାଯାଇଛି । ନୂଆ ଏଲଇଡି ଲାଇଟ ଲଗାହୋଇଛି । ରଙ୍ଗ କାମ ଚାଲୁ ରହିଛି । ଖେଳାଳିଙ୍କ ପାଇଁ ଡ୍ରେସିଙ୍ଗ ରୁମକୁ ନୂଆ ଲୁକ ଦିଆଯାଇଛି । କୋଭିଡକୁ ଆଖି ଆଗରେ ରଖି ରାଜ୍ୟ ସରକାର ଦର୍ଶକଙ୍କ ପାଇଁ ଯାହା ନିୟମ କରିବେ ସେଥି ପ୍ରତି ନଜର ରଖାଯାଇଛି ।
ଚଳିତ ବର୍ଷ ଫେବୃଆରୀରେ ଭାରତ ଭ୍ରମଣଜାରୀ ଦଳ ଇଣ୍ଡିଜ ସହ ମ୍ୟଚ କଟକରେ ହୋଇଥାଆନ୍ତା । କିନ୍ତୁ କରୋନା ସ୍ଥିତିକୁ ଦୃଷ୍ଟିରେ ଏହି ଶୃଙ୍ଖଳାର ସମସ୍ତ ମ୍ୟାଚକୁ କୋଲକାତାରେ ଆୟୋଜନ କରାଯାଇ ଥିଲା । ଯେଉଁ କ୍ରିକେଟ ସଙ୍ଘ ଗୁଡିକ ମ୍ୟାଚରୁ ବଞ୍ଚିତ ରହିଥିଲେ ତାଙ୍କ ମଧ୍ୟରେ ବାରତ ଦକ୍ଷିଣ ଆଫ୍ରିକା ମ୍ୟାଚ ଗୁଡିକ ବାଣ୍ଟି ଦିଆଯାଇ ଥିବା ସୁଚନା ମିଳିଛି ।
