ଟେଷ୍ଟ କ୍ରିକେଟକୁ ଆଇପିଏଲ୍ ମଝିରେ ଅଲବିଦା କହିଛନ୍ତି ରୋହିତ ଶର୍ମା । ଏଭଳି ହଠାତ ଅବସର ଘୋଷଣା ସମସ୍ତଙ୍କୁ ଚକିତ କରିଛି । ଭାରତ ଆଗକୁ ଇଂଲଣ୍ଡ ଗସ୍ତରେ ଥିବା ବେଳେ ଦଳର ଅଧିନାୟକ କିଏ ରହିବେ ତା’କୁ ନେଇ ପ୍ରଶ୍ନ ଉଠିଛି । ଏହି ରେସରେ ଋଷଭ ପନ୍ତ, ଜଶପ୍ରିତ ବୁମରା ଏବଂ ଶୁଭମନ ଗିଲଙ୍କ ନାଁ ରହିଛି । ଅଧିକାଂଶ ପୂର୍ବତନ କ୍ରିକେଟରମାନେ ଶୁଭମନ ଅଧିନାୟକ ହୁଅନ୍ତୁ ବୋଲି ଦାବି କରିଛନ୍ତି । ହେଲେ ଏହାକୁ ନେଇ ପୂର୍ବତନ ଭାରତୀୟ ଦଳର ଚୟନକର୍ତ୍ତା ଏସକେ ପ୍ରସାଦ ଅଗରକରଙ୍କ ଚୟନକର୍ତ୍ତା ଟମୁକ ଏକ ବଡ଼ ନିର୍ଦ୍ଦେଶ ଦେଇଛନ୍ତି ।
ସେ ଜଣାଇଛନ୍ତି ଯେ, ଅଧିନାୟକ କରିବା ପୂର୍ବରୁ ଇଂଲଣ୍ଡରେ ଗିଲଙ୍କ ରେକର୍ଡ କେମିତି ରହିଛି ଏହା ଉପରେ ପ୍ରଥମେ ନଜର ପକାଇବା ଆବଶ୍ୟକ । ଶୁଭମନ ଏବେ ଭଲ ଫର୍ମରେ ରହିଛନ୍ତି । ଯଦି ସେ ଅଧିନାୟକ ରହିବେ ତାହେଲେ ତାଙ୍କ ଉପରେ ଚାପ ରହିବ । ସେହି ଦୃଷ୍ଟିରୁ ଅଧିନାୟକ ହେବା ପାଇଁ ବୁମରା ଭଲ ବିକଳ୍ପ ହେବେ । ତେଣୁ ଗିଲଙ୍କୁ ଉପଅଧିନାୟକ ପଦ ଦେବା ଠିକ୍ ରହିବ । ଏହାପରେ ଭାରତ ନ୍ୟୁଜିଲାଣ୍ଡ ଗସ୍ତରେ ଯିବ । ବିଦେଶ ମାଟିରେ ବୁମରାଙ୍କ ଅଧିନାୟକତ୍ବରେ ଭାରତ ଭଲ ପ୍ରଦର୍ଶନ କରିବ ବୋଲି ଏସକେ ପ୍ରସାଦ ଏକ ଇଣ୍ଟରଭିୟ୍ୟୁ ସମୟରେ କହିଛନ୍ତି । ତେବେ ବିସିସିଆଇ ଆଗାମୀ ଦିନରେ କଣ ନିଷ୍ପତ୍ତି ନେଉଛି ଏବଂ କାହାକୁ ଅଧିନାୟକ କରୁଛି ତାହା ଉପରେ ରହିଛି ସମସ୍ତଙ୍କ ନଜର ।
