ନୂଆଦିଲ୍ଲୀ: ଚଳିତବର୍ଷ ଆଇପିଏଲ ସିଜନର ଅବଶିଷ୍ଟ ମ୍ୟାଚ ପୁଣି ଥରେ ୟୁଏଇରେ ଆରମ୍ଭ ହେବାକୁ ଯାଉଛି । ଏହା ସହିତ ଆସନ୍ତା ସିଜନ ପାଇଁ ମଧ୍ୟ ପ୍ରସ୍ତୁତି ଜୋରଦାର ଆରମ୍ଭ ହୋଇଯାଇଛି । ତେବେ ଏହି ସିଜନରେ ଦର୍ଶକମାନେ ଶେଷ ଥଣ ପାଇଁ ଆଇପିଏଲରେ ଆଠଟି ଟିମ ଖେଳୁଥିବାର ଦେଖିବାକୁ ପାଇବେ । ଏନେଇ ବିସିସିଆଇର କୋଷାଧ୍ୟକ୍ଷ ଅରୁଣ ଧୁମାଲ ସୂଚନା ଦେଇଛନ୍ତି । ତେବେ ଆଗାମୀ ବର୍ଷରୁ ଆଇପିଏଲରେ ଦୁଇଟି ଅଧିକ ଟିମ ଖେଳିବା ନେଇ ପ୍ରସ୍ତୁତି ଜୋର ଧରିଛି । ତେଣୁ ଏହା ୮ଟି ଟିମ ସହ ଆଇପିଏଲ ଖେଳାଯିବାର ଶେଷ ସିଜନ ହେବ । ଏହା ସହିତ ଆଗାମୀ ସିଜନରୁ ୧୦ଟି ଟିମକୁ ନେଇ ଆଇପିଏଲ ଆୟୋଜନ ହେବାର ବ୍ୟବସ୍ଥା କରୁଛି ବିସିସିଆଇ ।
କେବେ ଏହି ଦୁଇ ଟିମ୍ ଆଇପିଏଲ୍ ସହ ସାମିଲ ହେବେ ନେଇ ପ୍ରଶ୍ନରେ ଜବାବ ଦେବାକୁ ମନା କରିଦେଇଥିଲେ ଅରୁଣ। ଆଇପିଏଲ ଟି-୨୦ ଟୁର୍ଣ୍ଣାମେଣ୍ଟରେ ନୂଆ ସହର ପୁଣେ, ଲକ୍ଷ୍ନୌ ଏବଂ ଅହମଦାବାଦ ଶୀର୍ଷ ଦାବିଦାର ଅଛନ୍ତି। କାନପୁର, ଗୌହାଟି, ଇନ୍ଦୋର, କୋଚି, ରାୟପୁର ଏବଂ ତ୍ରୀବେନ୍ଦ୍ରମ୍ ରୋଷ୍ଟରରେ ଦୁଇ ନୂଆ ସ୍ଥାନ ପାଇଁ ରେସ୍ରେ ରହିପାରନ୍ତି । ଟି-୨୦ ଲିଗ୍ ମଧ୍ୟରେ କରୋନା ପ୍ରକୋପ ପାଇଁ ଚଳିତ ସିଜନକୁ ଅଧାରୁ ସ୍ଥଗିତ କରାଯାଇଥିଲା। କିନ୍ତୁ ଆଗାମୀ ସିଜନକୁ ସମ୍ପୂର୍ଣ୍ଣ ଭାବେ ଭାରତରେ କରାଇବାକୁ ବିସିସିଆଇ ଆଶା ରଖିଥିବା ଜଣାପଡ଼ିଛି।
