ବ୍ୟୁରୋ : ଭାରତର ଯୁବ ଗ୍ରାଣ୍ଡ୍ ମାଷ୍ଟର୍ ଆର୍ ପ୍ରଗଣାନନ୍ଦା ସୋମବାର ବଡ ବିପର୍ଯ୍ୟୟ ଘଟାଇଛନ୍ତି । ଅନଲାଇନ୍ ରାପିଡ୍ ଚେସ୍ ଟୁର୍ଣ୍ଣାମେଣ୍ଟ ଏୟାରଥିଙ୍ଗସ୍ ମାଷ୍ଟର୍ସର ଅଷ୍ଟମ ରାଉଣ୍ଡରେ ୧୬ ବର୍ଷୀୟ ପ୍ରଗଣାନନ୍ଦା ବିଶ୍ୱର ଏକ ନମ୍ବର ଖେଳାଳି ମ୍ୟାଗନସ୍ କାର୍ଲସେନଙ୍କୁ ପରାସ୍ତ କରିଛନ୍ତି । ପ୍ରଗଣାନନ୍ଦା ମ୍ୟାଗନସଙ୍କୁ ୩୯ ଚାଲ୍ରେ ପରାସ୍ତ କରିଛନ୍ତି । ଏହାସହ ସେ ମ୍ୟାଗନସଙ୍କ ବିଜୟ ଧାରାରେ ରୋକ୍ ଲଗାଇଛନ୍ତି ।ପୂର୍ବରୁ ମ୍ୟାଗନସ ଲଗାତର ଚାରୋଟି ବାଜି ଜିତି ନେଇଥିଲେ ।
ପ୍ରଗଣାନନ୍ଦା ଏହି ବିଜୟ ସହ ୮ ପଏଣ୍ଟ ହାସଲ କରିଛନ୍ତି । ଏହାସହ ସେ ଦ୍ୱାଦଶ ସ୍ଥାନରେ ରହିଛନ୍ତି । ତେବେ ପୂର୍ବ ମ୍ୟାଚରେ ଭଲ ପ୍ରଦର୍ଶନ କରିନଥିବା ପ୍ରଗଣାନନ୍ଦା ମ୍ୟାଗନସଙ୍କୁ ମାତ୍ ଦେଇଛନ୍ତି । ଏହାପୂର୍ବରୁ ସେ ଲ୍ୟାବ୍ ଓରନିୟନମଙ୍କ ବିରୋଧରେ ବିଜୟ ହାସଲ କରିଥିଲେ । ଆହୁରି ମଧ୍ୟ ଦୁଇଟି ବାଜି ଡ୍ର ରଖିଥିଲେ । କିନ୍ତୁ ୪ଟି ବାଜିରେ ତାଙ୍କୁ ପରାଜୟର ସାମ୍ନା କରିବାକୁ ପଡିଥିଲା ।
ପ୍ରଗଣାନନ୍ଦା ଅନୀଶ ଗିରି ଓ କ୍ୱାଙ୍ଗ୍ ଲିମଙ୍କ ବିରୋଧରେ ବାଜି ଡ୍ର ରଖିଥିଲେ । କିନ୍ତୁ ଏରିକ୍ ହେନସେନ, ଡିଙ୍ଗ୍ ଲେରେନ୍, କ୍ରିଜଷ୍ଟୋଫ୍ ହୁଡା ଓ ଶଖରିଆର ମମଦୟାରୋବଙ୍କ ବିରୋଧରେ ପରାସ୍ତ ହୋଇଥିଲେ । ସୂଚନାଯୋଗ୍ୟ, ଏୟାରଥିଙ୍ଗସ୍ ମାଷ୍ଟର୍ସର ଟୁର୍ଣ୍ଣାମେଣ୍ଟରେ ଇଆନ ନେପୋମାନିଆଚଚି ପ୍ରଥମ ସ୍ଥାନରେ ଥିବା ବେଳେ ଡିଙ୍ଗ୍ ଲିରେନ୍ ଓ ହେନସେନ୍ ସଂଯୁକ୍ତ ଭାବେ ଦ୍ୱିତୀୟ ସ୍ଥାନରେ ରହିଛନ୍ତି ।