ସୁପର୍ ଓଭରରେ ହରାଇଲା ଅଷ୍ଟ୍ରେଲିଆକୁ ଭାରତ

ମୁମ୍ବାଇ : ଭାରତ ସୁପର୍ ଓଭରରେ ଅଷ୍ଟ୍ରେଲିଆ ବିପକ୍ଷ ଦ୍ବିତୀୟ ମହିଳା ଟ୍ବେଣ୍ଟି-୨୦ରେ ବିଜୟୀ ହୋଇଛି । ଏହା ସହ ୫ ମ୍ୟାଚ୍ ଶୃଙ୍ଖଳାକୁ ହର୍ମନପ୍ରୀତ୍ କୌରଙ୍କ ଦଳ ୧-୧ ସ୍ତରକୁ ଆଣିଛି । ୧୮୭ ରନ୍ ସଂଗ୍ରହ କରି ମ୍ୟାଚ୍ ଟାଇ କରିଥିଲେ ଉଭୟ ଦଳ । ସୁପର୍ ଓଭରରେ ଭାରତ ୧ ୱିକେଟ୍ ବିନିମୟରେ ୨୦ ରନ୍ ସଂଗ୍ରହ କରିବା ପରେ ଅଷ୍ଟ୍ରେଲିଆକୁ ୧୬/୧ରେ ରୋକି ଦେଇଥିଲା। ଯେଉଁଥି ପାଇଁ ୪ ରନରେ ରୋମାଞ୍ଚକର ବିଜୟୀ ହାସଲ କରିଛି ଭାରତ । ଏହି ଫଳାଫଳ ସହିତ ୨୦୨୨ରେ ଅଷ୍ଟ୍ରେଲିଆ ପ୍ରଥମ ପରାଜୟ ବରଣ କରିଛି। ଶକ୍ତିଶାଳୀ ଅଷ୍ଟ୍ରେଲିଆ ବିପକ୍ଷରେ ଭାରତର ଏହା ଘରୋଇ ମାଟିରେ ଅଷ୍ଟମ ମୁକାବିଲାରୁ ଦ୍ବିତୀୟ ବିଜୟ ଥିଲା। ମୋଟ ଉପରେ ଭାରତ ମାତ୍ର ସପ୍ତମ ବିଜୟ ପାଇଛି ୨୭ ମ୍ୟାଚ୍ରୁ ।