ମ୍ୟାଚ୍ ଫିକ୍ସିଂ ଅଭିଯୋଗ ପରେ ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ଆମେରିକୀୟ ବ୍ୟାଟସମ୍ୟାନ୍ ଆରୋନ୍ ଜୋନ୍ସଙ୍କ ପାଇଁ ଅସ୍ଥାୟୀ ନିଲମ୍ବନ ଜାରି କରିଛି । ବାର୍ବାଡସ୍ରେ ଆୟୋଜିତ ଏକ କ୍ରିକେଟ୍ ଲିଗ୍ ଅବସରରେ ଆରୋନ ପ୍ରତ୍ୟକ୍ଷ ବା ପରୋକ୍ଷ ଭାବରେ ମ୍ୟାଚ୍ ଫିକ୍ସିଂରେ ଜଡ଼ିତ ଥିବାର ପ୍ରମାଣ ମିଳିବା ପରେ ଆଇସିସି ତାଙ୍କ ବିରୋଧରେ ଏଭଳି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିଛି । ତେବେ ନିଜ ପକ୍ଷ ରଖିବାକୁ ଆରୋନଙ୍କୁ ୧୪ ଦିନର ସମୟ ଦେଇଛି ଆଇସିସି ।
୩୧ବର୍ଷୀୟ ଆରୋନ ସଂପ୍ରତି ବିଶ୍ବକପ୍ ଲାଗି ଶ୍ରୀଲଙ୍କାରେ ପ୍ରସ୍ତୁତି କରୁଛନ୍ତି। ଏଭଳି ସ୍ଥିତିରେ ଆଇସିସିର ଏହି କାର୍ଯ୍ୟାନୁଷ୍ଠାନ ଆମେରିକୀୟ କ୍ରିକେଟ୍ ଦଳ ପାଇଁ ଏକ ଶକ୍ତ ଝଟକା ହୋଇଛି। କାରଣ ଆମେରିକା ଏପର୍ଯ୍ୟନ୍ତ ବିଶ୍ବକପ୍ ଦଳ ଘୋଷଣା କରି ନଥିଲେ ମଧ୍ୟ ଆରୋନ ଏଥିରେ ସ୍ଥାନ ପାଇବାର ଯଟେଷ୍ଟ ସମ୍ଭାବନା ଥିଲା। ସେ ଆମେରିକା ପକ୍ଷରୁ ୫୨ ଦିନିକିଆ ଏବଂ ୪୮ ଟ୍ବେଣ୍ଟି-୨୦ ଖେଳିଛନ୍ତି। ୨୦୧୯ରେ ଅନ୍ତର୍ଜାତୀୟ କ୍ୟାରିୟର୍ ଆରମ୍ଭ କରିଥିଲେ। ୨୦୨୪ ମସିହାରେ ଟ୍ବେଣ୍ଟି-୨୦ ବିଶ୍ବକପ୍ରେ କାନାଡା ବିପକ୍ଷରେ ସେ ୪୦ ବଲ୍ରୁ ୯୦ ରନ୍ର ବିସ୍ଫୋରକ ଓ ମ୍ୟାଚ୍ ବିଜୟୀ ପାଳି ଖେଳିଥିଲେ।
