ହାରକୁ ନେଇ ବାଉଳା ଇଂଲଣ୍ଡ

ନୂଆଦିଲ୍ଲୀ: ଭାରତ ବିପକ୍ଷ ଲର୍ଡ୍ସ ଦ୍ୱିତୀୟ ଟେଷ୍ଟରେ ଏକ ବଡ ବ୍ୟବଧାନରେ ହାରିବା ପରେ ଇଂଲଣ୍ଡ ଦଳ ଚିନ୍ତାରେ ପଡିଯାଇଛି । ଏହି ପରାଜୟକୁ ଇଂଲିଶ ଦଳ କିମ୍ବା ଇଂଲଣ୍ଡ ମିଡିଆ ସହଜରେ ଗ୍ରହଣ କରିପାରି ନାହିଁ । ସେଥିପାଇଁ ଭାରତୀୟ ଦଳ ଉପରେ ଭିତ୍ତିହୀନ ଅଭିଯୋଗ କରିଛି ଇଂଲଣ୍ଡର ଗଣମାଧ୍ୟମ । ମ୍ୟାଚ ହାରିବା ପରେ ଏହାକୁ ଏକ ଭିନ୍ନ ମୋଡରେ ପହଞ୍ଚାଇଛି ବ୍ରିଟିଶର ଗଣମାଧ୍ୟମ ସଂସ୍ଥା ଦି ଗାର୍ଡିଆନ ।
ଏଥିରେ ପ୍ରକାଶିତ ଏକ ଖବର ଅନୁଯାୟୀ, ଟିମ୍ ଇଣ୍ଡିଆର ଖେଳାଳି ଇଂଲଣ୍ଡର ଦ୍ରୁତ ବୋଲର ଓଲି ରବିନସନଙ୍କୁ ଟାର୍ଗେଟ କରିଥିଲେ । ରବିନସନ ପାଭିଲିୟନ ସିଢ଼ିରୁ ଓହ୍ଲାଉଥିବା ବେଳେ ପଡ଼ିଆରେ ଡ୍ରିଙ୍କ ଦେଇ ଫେରୁଥିଲେ ୨ ଜଣ ଭାରତୀୟ ଖେଳାଳି । ତେଣୁ ରବିନସନ ଅଟକି ଯିବା ସହ ସେମାନେ ଦୁଇ ଜଣ ଗୋଟିଏ ପଟେ ଛିଡ଼ା ହେବାକୁ ନେଇ ସେ ଅପେକ୍ଷା କରିଥିଲେ । କିନ୍ତୁ ଭାରତୀୟ ଖେଳାଳି ରବିନସନ୍ଙ୍କୁ ରାସ୍ତା ଛାଡ଼ି ନଥିଲେ ବୋଲି ଗାର୍ଡିଆନ ତରଫରୁ କୁହାଯାଉଛି । ତେବେ ରବିନସନ ଭାରତୀୟ ଖେଳାଳିଙ୍କ ରାସ୍ତା ଛାଡ଼ିବାକୁ ଅପେକ୍ଷା କରିଥିଲେ। କିନ୍ତୁ ଟିମ ଇଣ୍ଡିଆର ଖେଳାଳି କିଛି ସେକେଣ୍ଡ ପାଇଁ ତାଙ୍କୁ ରାସ୍ତା ଛାଡ଼ିନଥିଲେ।
ଭାରତ-ଇଂଲଣ୍ଡ ବିପକ୍ଷ ଦ୍ୱିତୀୟ ମ୍ୟାଚ ଅଦ୍ୟନ୍ତ ରୋମାଞ୍ଚକର ଥିଲା । ମ୍ୟାଚର ପଞ୍ଚମ ଦିନର ଗୋଟିଏ ସମୟରେ ଲାଗୁଥିଲା ଇଂଲଣ୍ଡ ଏହି ମ୍ୟାଚରେ ଅତି ସହଜରେ ବିଜୟ ହାସଲ କରପାରିବ । କିନ୍ତୁ ଶାମୀ ଏବଂ ବୁମରାହଙ୍କ ୮୯ ରନର ପାର୍ଟନରସିପ ଭାରତକୁ ପରାଜୟ କବଳରୁ ରକ୍ଷା କରିଥିଲା ଏବଂ ମ୍ୟାଚ ଡ୍ର ହେବାର ଆଶଙ୍କା ବଢିଥିଲା । ତେବେ ଭାରତୀୟ ବୋଲରଙ୍କ ଜବରଦସ୍ତ ବୋଲିିଂ ଆଟାକରେ ସମ୍ପୂର୍ଣ୍ଣ ବିଫଳ ହୋଇଥିଲା ଇଂଲଣ୍ଡର ବ୍ୟାଟିଂ ଲାଇନଅପ । ଯାହା ପରିଣାମରେ ଦଳ ୧୫୧ ରନରେ ପରାଜୟ ବରଣ କରିଛି ।