ବ୍ୟୁରୋ : ଆଇପିଏଲ୍ର ନୂଆ ଫ୍ରାଞ୍ଚାଇଜ ଗୁଜରାଟ ଟାଇଟନ୍ସ ପକ୍ଷରୁ ଥ୍ରୀଡି ଭର୍ଚୁଆଲ୍ ୱର୍ଲ୍ଡ ନେଟୱାର୍କ ‘ମେଟାଭର୍ସ’ରେ ଦଳର ଲୋଗୋ ଉନ୍ମୋଚନ କରାଯାଇଛି । ମେଟାଭର୍ସରେ ପ୍ରସ୍ତୁତ ହୋଇଥିବା ‘ଦ ଟାଇଟନ୍ସ ଡଗ୍ଆଉଟ୍’ରେ ଦଳର ମୁଖ୍ୟ କୋଚ୍ ଆଶିଷ ନେହରା, ଅଧିନାୟକ ହାର୍ଦ୍ଦିକ ପାଣ୍ଡ୍ୟା ଓ ବ୍ୟାଟର ଶୁଭମନ ଗିଲ୍ ମିଳିତ ଭାବେ ଲୋଗୋ ଉନ୍ମୋଚନ କରିଥିଲେ । ଏହି ଲୋଗୋ ଏକ ଉଚ୍ଚତାକୁ ଦର୍ଶାଉଛି, ଯିଏ ବହୁ ଉଚ୍ଚ ଲକ୍ଷ୍ୟ ହାସଲ କରିବା ଉଦ୍ଦେଶ୍ୟରେ ଉପରକୁ ଆଗେଇ ଚାଲିଛି ।
ବହୁ ପ୍ରତିକ୍ଷୀତ ଏହି ଦଳର ଲୋଗୋ ଏକ ଗୁଡ଼ି ସଦୃଶ ରହିଛି, ଯାହା ଆକାଶରେ ଉପରକୁ ଉଡ଼ି ଚାଲିଛି । ଗୁଜରାଟରେ ଗୁଡ଼ି ଉଡ଼ା ପର୍ବ (ଉତ୍ତରାୟଣ ଉତ୍ସବ) ପାଳନ କରାଯାଉଛି । ଏହା ଗୁଜରାଟର ସାଂସ୍କୃତିକ ଐତିହ୍ୟ । ତେଣୁ ରାଜ୍ୟର ସଂସ୍କୃତିକୁ ଦର୍ଶାଉଥିବା ଭଳି ଲୋଗୋ ପ୍ରସ୍ତୁତ କରାଯାଇଛି । ଗୁଜରାଟ ଟାଇଟନ୍ସ ମେଗା ଖେଳାଳି ନିଲାମରେ ଏକ ସନ୍ତୁଳିତ ଦଳ ଗଠନ କରିଛି । ଅଲରାଉଣ୍ଡର ପାଣ୍ଡ୍ୟାଙ୍କୁ ନେତୃତ୍ୱ ଦାୟିତ୍ୱ ପ୍ରଦାନ କରାଯାଇଛି । ଦଳରେ ଭାରତୀୟ ପେସ୍ ବୋଲର ମହମ୍ମଦ ସାମି, ବ୍ୟାଟର ଗିଲ୍, ସ୍ପିନର ରାହୁଲ ତେୱାତିଆ, ଇଂଲଣ୍ଡର ଜାସନ ରୟ, ନ୍ୟୁଜିଲାଣ୍ଡ ଅଲରାଉଣ୍ଡର ଲୋକି ଫର୍ଗୁସନ ଏବଂ ଆଫଗାନିସ୍ତାନର ସ୍ପିନ ଯାଦୁକର ରସିଦ ଖାନଙ୍କ ଭଳି ତାରକା ଖେଳାଳି ସାମିଲ ରହିଛି ।
